ތެލަސީމިއާ ބަލި ތަހައްމަލުކުރަމުން ދާ މީހުންނަށް ލޭ ދޭ ފަރާތްތަކުގެ މައުލޫމާތާއި އެ ފަރާތްތަކުގެ ލޭގެ ތަފުސީލު ހިމެނޭ ފުރިހަމަ ދަފުތަރެއް ގާއިމްނުކުރެވި ދިގުލައިގެން ދާތީ ހެލްތު މިނިސްޓަރު ޢަބްދުالله ނާޒިމް އިބްރާހީމާ ސުވާލުކުރަން އިއްޔެ ހުށަހަޅައިފިއެވެ. ގަލޮޅު އުތުރު ދާއިރާގެ އެމްޑީޕީގެ މެންބަރު މުޙައްމަދު އިބްރާހީމް (ކުޑޫ) ހުށަހެޅުއްވި ސުވާލުގައިވަނީ، ސިއްހީ ޚިދުމަތް ދިނުމުގެ ގާނޫނާއި ތެލަސީމިއާ ކޮންޓްރޯލްކުރުމުގެ ގާނޫނުގައި ބަޔާންކޮށްފައި އޮތް ނަމަވެސް، ސިއްހީ ޚިދުމަތްދޭ މަރުކަޒުތަކުގައި ދޭ ލޭގެ ޚިދުމަތާބެހޭ ގައުމީ ނިޒާމު ގާއިމްކޮށް، ތެލަސީމިއާ ކުދިންނަށް ލޭ ދޭނެ ފަރާތްތަކުގެ ގޮތުގައި އެ ކުދިން ތައާރަފުކޮށްދޭ ފަރާތްތަކާއި، އެ ފަރާތްތަކުގެ ލޭގެ ތަފުސީލު ދަފުތަރެއް ގާއިމްކުރުމަށް ގިނަ ދުވަސް ނަގާ ކަމަށެވެ. އަދި ލޭ ހޯދުމަށް ދިމާވާ ދަތިތަކަށް ޒަމާނީ ހައްލެއް ނުގެނެވޭ ކަމަށްވެސް ކުޑޫ ފާހަގަ ކުރައްވާފައިވެއެވެ. އެހެންވެ، ކުޑޫގެ ސުވާލަކަށްވީ އެކަންކަމަށް ހައްލެއް ނުގެނެސްދެވި ލަސްވަނީ ކީއްވެތޯއެވެ. https://sun.mv/216171 ފާހަގަކުރެވޭ ގޮތުގައި މެންބަރު ކުޑޫ މި މައްސަލާގައި ސުވާލު ކުރަން ހުށަހަޅުއްވާފައި މިވަނީ ތެލަސީމިއާ ކުދިންނަށް ލޭ ލިބުން ދަތިވެފައިވަނިކޮށެވެ. މިއީ ދޭތެރެ ދޭތެރެއިން ކުރިމަތިވާ ކަމެކެވެ. އެކަމަށް އަދިވެސް ހައްލެއް ނުލިބެއެވެ. https://sun.mv/217028 ތެލަސީމިއާ މީހުންނަށް ކަންކަން ފަހި ކޮށްދިނުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން އެ ބަލި ތަހައްމަލުކުރަމުންދާ ފަރާތްތަކަށް ދެހާސް ރުފިޔާގެ އިނާޔަތެއް މަހަކު ދޭން ނިންމައި ސަރުކާރުން އިއުލާނުކުރީ މިދިޔަ އަހަރުގެ ފަހު ދުވަހެވެ. އަދި އިނާޔަތަށް އެދެން ހުޅުވާލީ މިއަހަރުގެ ފުރަތަމަ ދުވަހެވެ. ތެލަސީމިއާ ސެންޓަރުން އެކަމާ ގުޅޭގޮތުން އާންމުކުރި ގަވައިދުގައިވާ ގޮތުން ތެލަސީމިއާ ބަލި ތަހައްމަލުކުރާ މީހުންގެ ތެރެއިން ދެހާސް ރުފިޔާގެ އިނާޔަތް ދޫކުރާނީ ތެލަސީމިއާ ސެންޓަރުގައި ބަލަހައްޓަމުން އަންނަ ދަފުތަރުގައި ރަޖިސްޓްރީވެފައިވާ މީހުންނަށެވެ. އެ ފައިސާ ދޭން ފަށާނީ އިނާޔަތަށް އެދި ހުށަހަޅާ ފޯމު ބަލައިގަތުމަށް ފަހު، އަންނަ މީލާދީ މަހުން ފެށިގެންނެވެ. އަދި ކޮންމެ މީލާދީ މަހެއްގެ ދިހަވަނަ ކުރިން ތެލަސީމިއާ ބަލި މީހުންނަށް އިނާޔަތް ދޫކުރަން ޖެހޭނެއެވެ. އެހެންކަމުން މި މަހު އޮންނާނީ ތެލަސީމިއާ ބަލި ތަހައްމަލުކުރަމުންދާ މީހުން، ދަފުތަރުގައި ހިމެނުމަށް ހުށަހެޅުމެވެ. އޭގެ ފަހުން އިނާޔަތް އެ ފަރާތްތަކަށް ދޫކުރަން ފަށާނީ އަންނަ މަހުން ފެށިގެންނެވެ. ތެލަސީމިއާ ބަލިމީހުންނަށް އިނާޔަތް ދޫކުރާނީ އެންސްޕާއިންނެވެ. ތެލަސީމިއާ ބަލިމީހުންނަށް ދޭ އިނާޔަތް ކަނޑާލެވޭނެ ސަބަބުތައްވެސް ބަޔާންކޮށްފައިވެއެވެ. އެއީ ތެލަސީމިއާއަށް އިތުރަށް ފަރުވާކުރަން ނުޖެހޭ ކަމަށް ތެލަސީމިއާ ސެންޓަރުން ކަނޑައަޅާ ހިސާބުންނާއި، އިނާޔަތް ބޭނުންނުވާ ކަމަށް ބަލިމީހާ ލިއުމުން އެދުމުން، ނުވަތަ ބަލިމީހާ ނިޔާވުމުންނެވެ. ތެލަސީމިއާ ބަލި ތަހައްމަލުކުރަމުންދާ މީހުންނަށް ޚާއްސަ އިނާޔަތެއް ކަނޑައެޅުމަކީ ރައީސް ޑރ. މުޙައްމަދު މުޢިއްޒުގެ ވައުދެފުޅެކެވެ. އެގޮތުން، ރިޔާސީ އިންތިޚާބުގެ ދުވަސްވަރު ކެމްޕެއިން ޖަލްސާއެއްގައި ވާހަކަފުޅު ދައްކަވަމުން ރައީސް އޭރު ވިދާޅުވީ، ސަރުކާރުގެ ނިޒާމުގެ ތެރެއިން ތެލަސީމިއާ ކުދިންނަށް ދޭނެ އިނާޔަތެއް ތައާރަފްކުރާނެ ކަމަށެވެ. އެ ކަމުގެ ސަބަބުން ތެލަސީމިއާ ކުދިންނަށާއި އެ ކުދިންގެ އާއިލާއަށް ވަރަށް ބޮޑު ލުއިފަސޭހަތަކެއް ލިބޭނެ ކަމަށް ވިދާޅުވިއެވެ. އޭގެ އިތުރުން، ތެލަސީމިއާ ކުދިންނަށް ބޯންމެރޯ ހިލޭ ހެދޭނެ އިންތިޒާމު ސަރުކާރުގެ ތެރެއިން ހަމަޖައްސަވައިދެއްވާނެކަމަށް ވެސް ވިދާޅުވެފައިވެއެވެ. މި ސަރުކާރު ވެރިކަމަށް އައިފަހުން ވަނީ، ތެލަސީމިއާއަށް ޚާއްސަ ހޮސްޕިޓަލެއް އިމާރާތްކުރަން ވެސް ނިންމައިފައެވެ. އެ މަސައްކަތް ވަރަށް އަވަހަށް ފައްޓަވާނެ ކަމަށް، މިދިޔަ އަހަރުގެ ފެބްރުއަރީ މަހުގެ މެދުތެރޭ ނައިބު ރައީސް ޙުސައިން މުޙައްމަދު ލަޠީފް ވިދާޅުވިއެވެ. އޭގެ ފަހުން އެ ހޮސްޕިޓަލު އިމާރާތްކުރަން މިދިޔަ އަހަރުގެ އޮކްޓޯބަރު މަހުގެ މެދުތެރޭ މެލޭޝިއާގެ ކުންފުންޏަކާ ހަވާލުކުރި ނަމަވެސް، އަދިވެސް އަމަލީ މަސައްކަތެއް ނުފަށައެވެ. https://www.sun.mv/188707 އެކަމަކު އެސްއެސްޓީވީގެ ބާރު ހަތަރެއް ޕްރޮގްރާމުގައި މިދިޔަ އަހަރު ނިމުނުކޮޅު ވާހަކަ ދައްކަވަމުން ނާޒިމް އޭރު ވިދާޅުވީ، ތެލަސީމިއާ ހިމެނޭހެން މުހިންމު ތިން ދާއިރާއަކަށް އަޅަން ނިންމި ވަކިވަކި ހޮސްޕިޓަލްތައް އަދި އަޅައި ނުނިމުނު ނަމަވެސް, އެ ދާއިރާތަކުން ދޭ ފަރުވާގެ ފެންވަރު މިހާރު ރަނގަޅު ކޮށްފައިވާ ކަމަށެވެ.