ރާއްޖޭގެ އެންމެ ޝަރަފްވެރި ކުޅިވަރު އެވޯޑް ކަމަށްވާ ހަވީރު ސްޕޯޓްސް އެވޯޑްސްގެ ތަރިން ކޮންމެ އަހަރަކު ރާއްޖޭގެ ރަށަކަށް ޒިޔާރަތްކޮށް ބާއްވާ "ތަރިންގެ ހަވީރު" މި އަހަރު ކ. ހިންމަފުށީގައި ބާއްވަން "ހަވީރު"ން ނިންމައިފި އެވެ. "ހަވީރު"ގެ އޮފިޝަލަކު ވިދާޅުވީ އޮކްޓޯބަރު ފަހުކޮޅު "ތަރިންގެ ހަވީރު" ގެ ދަތުރު ހިންމަފުށީގައި އޮންނާނެ ކަމަށާއި މި ފަހަރު ވެސް ރާއްޖޭގެ ކުޅިވަރުގެ ތަރިންނާއި ކުޅިވަރު އޮފިޝަލުންގެ އިތުރުން އެވޯޑުގެ ޕާޓްނަރުން ބައިވެރި މި ހަވީރު ވަރަށް ކުލަގަދަކޮށް ކުރިއަށްގެންދާނެ ކަމަށެވެ. ހިންމަފުށީ ކައުންސިލްގެ ރައީސް ޝާން އިބްރާހިމް ވިދާޅުވީ ކުޅިވަރުގެ ދާއިރާ އިން ރާއްޖޭގައި ދެވޭ އެންމެ ބޮޑު އަދި އެންމެ ޝަރަފްވެރި އެވޯޑުގެ، މި ހަރަކާތް އެ ރަށުގައި ބޭއްވުމަކީ އެ ރަށުގެ ކައުންސިލާއި ރައްޔިތުންގެ ވެސް ވަރަށް ބޮޑަށް އެދިއެދި ތިބި ކަމެއް ކަމަށެވެ. "މި ފުރުސަތު އަޅުގަނޑުމެންގެ ރަށަށް ދެއްވީތީ ހަވީރު ނޫހަށް ވަރަށް ބޮޑަށް ޝުކުރުއަދާކުރަން. އަޅުގަނޑުމެން ރަށަށް ޒިޔާރަތްކުރާ ފަރާތްތަކަށް ވަރަށް ހޫނު މަރުހަބާއެއް ކިޔައި މި ހަވީރު ވީހާ ވެސް ކުލަގަދަކޮށް ބާއްވަން ފުރިހަމަ އެއްބާރުލުން ދޭނަން،" ޝާން ވިދާޅުވި އެވެ. މިދިޔަ އަހަރު ކ. ހުރާގައި ބޭއްްވި "ތަރިންގެ ހަވީރު" ގައި ހުރާ ސްކޫލަށް ހަދިޔާ ދެނީ. --ހަވީރު ފައިލް ފޮޓޯ ކޮންމެ އަހަރަކު ވެސް ހަވީރުގެ ސްޕޯޓްސް އެވޯޑްސްގެ ފަރާތުން މާލެ އަތޮޅު ކޮންމެވެސް ރަށެއްގައި، އިޖްތިމާއީ ޒިންމާގެ ދަށުން މި ހަވީރު ބާއްވާއިރު މި ދަތުރުގައި ރަށުގެ ސްކޫލާއި ޒުވާނުންނަށް އެހީތެރިކަން ފޯރުކޮށްދެ އެވެ. މީގެ އިތުރުން ފޭސް ޕެއިންޓިން އާއި ކުޑަކުދިންނާ ގުޅޭ ތަފާތު ހަރަކާތްތައް ބާއްވައި އަދި ރާއްޖޭގެ ކުޅިވަރުގެ ތަރިންނާ ބައްދަލުކުރުމުގެ ފުރުސަތު އެ ރަށެއްގެ ކުދިންނަށް ތަނަވަސްކޮށްދެ އެވެ. މި ހަވީރު މީގެ ކުރިން ކ. ގުރައިދޫ، ކ. ގުޅި، ކ. ދިއްފުށީގައި އަދި ކ. ހުރާގައި ވަނީ ބާއްވައިފަ އެވެ. ހަވީރު ސްޕޯޓްސް އެވޯޑްސް އަކީ 1994 ވަނަ އަހަރުން ފެށިގެން "ހަވީރުން" ދެމުން އަންނަ އެވޯޑެކެވެ. ފުޓްބޯޅަ، ވޮލީބޯޅަ އަދި ބާސްކެޓްބޯޅަ އިން 23 އެވޯޑެއް އަންނަނީ ދެމުންނެވެ. އޭގެ ތެރޭގައި ކޮންމެ ކުޅިވަރަކުން ހޮވާ 21 އަހަރުން ދަށުގެ އަންހެން އަދި ފިރިހެން ކުޅުންތެރިޔާގެ އެވޯޑް ހިމެނެ އެވެ.