އިސްލާމީ ގުޅުމުން ރާއްޖެއާއި ސައުދީ ލާމެހިފައި އޮތުމަކީ ރާއްޖެއިން ފަހުރުވެރިވާ އަދި ނުހަނު އަގުކުރާ ކަމެއް ކަމުގައި ރައީސް ވިދާޅުވި އެވެ.
ސައުދީ އަރަބިއްޔާއާއި ދިވެހިރާއްޖޭގެ މެދުގައި އޮތް އިސްލާމީ އުހުއްވަތްތެރިކަމުގެ ވަރުގަދަ ގުޅުމާމެދު ރާއްޖެއިން ފަހުރުވެރިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 
ސައުދީ އަރަބިއްޔާގެ 94 ވަނަ ގައުމީ ދުވަހުގެ މުނާސަބަތުގައި އެކްސްގައި އަރަބި ބަހުން ކުރެއްވި ޕޯސްޓެއްގައި ރައީސްވަނީ ސައުދީ އަރަބިއްޔާގެ ރަސްގެފާނު ޚާދިމުލް ޙަރަމައިނިއް ޝަރީފައިން މަލިކް ސަލްމާން ބިން ޢަބްދުލް ޢަޒީޒް އާލް ސުޢޫދަށާއި އެ ގައުމުގެ ވަލީ ޢަހުދު މުޙައްމަދު ބިން ސަލްމާނަށް ދުވަހުގެ ތަހާނީ އަރިސްކުރައްވައި މަރުހަބާ ވިދާޅުވެފަ އެވެ. 
އިސްލާމީ ގުޅުމުން ރާއްޖެއާއި ސައުދީ ލާމެހިފައި އޮތުމަކީ ރާއްޖެއިން ފަހުރުވެރިވާ އަދި ނުހަނު އަގުކުރާ ކަމެއް ކަމުގައި ރައީސް ވިދާޅުވި އެވެ. އަދި ދެގައުމުގެ ޒަމާންވީ އެކުވެރިކަމާއި އެއްބައިވަންތަަކަމާއި އެކުގައި ކައިރިން ކުރާ މަސައްކަތަކީވެސް ރާއްޖެއިން އަގުވަޒަންކުރާ ކަންކަން ކަމުގައި ރައީސް ފާހަގަކުރެއްވި އެވެ. 
އިތުރަށް ރައީސް ވިދާޅުވީ ދެ ގައުމުގެ ގުޅުންތައް ދެމިގެންދާ ދިއުމުގެ ސަބަބުން ދެ ގައުމުުގެ ރައްްޔިތުންނަށް އިތުރު ކުރިއެރުމާއި ތަނަވަސްކަން ލިބޭނެކަމުގެ އިތުބާރު އެމަނިކުފާނަށް އެބައޮތް ކަމަަށެވެ. 
ޕީޕީއެމްގެ ކުރީގެ ވެރިކަމުގައި ސައުދީ އަރަބިއްޔާއާއެކު ވަރަށް ގާތް ގުޅުމެއް އޮތުމަށްފަހު ފާއިތުވި ފަސް އަހަރު އެމްޑީޕީގެ ވެރިކަމުގައި އެގުޅުން ވަރަށް ބޮޑަށް ހީނަރުވި އެވެ. ނަމަވެސް މިހާރު އެގުޅުން އަނބުރާ އިއާދަކުރެވި ބަދަހިވާންވަނީ ފަށާފަ އެވެ. 
ރާއްޖޭގެ ވަޒީރުންގެ ޓީމުތައް ސައުދީއަށް ޒިޔާރަތްކުރައްވައި އެގައުމުގެ މަތީ ފަންތީގެ މަސްއޫލުވެރިން ރާއްޖެއަށް ޒިޔާރަތްކުރައްވައި ދެ ގައުމުގެ ސަރުކާރުތަކުގެ މެދުގައި މުހިއްމު ގިނަ މައްސަލަތަކެއްގައި މަޝްވަރާކުރެވި ހިޔާލު ބަދަލުކުރެވިފައިވެ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ