ނިއު ރޭޑިއަންޓާއި ވިކްޓަރީ ބައްދަލުކުރާ މެޗުން މާދަމާ ހަވީރު އުރީދޫ ދިވެހި ޕްރިމިއާ ލީގު އަލުން ފަށަން ނިންމައިފި އެވެ.
އޭޝިއަން ކަޕް ކޮލިފައިން ޕްލޭއޮފުގައި ލާއޮސްއާ ދެކޮޅަށް ރާއްޖެ ކުޅުނު މެޗަށް ތައްޔާރުވުމަށް ލީގު މެދުކަނޑާލީ މިދިޔަ މަހު އެވެ.
ލީގުގެ ފަހު ބުރުގެ ކުޅުން މިހާރު ކުރިއަށްދާއިރު، މާދަމާ ހަވީރު ނިއު އާއި ވިކްޓަރީ ކުޅުމަށް ފަހު މާދަމާރޭ ލީގުގެ އެއް ވަނައިގައި އޮތް މާޒިޔާ ބައްދަލުކުރާނީ ވެލެންސިއާއާ އެވެ. ބުރާސްފަތި ދުވަހު ހަވީރު ޔުނައިޓެޑް ވިކްޓަރީ އާއި ބީޖީ ބައްދަލުކުރާއިރު، ބުރާސްފަތި ދުވަހުގެރޭ ޓީސީ ކުޅޭނީ އީގަލްސްއާ އެވެ.
ލީގުގައި ބާކީ ކޮންމެ ޓީމަކަށް ހަ މެޗު އޮތްއިރު، މާޒިޔާ ލީގުގެ އެއް ވަނައިގައި އޮތީ ހަ ޕޮއިންޓުގެ ލީޑަކާ އެކު އެވެ. އެ ޓީމަށް 15 މެޗުން ވަނީ 34 ޕޮއިންޓް ލިބިފަ އެވެ. ދެ ވަނައިގައި އީގަލްސް އޮތީ 15 މެޗުން 28 ޕޮއިންޓް ހޯދައިގެންނެވެ. ތިން ވަނައިގައި އޮތް ޓީސީ އަށް ލިބިފައިވަނީ 27 ޕޮއިންޓެވެ. ހަތަރު ވަނައިގައި ވެލެންސިއާ 20 ޕޮއިންޓާ އެކު އޮތްއިރު، ފަސް ވަަނައިގައި ޔުނައިޓެޑް ވިކްޓަރީ އޮތީ 18 ޕޮއިންޓް ހޯދައިގެންނެވެ.
އެންމެ ފަހުގެ ޗެމްޕިއަން ނިއު އޮތީ 15 މެޗުން 16 ޕޮއިންޓާ އެކު ލީގުގެ ހަ ވަނައިގަ އެވެ. ހަތް ވަނައިގައި އޮތް ވިކްޓަރީ އަށް 10 ޕޮއިންޓް ލިބިފައިވީއިރު، އެންމެ ފުލުގައި އޮތް ބީޖީ އަށް ލިބިފައިވަނީ އަށް ޕޮއިންޓެވެ.
މިދިޔަ އަހަރު ލީގަށް ގެނައި ބަދަލާ އެކު އެންމެ ފުލަށްދާ ޓީމެއް ދެ ވަނަ ޑިވިޝަނަށް ރެލިގޭޓްވާނެ އެވެ. އަދި ޕްރިމިއާ ލީގުގެ ހަތް ވަނައިގައި ނިންމާ ޓީމު ޖެހޭނީ ދެ ވަނަ ޑިވިޝަންގެ ދެ ވަނަ ޓީމާ ޕްލޭއޮފް މެޗުގައި ބައްދަލުކުރާށެވެ.