އިލެކްޝަންސް ކޮމިޝަނުގެ މެންބަރު އަބްދުލްހަސީބު އިސްމާއިލްގެ އަނބިމީހާ ވެސް، ވެރިކަން ކުރާ ޕީޕަލްސް ނެޝަނަލް ކޮންގްރެސް އަށް ވަގަށް ވައްދައިފި އެވެ.
އޭނާގެ އަނބިމީހާ ޕީއެންސީއަށް ވެއްދީ، އަނބިމީހާގެ ނަމުގައި ވަގު ފޯމެއް ފުރައިގެން ކަމަށް އިދިކޮޅު އެމްޑީޕީއާއެކު ބޭއްވި ބައްދަލުވުމެއްގައި ހަސީބު ވަނީ މިއަދު ވިދާޅުވެފަ އެވެ. އެމްޑީޕީން އިލެކްޝަންސްއާއެކު މިއަދު ބައްދަލުވުމެއް ބޭއްވީ ޕީއެންސީއިން ވަގު ފޯމު ފުރައިގެން އާންމުން އެ ޕާޓީއަށް ވައްދާ މައްސަލައިގަ އެވެ.
"ވަގު ފޯމެއް ފުރައިގެން، ވަގަށް ޕާޓީއަކަށް ވެއްދީމަ ކުރެވޭ އިހުސާސް މިހާރު އެނގޭ ކަމަށް ހަސީބު ވިދާޅުވި،" އެ ބައްދަލުވުމުގައި ބައިވެރިވި މީހަކު މި ނޫހާ ވާހަކަ ދައްކަމުން ބުންޏެވެ.
މި ނޫހުން ޗެކް ކުރިއިރު، ހަސީބުގެ އަނބިމީހާ އަދިވެސް ރަޖިސްޓްރީވެފައި އޮތީ ޕީއެންސީގަ އެވެ. ރަޖިސްޓްރީ ކުރި ތާރީހެއް ކަމަށް އޮންނަނީ ނޮވެމްބަރު، 2024، އެވެ. ހަސީބު އިލެކްޝަންސް ކޮމިޝަނުގެ މެންބަރު ކަމަށް އައްޔަން ކުރީ ޑިސެމްބަރު، 2024، ގަ އެވެ.
އާންމުންގެ ޒާތީ މައުލޫމާތު ވަގަށް ނަގައިގެން، ވަގު ފޯމު ފުރުމަށްފަހު ވެރިކަން ކުރާ ޕާޓީއަށް ވައްދާ މައްސަލަ އޮތީ ވަރަށް ބޮޑުވެފަ އެވެ. އެމްޑީޕީން ބުނަނީ އެ ޕާޓީގެ 3000 މެންބަރުން ޕީއެންސީއަށް ވަގަށް ވައްދާފައިވާ ކަމަށެވެ. ޑިމޮކްރެޓްސްގެ ވަރަށް ގިނަ މެންބަރުން ވެސް ޕީއެންސީއަށް ވަގަށް ވެއްދި ކަމަށް އެ ޕާޓީން ބުނެ އެވެ.
ވަގު ފޯމުގެ މައްސަލަ ތަހުގީގު ކޮށްދިނުމަށް އެމްޑީޕީ އާއި ޑިމޮކްރެޓްސް އިން ވަނީ ފުލުސް އޮފީހަށް ހުށަހަޅައިފަ އެވެ. އަދި އެ މައްސަލަ ތަހުގީގުކޮށްދިނުމުގެ އަމުރެއް ނެރުމަށް އެމްޑީޕީން ވަނީ ޕްރޮސެކިއުޓާ ޖެނެރަލްގެ އޮފީހުގައި ވެސް އެދިފަ އެވެ.
މިދިޔަ އަހަރުގެ ފަހު ތިން މަހު ޕީއެންސީން އޮތީ 39،000 އަށް ވުރެ ގިނަ މީހުން އެ ޕާޓީއަށް ވައްދައިފަ އެވެ. އޭގެ ތެރެއިން ވަރަށް ގިނަ މީހުން ޕާޓީއަށް ވައްދާފައިވަނީ ވަގަށް ކަމަށް ޕީއެންސީގެ ބައެއް އިސް މެންބަރުން ވެސް މި ނޫހާ ވާހަކަ ދައްކަމުން ބުނެފައިވެ އެވެ.
ވަގު ފޯމު ފުރުމުގެ ބައެއް މަސައްކަތް ކުރީ އާންމުންގެ ޒާތީ މައުލޫމާތު ރައްކާތެރި ކުރުމުގެ ޒިންމާ އޮންނަ ޑިޕާޓްމަންޓް އޮފް ނެޝަނަލް ރެޖިސްޓްރޭޝަން ހިންގާ އޮފީހުގަ އެވެ. ސަރުކާރު މުވައްޒަފުން ލައްވައި އެ އޮފީހުގެ ތެރޭގައި ޕީއެންސީއަށް ފޯމު ފުރުވިކަން ޑީއެންއާރުގެ އިސް ވެރިން ވަނީ އެއްބަސްވެފަ އެވެ.