ވޭތުވެ ދިޔަ ހަފްތާއާއި ހަފްތާ ބަންދުގައި ވަރަށް ބޮޑަށް މޫސުން ގޯސްވި ނަމަވެސް ކުރިއަށް އޮތްތަނުގައި އިތުރަށް މޫސުން ގޯސްވެދާނެ ކަމަށް ލަފާ ނުކުރެވޭ ކަމަށް މީޓިއޮރޮލޮޖިކަލް ސެންޓަރުން ބުނެފިއެވެ.
ސީއެންއެމަށް މައުލޫމާތު ދެއްވަމުން މެޓު އޮފީހުން މިއަދު ބުނީ ކުރިއަށް އޮތް 24 ގަޑި އިރުގެ ތެރޭގައި ރާއްޖޭގެ އެއްވެސް ހިސާބަކަށް ވިއްސާރަ ނުކުރާނެ ކަމަށެވެ. ނަމަވެސް ކެރީގެ އަސަރު ކޮންމެ ވެސް ވަރަކަށް ކުރުން އެކަށީގެންވާ ކަމަށް މެޓު އޮފިހުން ބުނެއެވެ. ވައިޖެހެމުންދާނީ ގަޑިއަކު 10 މޭލާއި 15 މޭލާއި ދެމެދުގެ މިންވަރަކަށް ކަމަށް ވެސް މެޓު އޮފީހުން މައުލޫމާތުދެއެވެ.
މެޓު އޮފީހުން މައުލޫމާތުދޭ ގޮތުގައި ވޭތުވެ ދިޔަ ހަފްތާގެ ތެރޭގައި މޫސުން ގޯސްވެ ވައިގަދަވެ ކަނޑުދަތުރުފަތުރު ކުރުމަށް ހުރަސް އެޅޭ ވަރަށް ކަންތައްތައް ގޮސްފައިވަނީ ހުޅަނުގު މޫސުމުގެ ބާރު ގަދަވުމުންނެވެ. މޫސުން ގޯސްވުމުގެ ސަބަބުން ކަނޑުމަތީގެ ގިނަ ހާދިސާތަކެއް ހިނގާފައިވާ އިރު، ވައިގަދަވުމުގެ ސަބަބުން ވެސް ބައެއް ރަށްރަށަށްވަނީ ގެއްލުން ލިބިފައެވެ.