މޯލްޑިވިއަން ބްލަޑް ސާވިސްގެ ބްލަޑް ބޭންކުން އެކި ގްރޫޕްތަކުގެ ލޭ މަދުވެގެން ލޭ ހޯދުމަށް ދަތިވެފައިވާ މި ދަނޑިވަޅުގައި އެކަމާ ގުޅޭގޮތުން ހެލްތު މިނިސްޓަރު އަބްދުالله ނާޒިމްއާ ސުވާލު ކުރުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހަޅުއްވައިފި އެވެ.
ޖެނުއަރީ 22، ގައި ބްލަޑް ސާވިސްއިން ވަނީ ހަ ގްރޫޕެއްގެ ލޭ މަދުވެގެން ލޭ ހަދިޔާ ކުރުމަށް އެދިފަ އެވެ. ލޭ ލިބުމަށް ދަތިތަކެއް ކުރިމަތިވެފައިވާއިރު ތެލެސީމިއާ ކުދިންގެ ވެސް ގިނަ ކަންބޮޑުވުންތަކެއް މިކަމުގައި އެބައޮތެވެ.
ނާޒިމްއާ ސުވާލުކުރުމަށް ކުޑޫ ހުށަހެޅުއްވީ ލޭ ދޭ މީހުންނާއި އެ މީހުންގެ ލޭގެ ގްރޫޕް ހިމެނޭ ގޮތަށް ތަފްސީލު ދަފްތަރެއް އަދިވެސް އެކުލަވާލެވިފައި ނުވަނީ ކީއްވެގެންތޯ ސާފުކުރުމަށާއި ލޭ ހޯދުމުގައި ދިމާވާ ދަތިތަކަށް ޒަމާނީ ހައްލެއް ހޯދިފައިނުވަނީ ކީއްވެގެންތޯ ސާފުކުރުމަށެވެ.
ތެލެސީމިއާ ސެންޓަރު މިވަގުތު ހިންގަމުން އަންނަނީ ހުޅުމާލޭގައި ހުންނަ އޮރެންޖު ހިޔާގަ އެވެ. ކޮންމެ ހޮނިހިރަކުން ބުރާސްފައްޗަކާ ހަމައަށް އެތަނަށް ގޮސް ލޭ ހަދިޔާކުރެވޭނެ އެވެ.