އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު، އަދާލަތު ޕާޓީ އާ ރަސްމީކޮށް ގުޅިވަޑައިގެންފިއެވެ.
އަދާލަތު ޕާޓީން 'އެކްސް'ގައި ރޭ ލިޔުނު ޕޯސްޓެއްގައިވާ ގޮތުން، އެ ޕާޓީގެ އިދާރީ މަޖިލީހާ މަޝްވަރާކުރެއްވުމަށް ފަހު، އެ ޕާޓީގެ މިހާރުގެ ރައީސް އިމްރާން އަބްދުﷲ ގެ ލަފާގެ މަތިން، ޝަހީމްގެ ފޯމު ބަލައިގަތުމަށް އެ ޕާޓީގެ ރަޖިސްޓްރާ ވަނީ ނިންމަވައިފައެވެ.
މިދިޔަ މަހުގެ ފަހުކޮޅު މީސްމީޑިއާ އަށް ދޫކުރެއްވި ޕޯސްޓެއްގައި ޝަހީމް ވަނީ، އަދާލަތު ޕާޓީ އާ އަލުން ގުޅިވަޑައިގަތުމަށާއި، މި އަހަރުގެ ފަހުކޮޅު ބާއްވާ އެ ޕާޓީގެ އެތެރޭގެ އިންތިހާބުގައި ޕާޓީގެ ރައީސްކަމަށް ވާދަކުރެއްވުމަށް ނިންމަވައިފައެވެ. ޝަހީމްގެ މި ނިންމެވުމާ ގުޅިގެން އަދާލަތު ޕާޓީގެ އިލްމުވެރިންގެ ކައުންސިލްގެ ރައީސް ޑރ. އިލްޔާސް ހުސައިނާއި އެ ޕާޓީގެ ޖުޑީޝަލް ކޮމިޓީގެ ރައީސް ޑރ. މުހައްމަދު އިޔާޒްގެ އިތުރުން އެ ޕާޓީގެ ބައެއް މެންބަރުން ވަނީ ޝަހީމްގެ ނިންމެވުމަށް މަރުހަބާ ވިދާޅުވެފައެވެ.
ޝަހީމް 2018 ވަނަ އަހަރު އަދާލަތު ޕާޓީ ދޫކުރައްވައި ޕީޕީއެމަށް ސޮއިކުރެއްވުމަށް ފަހު އޭރުގެ ރައީސް އަބްދުﷲ ޔާމީންގެ ރަނިންމޭޓުގެ ގޮތުގައި މަސައްކަތްކުރައްވާފައިވެއެވެ. އަދި މިދިޔަ އަހަރު ޕީޕީއެމް އުވުމާ ހަމައަށް ޝަހީމް ހުންނެވީ އެ ޕާޓީގައެވެ. ޕީޕީއެމް އުވުމަށް ފަހު ޕީއެންސީއާ ޝަހީމް ގުޅިވަޑައިގަތްކަން ނުވަތަ ނޫންކަން ޔަގީނެއްނޫނެވެ.
މި ސަރުކާރު ފިޔަވައި އޭގެ ކުރީ ސަރުކާރުތަކުގެ ކޯލިޝަންގައި އަދާލަތު ޕާޓީ އޮތްކަން ފާހަގަކުރެވެއެވެ.