ބައިނަލްއަގުވާމީ ތައުލީމީ ދުވަހާ ގުޅުވައިގެން، ދިރާގުގެ މައި އޮފީހުގައި ކޮލެޖްތަކާއި ޔުނިވަސިޓީ ދަރިވަރުންނަށް ހާއްސަ ހަވީރެއް ބާއްވައިފިއެވެ. “ދިރާގު ސްޓޫޑެންޓް ކަނެކްޓް” ގެ ދަށުން “އައިސިކް އެޑިޝަން” ގެ ނަމުގައި ބޭއްވި މި ހަރަކާތް ކުރިއަށް ގެންގޮސްފައިވަނީ ގޭމިން އާއި މުނިފޫހިފިލުވުމުގެ ފޯރިގަދަ ކަންތައްތަކަކާ އެކުގައެވެ.
މި ހަރަކާތުގައި ބައިވެރިވި ދަރިވަރުންނަށް އެކި ކަހަލަ ގޭމްތައް ކުޅުމާއި މަޖާ ވަގުތުތަކެއް ހޭދަކުރުމުގެ ފުރުސަތު ދިރާގުން ވަނީ ފަހިކޮށްދީފައެވެ. މިއީ ޑިޖިޓަލް ވަސީލަތްތައް ބޭނުންކޮށްގެން ޒުވާނުންގެ އުފެއްދުންތެރިކަން އިތުރުކުރުމަށާއި، އެ ކުދިން އެކަކު އަނެކަކާ ގުޅުވާލުމަށް ބޭއްވި ހަރަކާތެއް ކަމަށް ދިރާގުން މައުލޫމާތު ދެއެވެ.
މި ހަވީރުގެ އެންމެ ހާއްސަ ކަމަކަށް އޮތީ ހަރަކާތުގައި ބައިވެރިވި ދަރިވަރުންނަށް ދިން އަގުހުރި ހަދިޔާއެވެ. އެގޮތުން ބައިވެރިވި ކޮންމެ ދަރިވަރަކަށް “ދިރާގު އެކްސް އައިސިކް” ސްޓޫޑެންޓް ޑިސްކައުންޓް ކާޑުގެ އެއް އަހަރު ދުވަހުގެ ސަބްސްކްރިޕްޝަން ވަނީ މުޅިން ހިލޭ ދީފައެވެ. މި ކާޑު މެދުވެރިކޮށް ރާއްޖެއާއި ދުނިޔޭގެ އެކި ކަންކޮޅުތަކުގެ އައުޓްލެޓްތަކުން ދަރިވަރުންނަށް ހާއްސަ އޮފާތަކާއި ޑިސްކައުންޓް ލިބޭނެއެވެ.
ދިރާގުގެ ޑިރެކްޓަރު އޮފް ބްރޭންޑް އެންޑް މާކެޓިން ކޮމިއުނިކޭޝަންސް މިރްޝާން ހަސަން ވިދާޅުވީ، ދިރާގުގެ އަމާޒަކީ ޑިޖިޓަލްކޮށް ކުރިއަރަމުން އަންނަ ޒަމާނެއްގައި، އޭއައި ވަސީލަތްތަކާއި ހައި ސްޕީޑް އިންޓަނެޓް ބޭނުންކޮށްގެން ދަރިވަރުންނަށް ތައުލީމީ ދާއިރާއިންނާއި އުފެއްދުންތެރިކަމުގެ ދާއިރާއިން ކުރިއަށް ދިއުމަށް އެހީތެރިވެދިނުން ކަމަށެވެ.
މިކަމާ ގުޅޭގޮތުން ދިރާގުގެ ޗީފް ކޮމާޝަލް އޮފިސަރު އަލީ ރިޔާޒް ވިދާޅުވީ ޒުވާނުން ބާރުވެރިކުރުވައި، އެ ކުދިން އިހުތިޔާރުކުރާ މުސްތަގުބަލަށް ވާސިލުވުމަށް ބޭނުންވާ ފުރުސަތުތަކާއި ވަސީލަތްތައް ފޯރުކޮށްދިނުމަކީ ދިރާގުން ވަރަށް ބޮޑު އިސްކަމެއް ދޭ ކަމެއް ކަމަށެވެ. މި ހަރަކާތުގައި ބައިވެރިވި އައިސިކް މޯލްޑިވްސްއިން ވަނީ ދަރިވަރުންނަށް މިފަދަ ފުރުސަތެއް ފަހިކޮށްދިނީތީ ދިރާގަށް ޝުކުރު އަދާކޮށްފައެވެ.