އެތައް ބައެއްގެ ހައްގުތައް ނިގުޅައިގެންފައިވާ ކަމަށާއި އެއީ ގަބޫލުކުރެވޭނެ ކަމެއް ނޫން ކަމަށް ރާއްޖޭގެ ކުރީގެ ރައީސުލްޖުމްހޫރިއްޔާ މައުމޫން އަބްދުﷲ ގައްޔޫމް ވިދާޅުވެއްޖެ އެވެ.
ރައީސް މައުމޫން މިހެން ވިދާޅުވީ މިއަދު ފާހަގަކުރަމުންދާ ބައިނަލްއަގްވާމީ އިންސާނީ ހައްގުތަކުގެ ދުވަހުގެ މުނާސަބަތުގައި ކުރެއްވި ޓްވީޓެއްގަ އެވެ.
ރައީސް މައުމޫންގެ ޓްވީޓްގައި ވިދާޅުވީ ބައިނަލްއަގްވާމީ އިންސާނީ ހައްގުތަކުގެ ދުވަސް ފާހަގަކުރަމުންދާއިރު އެތައް ބަޔެއްގެ އަސާސީ ހައްގުތައް ނިގުޅައިގަނެފައިވާ ކަމަށާއި އެއީ ބޫލުކުރެވޭނެ ކަމެއް ނޫން ކަމަށެވެ.
ރައީސް މައުމޫން އިތުރަށް ވިދާޅުވީ މުޖުތަމައުގައި ދިރިއުޅޭ ކޮންމެ މީހަކަށް ވެސް ލިބެންޖެހޭ ހައްގުތައް ހަމަހަމަކަމާ އެކު ލިބިގެން ނޫނީ އެއްވެސް ކުރިއެރުމެއް ނުލިބޭނެ ކަމަށެވެ.
އެތައް ބައެއްގެ ހައްގުތައް ނިގުޅައިގެންފައިވާ ކަމަށް ރައީސް މައުމޫން ވިދާޅުވެފައި މިވަނީ އެމަނިކުފާނުގެ ދޮށީ ފިރިހެން ދަރިކަލުން އަދި ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހްމަދު ފާރިސް މައުމޫން މިދިޔަ ޖުލައި މަހުގެ 18 ވަނަ ދުވަހުން ފެށިގެން ބަންދުކޮށްފައި ވަނިކޮށެވެ.
ފާރިސްގެ މައްޗަށް ދެ ދައުވާއެއް އުފުލި ޝަރީއަތް ހިނގަމުންދާއިރު ފާރިސްގެ މައްޗަށް ކުރެވޭ ތުހުމަތުތަކާއި ގުޅިގެންނާއި، ފާރިސްގެ ޝަރީއަތް ކުރިއަށްދާ ގޮތުން ރައީސް މައުމޫންއާއި ގުޅިފައިވާ ޕާޓީ ތަކުގެ އިސް ބޭފުޅުން ގެންދަނީ ތަކުރާރުކޮށް ކަމާ ގުޅުންހުރި ފަރާތްތަކަށް ފާޑު ވިދާޅުވަމުންނެެވެ.