ހދ. ނެއްލައިދޫގައި ސްކޫލް ދަރިވަރެއްގެ ގައިގާ ތަޅައިގަނެ، މާރާމާރީ ހިންގައިފި އެވެ. މާރާމާރީގައި އަނިޔާވެފައިވަނީ ނެއްލައިދޫ ސްކޫލްގެ އޭލެވެލްގައި ތައުލީމް ހާސިލުކުރަމުންދާ އެ އަތޮޅު ކުރިނބީ ދަރިވަރަކަށެވެ.
ކުރިނބީ، ކަށިމާ، އަބްދުﷲ ފަހީމް ގައިގާ ތަޅައިގެންފައިވަނީ އިޝާ ނަމާދަށްފަހު މިސްކިތުން ފައިބައިގެން ގެއަށް ދިޔަ މަގުމަތީގަ އެވެ. ކުރިނބީ ކައުންސިލުގެ މެންބަރަކު އަވަސްއަށް ވިދާޅުވީ، މިރޭ 19 އަހަރުގެ ފަހީމް ގައިގާ ތަޅައިގެންފައިވާއިރު މީގެކުރިން ވެސް އެކި ފަހަރު މަތިން އޭނާއަށް ބަޔަކު އިންޒާރުދީފައިވާ ކަމަށެވެ.
ފުލުހުންގެ މީޑިއާ އޮފިޝަލް ވިދާޅުވީ، ނެއްލައިދޫގައި ހިނގި މާރާމާރީއެއްގެ މައްސަލަ ބަލަން ފަށާފައިވާ ކަމަށެވެ.
ކުރިނބީ ކައުންސިލްގެ މެންބަރު ވިދާޅުވީ، ނެއްލައިދޫއަށް ފަހީމް ކިޔަވަން ދިޔައީ ކުރިނބީގައި އޭލެވެލްއަށް ނުކިޔެވޭތީ ކަމަށެވެ. ފަހީމަށް ހަމަލާދީފައިވަނީ ނެއްލައިދޫ ސްކޫލްގެ ގުރޭޑް 10 އެއްގައި ކިޔަވަމުންދާ ކުއްޖެއް ކަމަށް މައުލޫމާތު ލިބިފައިވާއިރު ފަހީމަށް ލިބިފައިވާ އަނިޔާގެ ތަފްސީލެއް ލިބިފައެއް ނުވެ އެވެ.