އިސްލާމް ދީނުގެ އުސޫލުތަކާ ފުށުނާރާ ގޮތެއްގެ މަތިން, ޔޯގާ ފަދަ ސިއްހީ ނުވަތަ ނަފުސާނީ ދުޅަހެޔޮކަން ބަދަހިކޮށް ވަރުގަދަ ކުރުމަށްޓަކާ ކުރާ ކަސްރަތުތަކަކީ ހަރާމް ކަންކަމޭ ބުނާނެ ތަނެއް ނެތް ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ
މައުމޫން ރޭ ނެރުނު ބަޔާނެއްގައި ވިދާޅުވީ، އިންސާނުން ކުރާ ކަންތައްތަކުން ހަރާމް ކަމާއި ހަލާން ކަނޑައަޅުއްވާ ފަރާތަކީ ހަމައެކަނި މަތް ﷲ ކަމަށެވެ. އެ ބާރަކީ، ރަސޫލު ބޭކަލަކަށް ވެސް، ނަބީ ބޭކަލަށްކަށް ވެސް އަދި އިންސާނަކަށް ވެސް އޮންނަ ބާރެއް ނޫން ކަމަށެވެ.
ހަރާމް ކަމަކީ މާތް ﷲ އެކަމެއް ކުރުން މުޅިން މަނާކޮށްފައިވާ ކަންކަންކަމަށް މައުމޫން ވިދާޅުވިއެވެ. އަދި އެކަންތައް އެނގޭނެ ގޮތްތައް ވެސް ބަޔާންކޮށްދީފައިވާ ކަމަށެވެ. އެގޮތުން އެންމެ ފާޅުކަން ބޮޑު ގޮތަކީ ކީރިތި ގުރުއާނުގެ އާޔަތްތަކުން ނުވަތަ މާތް ރަސޫލާގެ ބަސްފުޅަކުން އެކަމެއް ސަރީހަކަށް އެނގެން އޮތުން ކަމަށް މައުމޫން ވިދާޅުވިއެވެ.
އިސްލާމްދީނުގައި މަނާކަމެއްކަން އެނގޭނެ އަނެއް ގޮތަކީ ގަރީނާއަކުން އެކަން އެނގުން ކަމަށާއި، މިސާލަކަށް އެކަމެއް ނުކުރުމަށް ނުވަތަ އެކަމުން ދުރުހެލިވުމަށް މާތް ﷲ އަންގަވާފައިވާ އެންގެވުމާއި ގުޅިގެން އެކަމަކީ ފާފައެއް ނުވަތަ ޝައިތާނާގެ އަމަލެއްކަމަށް އަންގަވާފައިވުންކަމަށް މައުމޫން ވިދާޅުވިއެވެ. މާތް ﷲ ހަރާންކުރައްވާފައިވާ ކަންތައްތައް އެއްވެސް އޮޅުމެއް ނެތި މީސްތަކުންނަށް އެންގެން އޮތުމުގެ މުހިންމުކަމަށްޓަކައި، އެކަން ކުރަންވީ ގޮތް މާތް ﷲ ވަނީ އެކަލާނގެ ރަސޫލާއަށް އަންގަވާފައިކަމަށް ވެސް މައުމޫން ވިދާޅުވިއެވެ.
މައުމޫން ވިދާޅުވީ އިސްލާމް ދީނުގައި ހަރާންކޮށްފައިވާ ކަންތައްތަކަށް ނަޒަރު ކުރައްވާއިރު، އިސްލާމް ދީނަކީ ލުއިފަސޭހަ ހުރިހާ ޒަމާނަކަށާއި ތަނަކަށް އެކަށީގެންވާ ނިޒާމެއްކަން ސާބިތުކޮށްދެއްވުން ވަރަށް މުހިންމު ކަމަށެވެ. އެއީ ހަރާން ކުރައްވާފައިނުވާ ކޮންމެ ކަމަކީ ހުއްދަ ކަމެއް ކަމުގައި މަތް ﷲ ކަނޑައަޅުއްވާފައިވުމުންކަމަށް މައުމޫން ވިދާޅުވިއެވެ. އެންމެހައި ކަންކަމާއި ތަކެތި ހުއްދަވުން ކަމުގައި އިލްމުވެރިން ވިދާޅުވެފައިވަނީ މާތް ﷲ ބިމުގައި ލައްވާފައިވާހާ ތަކެއްޗެއް ލައްވާފައިވަނީ އިންސާނުންނަށް ކަމަށްޓަކައި ކީރިތި ގުރުއާނުގައި އަންގަވާފައިވާތީކަމަށް މައުމޫން ވިދާޅުވިއެވެ.
އެހެންކަމުން މާތް ﷲ ހަރާމް ކުރެއްވިކަން ސާބިތު ނުވާ އެއްވެސް ކަމަކީ ހަރާމް ކަމެއްކަމަށް ބުނުއްވުމުގެ ހައްގު އެއްވެސް އިންސާނަކަށް ލިބިގެންނުވާކަމަށް މައުމޫން ވިދާޅުވިއެވެ. އަދި އަލަށް އުފެދޭ އާދަކާދަތަކުގެ ތެރެއިން ވެސް އެކަމަކީ ހަރާން ކަމެއްކަން ސާބިތުނުވާ ކޮންމެ ކަމެއް ހުއްދަވާނެކަމަށް މައުމޫން ވިދާޅުވިއެވެ.
” އެހެންކަމުން ގައުމީ ނުވަތަ އިޖުތިމާއީ މުނާސަބުތައް ފާހަގަކުރުމާއި އިންސާނީ ގުޅުންނަށް ބަދަހިކުރުމަށްޓަކައި ކުރެވޭ ކަންކަމާއި، އުފަން ދުވަސް ފާހަގަ ކުރުމާއި، އެކިއެކި ކުޅިވަޅު ކުޅުމާއި، މުނިފޫހި ފިލުވުމަށް ކުރާ ކަންކަމާއި، އިސްލާމްދީނުގެ އުސޫލުތަކާ ފުށުނާރާގޮތުގެ މަތިން ޔޯގާ ފަދަ ސިއްހީ ނުވަތަ ނަފުސާނީ ދުޅަހެޔޮކަން ބަދަހިކޮށް ވަރުގަދަ ކުރުމަށްޓަކައި ކުރާ ކަސްރަތުތަކާއި، ލަވަކިޔުމާއި، މިޔުޒިކް ކުޅުން ފަދަ ކަންކަމަކީވެސް ހަރާމް ކަންކަމޭ ބުނާނެ ތަނެއް ނެތެވެ. އެހެންނަމަވެސް އެއިން އެއްވެސް ކަމެއް ކުރުމުގެ ތެރޭގައި ހަރާމް ކަމެއް އެކުލެވިގެންވާނަމަ ނުވަތަ އެކަމަކީ ހަރާމް ކަމަކަށް އަރައިގަތުމަށްޓަކައި ބޭނުން ކުރެވޭ ވަސީލަތަކަށްވާނަމަ އެކަމެއް ހަރާމް ވާނެކަން ޔަގީނެވެ.” މައުމޫން ވިދާޅުވި އެވެ.