ޓެކްނޮލޮޖީގެ ދުނިޔޭގައި އެންމެ އުހަށް އެރުމަށް ޗައިނާއިން ކުރަމުންދާ މަސައްކަތުގެ ތެރެއިން، އެ ޤައުމުގެ ސްކޫލްތަކުގައި އުމުރުން ހަ އަހަރުން ފެށިގެން, އާޓިފިޝަލް އިންޓެލިޖެންސް (އޭއައި) ކިޔަވައިދިނުން މަޖުބޫރުކޮށްފިއެވެ. މި ފެށުނު ސެޕްޓެމްބަރު މަހުގެ އެއްވަނަ ދުވަހުން ފެށިގެން ޗައިނާގެ ތަޢުލީމާ ބެހޭ ވުޒާރާއިން ޤައުމީ ފެންވަރުގައި ތަންފީޒުކުރަން ފަށާފައިވާ މި ސިޔާސަތުގެ ދަށުން، ޕްރައިމަރީ އަދި ސެކަންޑަރީ ފެންވަރުގެ ހުރިހާ ދަރިވަރުންނަށް އޭއައިގެ އަސާސްތައް ދަސްކޮށްދިނުމަކީ މިހާރު ލާޒިމުކަމެކެވެ. މިއީ އޭއައިގެ ދާއިރާއިން ދުނިޔޭގެ ސުޕާ ޕަވަރަކަށް ވުމަށް އެ ޤައުމުން ކަނޑައަޅާފައިވާ ސްޓްރެޓެޖިކް އަމާޒަށް ވާސިލުވުމަށް އަޅާފައިވާ އެންމެ މުހިންމު އެއް ފިޔަވަޅެވެ. ކުޑަކުދިންނަށް އޭއައި ކިޔަވައިދެނީ ހަމައެކަނި ތިއަރީއަކަށް ނޫނެވެ. އޭގެ ބަދަލުގައި، މަންހަޖު ފަރުމާކޮށްފައިވަނީ އިންޓަރެކްޓިވް އަދި ޢަމަލީ މަސައްކަތްތަކުގެ މައްޗަށެވެ. ކުދިންނަށް އޭއައިގެ އަސާސީ މައިގަނޑުތައް ކަމަށްވާ ޕެޓާން ދެނެގަތުމާއި، ޑޭޓާ އެނަލިސިސްއާއި، އަދި އަލްގޮރިދަމް މަސައްކަތްކުރާ ގޮތް އޮޅުންފިލުވައިދިނުމަށް ގޭމްތަކާއި، ރޮބޮޓްތަކާއި، އަދި ވިޒުއަލް ޕްރޮގްރާމިން ބޭނުންކުރެއެވެ. މިކަމަށްޓަކައި ޚާއްޞަ ފޮތްތައް ވެސް ވަނީ ތައްޔާރުކޮށްފައެވެ. މިސާލަކަށް، "ފަންޑަމެންޓަލްސް އޮފް އާޓިފިޝަލް އިންޓެލިޖެންސް" ގެ ނަމުގައި ނެރެފައިވާ ފޮތްތަކުގެ ސިލްސިލާގައި، ކާޓޫނު ކެރެކްޓާތަކާއި ވާހަކަތައް ބޭނުންކޮށްގެން އޭއައިގެ އުނދަގޫ ކޮންސެޕްޓްތައް ފަސޭހައިން ދަސްކޮށްދެއެވެ. މި ޕްރޮގްރާމް މުޅި ޤައުމުގައި ތަންފީޒުކުރުމުގެ ކުރިން، ބެއިޖިން، ޝަންހާއީ، އަދި ހަންގްޒޫ ފަދަ ޓެކްނޮލޮޖީގެ ގޮތުން ކުރިއަރާފައިވާ ސިޓީތަކުގައި ނަމޫނާ ޕްރޮގްރާމްތަކެއް ހިންގާފައިވެއެވެ. މި ޕްރޮގްރާމްތަކުގެ ކާމިޔާބީއާއެކު، މިހާރު މި މަސައްކަތް ފުޅާ ދާއިރާއެއްގައި ކުރިއަށް ގެންދަން ވަނީ ފަށާފައެވެ. މިކަމަށްޓަކައި ސަރުކާރުން ބޮޑު ހޭދައެއްކޮށް، ސްކޫލްތަކަށް ބޭނުންވާ ޓެކްނޮލޮޖީ ފޯރުކޮށްދިނުމުގެ އިތުރުން، އޭއައި ކިޔަވައިދިނުމަށް ޤާބިލު މުދައްރިސުން ބިނާކުރުމަށް ޚާއްޞަ ތަމްރީނު ޕްރޮގްރާމްތައް ވެސް ދަނީ ހިންގަމުންނެވެ. ބައެއް ސްކޫލްތަކުގައި އަހަރަކު މަދުވެގެން އަށް ގަޑިއިރުގެ އޭއައި ކިޔެވުން މިހާރު ވެސް ލާޒިމުކޮށްފައިވެއެވެ. ތަޢުލީމީ މަންހަޖަށް މި ގެނައި ބޮޑު ބަދަލަކީ ޗައިނާގެ ދުރު ރާސްތާ ވިސްނުމުގެ ނަތީޖާއެކެވެ. 2017 ވަނަ އަހަރު ޗައިނާއިން ތަޢާރަފްކުރި "ނެކްސްޓް ޖެނެރޭޝަން އާޓިފިޝަލް އިންޓެލިޖެންސް ޑިވެލޮޕްމަންޓް ޕްލޭން" ގައި، 2030 ވަނަ އަހަރު އަންނަންވާއިރަށް އޭއައިގެ ދާއިރާއިން ދުނިޔޭގެ އެންމެ ކުރީގައި އޮތް ޤައުމަށްވުމަށް ވަނީ އަމާޒުހިފައިފައެވެ. މި އަމާޒަށް ވާސިލުވުމަށް އެންމެ މުހިންމު އެއްކަމަކީ، އެ ދާއިރާއަށް ބޭނުންވާ ހުނަރުވެރި، ޤާބިލު އިންސާނީ ވަސީލަތްތައް ބިނާކުރުމެވެ. އެހެންކަމުން، ސްކޫލް ފެންވަރުގައި އޭއައި ތަޢުލީމު ދިނުމަކީ މި ސްޓްރެޓެޖީގެ އެންމެ ވަރުގަދަ އެއް ތަނބެވެ. މި ފިޔަވަޅުގެ ސަބަބުން، އަންނަން އޮތް ޖީލުތަކުގައި ޗައިނާއިން "އޭއައި-ނޭޓިވް" ނުވަތަ އޭއައިއަށް އުފަން ދަރިފަސްކޮޅެއް އުފެދިގެންދާނެއެވެ. މިއީ ކުޑައިރުން ފެށިގެން އޭއައި ޓެކްނޮލޮޖީއާ އެކު އުޅެ، އެއީ އެމީހުންގެ ދިރިއުޅުމުގެ އާންމު ބައެއްގެ ގޮތުގައި ދެކޭނެ ބައެކެވެ. މިކަމުގެ ސަބަބުން، ޗައިނާގެ އީޖާދުކުރުމުގެ ޤާބިލުކަމާއި، އިޤްތިސާދީ ކުރިއެރުމާއި، އަދި ދުނިޔޭގެ ޓެކްނޮލޮޖީގެ މައިދާނުގައި އެ ޤައުމަށް ލިބިފައިވާ މަޤާމު އިތުރަށް ހަރުދަނާވެގެންދާނެކަމަށް ތަޖުރިބާކާރުން ޤަބޫލުކުރެއެވެ.