މިދިޔަ އަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ޗައިނާ ފަހަތަށް ޖައްސާލައި އެންމެ ގިނަ ފަތުރުވެރިން އަންނަ ލިސްޓުގެ އެއްވަނައަށް ރަޝިއާ ޖެހިލައިފި އެވެ.
ވީ ކިހިނެއް؟ - ޓޫރިޒަމް މިނިސްޓްރީން އިއްޔެ އާންމު ކުރި އެންމެ ފަހުގެ ތަފާސްހިސާބުތަކަށް ބަލާއިރު، މިހާރު ރާއްޖެއަށް އެންމެ ގިނަ ފަތުރުވެރިން އަންނަ ތިން ގައުމަކީ:
ރަޝިއާ 
އިޓަލީ
އިނގިރޭސިވިލާތް
ތަފްސީލް - އެ ހިސާބުތަކަށް ބަލާއިރު، މިދިޔަ އަހަރު އެންމެ ގިނަ ފަތުރުވެރިން އައި ޗައިނާ އޮތީ ހަތަރު ވަނައިގަ އެވެ. ޗައިނާގެ ފަހަތުން ލިސްޓުގައި ދެން ހިމެނެނީ ޖަރުމަނެވެ. އިންޑިއާ އޮތީ އޭގެ ފަހަތުން ލިސްޓުގެ ހަ ވަނައިގަ އެވެ.
ޓޫރިޒަމް މިނިސްޓްރީގެ ހިސާބުތަކަށް ބަލާއިރު، މި މަހުގެ 24 ވަނަ ދުވަހުގެ ނިޔަލަށް އަހަރު ތެރޭ ޖުމްލަ 170،709 ފަތުރުވެރިން ވަނީ ރާއްޖެ އައިސްފަ އެވެ. މިއީ މިދިޔަ އަހަރަށް ވުރެ %6.5 އިތުރު އަދެކެވެ. އެގޮތުން:
މިހާރު އެވްރެޖުކޮށް ދުވާލެއްގެ މައްޗަށް 7،113 ފަތުރުވެރިން ރާއްޖެ އާދޭ
ރާއްޖެ އަންނަ ފަތުރުވެރިންގެ %68 ޗުއްޓީ ހޭދަކުރަނީ ރިސޯޓުތަކުގައި
ގެސްޓްހައުސްތަކުގައި ޗުއްޓީ ހޭދަކުރަނީ ޖުމްލަ ފަތުރުވެރިންގެ %26
އަހަރުގެ މިހާތަނަށް އެންމެ ގިނައިން ފަތުރުވެރިން ޒިޔާރަތްކުރި 10 ގައުމު:
ރަޝިއާ - 23،943 ފަތުރުވެރިން
އިިޓަލީ - 18،256 ފަތުރުވެރިން
އިނގިރޭސިވިލާތް - 15،232 ފަތުރުވެރިން
ޗައިނާ - 13،889 ފަތުރުވެރިން
ޖަރުމަނު - 10،632 ފަތުރުވެރިިން
އިންޑިއާ - 6،487 ފަތުރުވެރިން
ފްރާންސް - 5،719 ފަތުރުވެރިން
އެމެރިކާ - 5،036 ފަތުރުވެރިން
ޕޮލެންޑު - 4،610 ފަތުރުވެރިން
އޮސްޓްރޭލިއާ - 3،460 ފަތުރުވެރިން
ފާހަގަކުރެވޭ - މިދިޔަ އަހަރު ނިމުނު އިރު ރާއްޖެ އައީ 2.2 މިލިއަން ފަތުރުވެރިންނެވެ. މިއީ ސަރުކާރުން މިދިޔަ އަހަރަށް ކަނޑައެޅި 2.3 މިލިއަން ފަތުރުވެރިންގެ އަމާޒަށް ވުރެ ލައްކައެއްހާ ފަތުރުވެރިން މަދު އަދަދެކެވެ.
މި އަހަރު ރާއްޖެއިން އަމާޒު ހިފާފައިވަނީ 2.4 މިލިއަން ފަތުރުވެރިން ގެނައުމަށެވެ.