ފުލުހުންގެ ބެލުމުގެ ދަށުގައި ހުއްޓާ ރޭ އަމިއްލައަށް މަރުވާން އުޅުނު ދިވެހި ފިރިހެން މީހާގެ ހާލު ސީރިއަސް ކަމަށާއި އޭނާއަށް ފަރުވާ ދެމުންދަނީ ވެންޓިލޭޓަރުގައި ކަމަށް ހޮސްޕިޓަލުން މިއަދު ބުނެފި އެވެ.
ވީ ކިހިނެއް؟ - ކުޅުދުއްފުށި ޕޮލިސް ކަސްޓޯޑިއަލްގައި ހުއްޓާ އުމުރުން 34 އަހަރުގެ އެ މީހާ އަމިއްލައަށް މަރުވާން އުޅުނީ ރޭ 9:12ހާއިރު އެވެ. އެއާއެކު އޭނާއަށް ކުޅުދުއްފުށި ރީޖަނަލް ހޮސްޕިޓަލުގައި ފަރުވާ ދެމުން އަންނަ ކަމަށް ފުލުހުން ރޭ ބުންޏެވެ.
ތަފްސީލު - ހޮސްޕިޓަލްގެ އޮފިޝަލަކު މިއަދު 'ދައުރު'އަށް ވިދާޅުވީ:
އެމީހާގެ 'ހާލު ވަރަށް ދެރަ'
ފަރުވާ ދެމުންދަނީ ވެންޓިލޭޓަރުގައި؛ އަދިވެސް ހޭނާރާ
ރޭ ފުލުހުން ނެރުނު ބަޔާނުގައި ބުނި ގޮތުގައި މި ހާދިސާއާ ގުޅިގެން އަޅަން ޖެހޭ ފިޔަވަޅުތައް ވަނީ އަޅާފަ އެވެ. އޭގެ އިތުރުން:
ހިއުމަން ރައިޓްސް ކޮމިޝަން (އެޗްއާރުސީއެމް) އާއި ނޭޝަނަލް އިންޓެގްރިޓީ ކޮމިޝަން (އެންއައިސީ)އަށް މި ހާދިސާގެ މައުލޫމާތު ވަނީ ހިއްސާކޮަށްފައި
އަދި މި ހާދިސާގެ ތަހުގީގަށް ފުލުހުންގެ މޭޖާ ކްރައިމް އިންވެސްޓިގޭޝަން ޓީމެއް ކުޅުދުއްފުއްޓަށް ފޮނުވުމަށް ނިންމާފައިވޭ؛ ކަން ހިނގާފައިވާ ގޮތުގެ އެތެރޭގެ ތަހުގީގަށް ފުލުހުންގެ ޕްރޮފެޝަނަލް ސްޓޭންޑާސް ކޮމާންޑުން ހާއްސަ އިސްކަމެއް ދީގެން ކުރިއަށް ގެންދާނެ
ފުލުހުން ބުނި ގޮތުގައި އެ މީހާއަކީ، މަސްތުގެ ހާލަތުގައި ހުރެގެން ގޭގެ މުދަލަށް ގެއްލުންދީ ހަމަނުޖެހުން ހިންގި މައްސަލައަކާ ގުޅިގެން މިދިޔަ ބުދަ ދުވަހު ހައްޔަރު ކުރި މީހެެކެވެ.
ފާހަގަކޮށްލެވޭ ކަމެއް - ޖަލުތަކުގައި ގައިދީން އަމިއްލައަށް މަރުވާ މައްސަލަ ދަނީ އިތުރުވަމުންނެވެ. މިދިޔަ ސެޕްޓެމްބަރު މަހު ދެ ގައިދީއަކު މިގޮތަށް އަމިއްލައަށް މަރުވެފައިވެ އެވެ. އޭރު އިސްލާހީ ފިޔަވަޅުތަށް އެޅި ކަމަށް ކަމާ ބެހޭ އިދާރާތަކުން ބުނެފައިވެ އެވެ. މީގެ އިތުރުން މިދިޔަ ސަރުކާރުގައި ޑިސެމްބަރު 2022ގައި ވެސް ފުލުހުންގެ ބެލުމުގެ ދަށުގައި ހުރި ގައިދީއަކު އަމިއްލައަށް މަރުވާން އުޅެ، ފަރުވާ ދެމުން ދަނިކޮށް މަރުވެފައިވެ އެވެ.