ރައްޔިތުންގެ މަޖިލީހަށް މިހާރު ހުށަހަޅާފައި ވާ މަސްތުވާތަކެއްޗާ ބެހޭ ބިލަށް މަރުގެ އަދަދު ދޭ އިސްލާހެއް ހުށަހެޅުމަށް މަޝްވަރާ ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގެންފިއެވެ.
ރައީސްގެ ރަސްމީ އެކްސްގައި ކުރެއްވި ޕޯސްޓެއްގައި ވިދާޅުވީ، މަސްތުވާތަކެތީގެ ވަބާއިން ދިވެހި މުޖްތަމައު ސަލާމަތްކޮށް، މަސްތުވާތަކެތިން ދުރުހެލިވެފައިވާ ޖީލެއް ބިނާކުރުމަކީ މިސަރުކާރުގެ އެންމެ މުހިންމު އެއް އަމާޒުކަމަށެވެ. އެގޮތުން، މަޖިލީހަށް މިހާރު ހުށަހަޅާފައިވާ މަސްތުވާ ތަކެއްޗާބެހޭ ގާނޫނަށް އިސްލާހު ގެނައުމުގެ ބިލްގައި، މަސްތުވާތަކެތި އެތެރެކުރުމުގެ ނުވަތަ ވިޔަފާރިކުރުމުގެ ކުށް ސާބިތުވާ ފަރާތްތަކަށް ދުނިޔޭގެ ބައެއް އެހެން ގައުމު ތަކުގައި ވެސް ކަން ކުރާ ގޮތަށް، މަރުގެ އަދަބު ހިމެނޭހެން ބޮޑެތި އަދަބުތައް ކަނޑައެޅުމަށްޓަކައި އެ ބިލް އިތުރަށް ދިރާސާކުރުމަށް ސަރުކާރުގެ ކަމާގުޅުން ހުރި އިދާރާތަކަށް ދަންނަވާފައިނެކަން ރައީސް ވަނީ ފާހަގަކުރައްވާފައެވެ.
މިހާރު މަޖިލީހަށް ހުށަހަޅާ އޮތް ބިލުގައި މަސްތުވާތަކެތީގެ ކުށްތަކަށް ބޮޑެތި އަދަބުތައް ކަނޑައަޅާފައިވާއިރު މަސްތުވާތަކެތި ބޭނުން ކުރާ ތަނެއް ނަމަ އެކަމުގެ ޒިންމާ އުފުލަން ޖެހޭ މީހުން ދިގު މުއްދަތަކަށް ޖަލަށް ލުމާއެކު 200،000 ރުފިޔާގެ ޖޫރިމަނާއެއް ކުރެވޭގޮތަށް ހުށައަޅާފައިވެއެވެ. އަދި މަސްތުވާތަކެތި ބޭނުންކުރަން ގެންގުޅޭ އާލާތްތަކާއި މަސްތުވާތަކެތި ވަކިތަނެއްގައި ފޯރުކޮށްދީފި ނަމަ 5 އަހަރުގެ ދުވަހުގެ ޖަލު ހުކުމަކާ އެކު 50،000 ރުފިޔާ އާއި 100،000 ރުފިޔާއާ ދެމެދުގެ އަދަދަކުން ޖޫރިމަނާކުރުން ހިމެނާފައިވެއެވެ.
މީގެ އިތުރުން އެއީ އެފަދަ ތަނެއްކަން އެނގި ހުރެ އެތަނަކާ ހަވާލުވެ ހުރި ފަރާތަކުން ނުވަތަ އެވަގުތަކު އެތާނގައި އުޅޭ ފަރާތަކުން އެކަން ހުއްދަކުރުމަކީ ނުވަތަ މަގުފަހިކޮށްދިނުމަކީ ކުށެއް ކަމަށް ކަނޑައަޅައި އެ ކުށަށް 10 އަހަރުގެ ޖަލު ހުކުމަކާއި 100،000 ރުފިޔާ އާއި 200،000 ރުފިޔާއާ ދެމެދުގެ އަދަދަކުން ޖޫރިމަނާކުރުން ވެސް ހިމަނާފައިވެއެވެ.