ގައުމީ ކްލަބް ޗެސް ޗެމްޕިއަންޝިޕް 2026 ގެ ޗެމްޕިއަންކަން، މުބާރާތް ނިމެން އެއްބުރު ބާކީ އޮއްވައި ޒުގްޒުވާންގް ޗެސް ކްލަބުން ކަށަވަރުކޮށްފިއެވެ. ހުޅުމާލޭ ޗެސް އާކޭޑްގައި މި މަހުގެ 17 އިން 25 އަށް ކުރިއަށްދާ މި މުބާރާތުގެ ތަށި އެ ކްލަބުން އުފުލާލީ، ބާކީ ހުރި މެޗުތަކުން ނުކުންނަ ނަތީޖާއަކުން އެއްވަނަ މަގާމަށް ބަދަލެއް ނާންނާނެކަން ޔަގީންވުމުންނެވެ. މޯލްޑިވްސް ޗެސް އެސޯސިއޭޝަނުން އިންތިޒާމުކޮށްގެން، އެ އެސޯސިއޭޝަންގެ ރަޖިސްޓްރީ ކްލަބްތަކާއި އޮފީސްތަކަށް ހުޅުވާލައިގެން ކޮންމެ އަހަރަކުވެސް ބާއްވާ މި ފޯރިގަދަ މުބާރާތުގައި މިއަހަރު ޖުމްލަ 17 ކްލަބަކުން ވާދަކުރެއެވެ. މިއަހަރުގެ މުބާރާތުގައި ވާދަކުރާ ކްލަބްތަކަކީ: ޒުގްޒުވާންގް ޗެސް ކްލަބް ކްލަބް ޑަބަލް އެއިޓް ޖީނިއަސް ޗެސް އެކެޑަމީ ކާސަލް ޗެސް ކްލަބް އެންޑް އެކެޑަމީ ޕޮލިސް ކްލަބް ރޯޔަލް ޗެސް ކްލަބް މާލޭ ޗެސް ކްލަބް ސީޖް ޗެސް ކްލަބް ކަސްޓަމްސް ރިކްރިއޭޝަން ކްލަބް ކްލަބް ޗެކްމޭޓް މޯލްޑިވްސް ޗެސް ކްލަބް މޯލްޑިވްސް ޗެސް މާސްޓަރ އެކެޑަމީ ހުޅުމާލެ ޗެސް ކްލަބް ކްލަބް ޑާކް ނައިޓް ޕާސްޕޯން ޗެސް ކްލަބް އެންޑް އެކެޑަމީ ލަޔަން ރިކްރިއޭޝަން ކްލަބް ސްޓޯން ވޯލް މުބާރާތުގެ ތެރެއިން އިންޑިއާގެ ގްރޭންޑް މާސްޓާ ކުޅުންތެރިއެއް-- މިއަހަރުގެ މުބާރާތުން ފެނުނު އެންމެ ހާއްސަ ކަމަކީ، އިންޑިއާގެ ދެ ޗެސް މާސްޓަރަކު ވާދަކުރުމެވެ. އެގޮތުން މުބާރާތުގެ ޗެމްޕިއަންކަން ހޯދި ޒުގްޒުވާންގް ޗެސް ކްލަބުން ވަނީ އިންޑިއާގެ ގްރޭންޑް މާސްޓަރ (ޖީއެމް) ހަރިކްރިޝްނާގެ އިތުރުން އިންޓަނޭޝަނަލް މާސްޓަރ (އައިއެމް) މުތައްޔާ މި މުބާރާތަށް ގެނެސްފައެވެ. ގްރޭންޑް މާސްޓަރ އަކީ ރާޒުވާގެ ދުނިޔޭގައި ކުޅުންތެރިއަކަށް ހާސިލުކުރެވޭނެ އެންމެ މަތީ ޝަރަފުވެރި ލަގަބެވެ. ޒުގްޒުވާންގް ޗެސް ކްލަބްގެ ރައީސް މުޙައްމަދު ރާކިއު "ސަން" އަށް މައުލޫމާތު ދެއްވަމުން ވިދާޅުވީ، މި މުބާރާތަށް އެ ކްލަބުން ދުރާލާ ވަރަށް ފުރިހަމައަށް ތައްޔާރުވި ކަމަށެވެ. އަދި ބޭރުގެ މާސްޓަރުން ގެނައުމުގެ މައިގަނޑު މަގްސަދަކީ މުބާރާތުގެ ފެންވަރު މަތިކޮށް، ވާދަވެރި މާހައުލެއްގައި ދިވެހި ކުޅުންތެރިންނަށް ތަޖުރިބާ ހޯދުމުގެ ފުރުސަތު ފަހިކޮށްދިނުން ކަމަށް އޭނާ ވިދާޅުވިއެވެ. ހާއްސަކޮށް، ދުނިޔޭގެ ފެންވަރުގެ ގްރޭންޑް މާސްޓަރަކާ ދެކޮޅަށް ކުޅެލުމަކީ ދިވެހި ކުޅުންތެރިންނަށް ވަރަށް މަދުން ނޫނީ ނުލިބޭނެ ރަނގަޅު ފުރުސަތެއްކަން ރާކިއު ފާހަގަކުރެއްވިއެވެ. މީގެ އިތުރުން، ގިނަ ކުޅުންތެރިންގެ އެދުމުގެ މަތިން މި ބޭރުގެ މާސްޓަރުންނާއެކު ހާއްސަ ސެޝަނެއް ކުރިއަށްގެންދަން ނިންމާފައިވާ ކަމަށްވެސް އޭނާ ވިދާޅުވިއެވެ. މި ސެޝަނަކީ ދިވެހި ކުޅުންތެރިންގެ ހުނަރުގެ ފެންވަރު ދެނެގަނެ، ކުރިއަށްދާން ބޭނުންވާ އިރުޝާދާއި އެހީތެރިކަން ދެނެގަތުމަށް ލިބޭނެ ރަނުގެ ފުރުސަތެކެވެ. ރާކިއު ވިދާޅުވިގޮތުގައި ޒުގްޒުވާންގް ކްލަބްގެ އެންމެ ބޮޑު އަމާޒަކީ ރާއްޖޭގައި ރާޒުވާގެ ކުޅުން ކުރިއަރުވައި، ބައިނަލްއަގުވާމީ މައިދާނުގައި ވާދަކުރާ ގައުމީ ޓީމުގެ ފެންވަރު ދުވަހުން ދުވަހަށް މަތިކުރުމެވެ. ބޭރުގެ މާސްޓަރުން ރާއްޖެ ގެނައުމަކީ ބޮޑު ހަރަދެއް ހިނގި ކަމެއްކަން ފާހަގަކުރައްވައި، ރާކިއު ވަނީ މިކަމުގައި އެކި ގޮތްގޮތުން އެހީތެރިކަން ފޯރުކޮށްދިން ފަރާތްތަކަށް ޝުކުރު އަދާކުރައްވާފައެވެ. އެގޮތުން ޝީޝާ މޯލްޑިވްސް އާއި މޯލްޑިވްސް އިސްލާމިކް ބޭންކް (އެމްއައިބީ) އިން ލިބުނު ބޮޑު އެހީތެރިކަން އޭނާ ހާއްސަގޮތެއްގައި ފާހަގަކުރެއްވިއެވެ.