މޯލްޑިވްސް ގޭސްގެ ކުރީގެ އެމްޑީ ގޭސް މާނުގެ އެކައުންޓަށް ރިޝްވަތުގެ ގޮތުގައި 40 ހާސް ޑޮލަރު ކޮންމެ ޝިޕްމެންޓަކާއި އެކު ލަންކާގެ 3ޑީއެޗް ކުންފުނިން ދީފައި ވާކަން އޭސީސީއަށް ސާބިތުވެ، އޭސީސީއިން ވަނީ އެކުންފުނި ބްލެކް-ލިސްޓް ކޮށްފައެވެ. 3ޑީއެޗް ބްލޮކް ކޮށް، ކަޅު ލިސްޓަށް ލައި އެމީހުންނާ އެކު ވިޔަފާރި ނުކުރުމަށް އޭސީސީއިން ވަނީ މޯލްޑިވްސް ގޭސް އަށް އަންގާފައެވެ.
ޕީޕީއެމް ޕީއެންސީ ސަރުކާރެއް އަނެއްކާވެސް އައުމުން، 3ޑީއެޗް ކުންފުނިން ވަނީ މިހާރުގެ އެމްޑީ ބޯފަން އަބްދުﷲ އަށް 40 ހާސް ޑޮލަރުގެ ޑީލް އަނެއްކާވެސް ހުށައަޅާފައެވެ. މިކަން ކުރަމުން ދަނީ މި ސަރުކާރުން ހައްޔަރު ނުކުރާނެ ކަމުގެ ޔަގީން ކަން ދީގެން ރާއްޖެ އައިސްފައިވާ ކުރީގެ މޯލްޑިވްސް ގޭސްގެ އެމްޑީ މާނުގެ ބައިވެރި ވުމާއި އެކުގައެވެ. މާނު އަކީ ރައީސް ޔާމީނުގެ ވެރިކަމުގައި ރާއްޖޭގައި ވައްކަމާއި، ހިޔާނާތާއި، ރިޝްވަތު ދިނުމުގައި ރައްޔިތުންގެ ފައިސާ އަށް އެތައް މިލިއަން ޑޮލަރަކުން ހިޔާނާތްތެރި ވެފައިވާ ކުށްވެރިއެކެވެ. ރައީސް ސޯލިހުގެ ސަރުކާރުގައި އޭނާ އުޅުނީ ރާއްޖެއިން ފިލައިގެން ރާއްޖެއިން ބޭރުގައެވެ. ނަމަވެސް މުއިއްޒު ވެރިކަމަށް އައުމާއި އެކު އޭނާ ވަނީ އެނބުރި ރާއްޖެ އައިސްފައެވެ.
މި 40 ހާސް ޑޮލަރު ހޯދުމުގެ ބޭނުމުގައި ބޯފަން އަބްދުﷲ ވަނީ ގޭސް ފޯރުކޯށް ދިނުމުގެ ގާބިލު ކަން ނެތް ޕޭޕާރ ކުންފުންޏަކަށް ގޭސް ގެނައުމަށް ފުރުޞަތުދީ، ޝިޕްމެންޓަކަށް އޯޑަރު ޖަހާފައެވެ. ޕޭޕަރ ކުންފުންޏެއް ކަމުން، އެމީހުންނަށް 4 މަސްވީ އިރުވެސް ރާއްޖެއަށް ބޭނުންވާ މަދު ގޭސް ކޮޅު ސަޕްލައި ކޮށް ނުދެވުނެވެ.
އެއަށްފަހު، ރާއްޖެއަށް ގޭސް ސަޕްލައި ކުރާނެ އިތުރު ކުންފުންޏެއް ނެތް ކަމަށް ބުނެ، އަދި 3ޑީއެޗް ނޫނީ މިކަން ކޮށްދެވޭނެ ޕާޓިއެއް ނެތް ކަމަށް ބުނެ ބޯފަން އަބްދުﷲ ވަނީ އޭސީސީއަށް ސިޓީ އެއް ފޮނުވާފައެވެ. އަދި އެމީހުންނާއި އެކު އަލުން ވިޔަފާރި ކުރުމަށް ހުއްދަ ދިނުމަށް އޭސީސީގައި އެދުނެވެ.
އޭސީސީ އިން ވަނީ، ކޮރަޕްޝަނުގެ ތެރެއިން ވިޔަފާރި ކުރާ ކުންފުންޏެއްކަމަށް ސާބިތުވެފައިވެ، ބްލެކްލިސްޓް ކުރި 3ޑީއެޗް އިން ގޭސް ސަޕްލައި ކުރުމަށް މޯލްޑިވްސް ގޭސް އަށް މިހާރު ހުއްދަ ދީފައެވެ.
‏ގޭސް އަބްލޯ ވަނީ މިހާރު 3ޑީއެޗަށް 500 މެޓްރިކް ޓަނުގެ ގޭސް ގެނަސްދިއުމަށް އޯޑަރުދީފައެވެ. 40 ހާސް ޑޮލަރު ވަންނާނެއެވެ. މީގެ ތެރެއިން ބޮޑު ބައެއް މަޖިލީސް މެމްބަރުންނަށް ދިނުމަށް މުއިއްޒަށް ހުށައަޅައި މި ކޮރަޕްޝަން މުއިއްޒުގެ ރުހުން ލިބޭނެއެވެ.
މިފަދަ ބޮޑު ވައްކަމެއް ރައްޔިތުންގެ ފައިސާއިން ކުރަން ނިންމި އިރު، މިހާރުވެސް ދައުލަތަށް ޑޮލަރުގެ ދަތިކަން ހުރި ގޮތުން ރާއްޖެއިން ބޭރުން ގޭސް ގެނައުމަށް ވަނީ ދަތިވެފައެވެ. ޤައުމު މިހާލުގައި އޮތް އިރުވެސް، ރާއްޖެއަށް 40،000 ޑޮލަރުގެ ރިޝްވަތެއް ނުލައި ގޭސް ގެނައުމަކަށް ސަރުކާރުން ބޭނުން ނުވެއެވެ.
ނަމަވެސް، ޓެކްސްތައް ބޮޑުކޮށް، ރިސޯޓްތަކުން ބޭންކުގައި ޑޮލަރު ބަހައްޓަން މަޖުބޫރު ކޮށް، ރައްޔިތުން އަތުން ނެގެން އޮތްހާ ފައިސާއެއް ނަގައި ރައްޔިތުން ދަނީ “ފެލަމުން” ނެވެ. ދިވެހި ސަޕްލަޔަރުންނަށާއި، ކޮންޓްރެކްޓަރުންނަށް ކޮށްފައިވާ މަސައްކަތަށް ފައިސާ ނުދީ ދަނީ ބަނގުރޫޓު ކުރަމުންނެވެ. ނަމަވެސް މުއިއްޒަށް ވެރިކަން އެބަ ކުރެވޭތާއެވެ.
އޭސީސީއިން މިކަމަށް ހުއްދަދީފައި ވާއިރު، މިފަދަ ކަމެއް އޭސީސީތެރެއިން ކުރެވޭނީވެސް ރިޝްވަތު ދީގެން ކަމާއި މެދު ޝައްކެއް ނެތެވެ.
މި ސަރުކާރުގެ މަތިން ފެށިގެން އެންމެ ތިރިއާއި ހަމައަށް ވެސް އޮތީ ކޮރަޕްޝަނެވެ. އޮތީ ވައްކަމެވެ. މަޖިލީސް އިންތިހާބަށް ސަރުކާރު ކުންފުންޏެއްގެ އެމްޑީއަކު މުއިއްޒު ބޭނުންވާ ވަރަށް ވަގު ފައިސާ ނުދީގެން “ކަލޭ އަމާ ހަނދާން ކުރަނީ ހޭ” މުއިއްޒު ފޯނުން ގުޅައިގެން ބުނެފައިވެއެވެ.