އައިޖީއެމްއެޗުން ހިދުމަތް ހޯދަމުން ދިޔަ މާބަނޑު އަންހެނެއްގެ ގަޔަށް އެޗްއައިވީއަށް ޕޮޒިޓިވް ލޭ އެޅުނު ފަހުންވެސް ހޮސްޕިޓަލްގެ ހިދުމަތް ހޯދާ މީހުންގެ އަދަދަށް އެއްވެސް ބަދަލެއް އައިސްފައި ނުވާ ކަމަށް އައިޖީއެމްއެޗުން ބުނެފި އެވެ.
ވީނިއުސްއަށް މައުލޫމާތު ދެއްވަމުން އައިޖީއެމްއެޗް ހިންގުމާއި ހަވާލުވެ ހުންނެވި އެ ހޮސްޕިޓަލްގެ ޑެޕިއުޓީ ސީއީއޯ މުހައްމަދު ހަބީބު ވިދާޅުވީ ހޮސްޕިޓަލްގެ ހިދުމަތް ހޯދާ މީހުންގެ އަދަދު ދަށްވި ކަމަށް ހޮސްޕިޓަލްގެ ރެކޯޑްތަކުން ނުދައްކާ ކަމަށެވެ. ނަމަވެސް ލޭ އެޅުނު ހާދިސާއަށްފަހު ހޮސްޕިޓަލްގެ ހިދުމަތް ހޯދާ މީހުންގެ އިތުބާރު ވަރަށް ބޮޑަށް ގެއްލިފައިވާ ކަމަށް ގަބޫލުކުރައްވާ ކަމަށް ހަބީބު ވިދާޅުވި އެވެ.
"ހިދުމަތް ހޯދާ މީހުން ވަރަށް ގިނައިން މިހާރު ކުރިން ނުކުރާ ވަރަށް ސުވާލުކޮށް ހަދާނެ. އަދި ކަމެއް ދިމާވެއްޖެނަމަ ތަންކޮޅެއް އަވަހަށް ބައެއް މީހުން ހިތްހަމަނުޖެހޭތަން ފެނޭ. އަޅުގަނޑު ހަމަ ގައިމު ވެސް ގަބޫލުކުރަން މިދިމާވި ހާދިސާއަށްފަހު އެފަދަ ކަންކަން ހިނގާނެކަން. އަޅުގަނޑުމެން މިސައްކަތް ކުރަނީ އެކަން ރަގަޅުކުރަނީ،" ހަބީބު ވިދާޅުވި އެވެ.
އޭނާ ވިދާޅުވީ ލޭ އެޅުނު ހާދިސާއަށްފަހު ހޮސްޕިޓަލަށް އާންމުންގެ އިތުބާރު ހޯދުމަށްޓަކައި ވަރަށް ގިނަ މަސައްކަތްތައް ކުރެވެމުންދާ ކަމަށެވެ. ނަމަވެސް ކުއްލިއަކަށް ހުރިހާ ކަމެއްގެ މައުލޫމާތު އާންމުންނަށް ފޯރުކޮށްދިނުމުގެ ބަދަލުގައި ފަހަރަކު ކަމެއްގެ މައުލޫމާތު އާންމުންނާ ހިއްސާކުރަމުންދާނެ ކަމަށް ވެސް ވިދާޅުވި އެވެ.
ހަބީބު ވިދާޅުވީ ހޮސްޕިޓަލްގެ ތަސައްވުރު ރަނގަޅުކުރުމަށްޓަކައި ސިވިލް ސާވިސް ކޮމިޝަން (ސީއެސްސީ)އާއި ގުޅިގެން ހޮސްޕިޓަލްގެ ޕަބްލިކް ރިލޭޝަން ރަނގަޅުކުރުމަށް ހާއްސަ މަސައްކަތްތަކެއް ކުރިއަށްދާ ކަމަށެވެ. އަދި އެންމެފަހުން ދިމާވި ހާދިސާ ދިމާވެފައިވަނީ ހޮސްޕިޓަލްގެ ލެބޯޓިރީގެ ތެރެއިން ދިމާވި މައްސަލައެއްގެ ސަބަބުން ކަމަށްވާތީ އެތަނުގެ އިންތިޒާމްތައް ވެސް ކުރިއަށް ވުރެ ރަނގަޅުކޮށްފައިވާ ކަމަށް ހަބީބު ވިދާޅުވި އެވެ. އަދި ލެބޯޓްރީއަށް އައިއެސްއޯ ސެޓްފިކެޓް ހޯދުމަށް ކުރަމުންދާ މަސައްކަތަކީ ވެސް އިތުބާރު ބޮޑުކުރުމަށް ކުރެވޭ މަސައްކަތެއް ކަމަށް ހަބީބު ވިދާޅުވި އެވެ.
"ލެބޯޓްރީގެ ކަންކަން ރަނގަޅުކުރުމަށް ބޭނުންވާތީ ހެލްތް މިނިސްޓްރީން ވެސް އެބަހުރި ސީދާ މިކަމަށް ހާއްސަކޮށްފައި ބޭފުޅަކު. އެއީ މިދާއިރާގައި ވަރަށް ގިނަ ދުވަހު މަސައްކަތް ކުރައްވާފައިވާ ހެލްތު މިނިސްޓްރީގެ ޑިރެކްޓާ ޖެނެރަލް ޝަރީފާ މަނިކެ. އަޅުގަނޑު އެބަ ވަރަށް މަސައްކަތް ކުރަން އިތުބާރު ގާއިމްކުރުމަށް. އަޅުގަނޑުމެން ވެސް ގަބޫލުކުރަން މިދިމާވި ހާދިސާއަށްފަހު އިތުބާރު ހޯދުމަކީ ވަރަށް އުދަގޫ ކަމަކަށްވާނެ ކަން. އެހެންނަމަވެސް އަޅުގަނޑުމެން ހިތްވަރެއް ދުލެއް ނުކުރަން،" ހަބީބު ވިދާޅުވި އެވެ.
އައިޖީއެމްއެޗުން ހިދުމަތް ހޯދަމުން ދިޔަ މާބަނޑު އަންހެނެއްގެ ގަޔަށް އެޗްއައިވީއަށް ޕޮޒިޓިވް ލޭ އެޅުނު ފަހުން ހޮސްޕިޓަލުން ހިދުމަތް ހޯދާ ބައެއް މީހުން ހޮސްޕިޓަލްގެ މުވައްޒަފުންނާ ހުތުރުބަހުން މުއާމަލާތް ކުރުމާއި ފުރައްސާކުރުން އާންމުވެފައިވާ ކަމަށް ހޮސްޕިޓަލްގައި މަސައްކަތް ކުރާ މުވައްޒަފުންގެ ފަރާތުން އެނގިފައިވެ އެވެ. ނަމަވެސް ހޮސްޕިޓަލުން މިމައްސަލައިގައި ވާހަކަ ދައްކާކަށް ބޭނުމެއް ނުވެ އެވެ.