ގާނޫނު އަސާސީ އާއި ގާނޫނުތަކާ ހިލާފަށް ސިފައިން ހައްޔަރުކޮށްގެން ކ. ގިރިފުށީގައި ގެންގުޅޭ ކްރިމިނަލް ކޯޓުގެ އިސް ގާޒީ އަބްދުﷲ މުހަންމަދު ހައި ކޯޓަށް ހާޒިރުކުރުމަށް އަނެއްކާވެސް އެމްއެންޑީއެފަށް އަމުރުކޮށްފި އެވެ. ހައި ކޯޓުން ވާހަކަ ދެއްކެވި އޮފިޝަލަކު ވިދާޅުވި ގޮތުގައި މިއަދު ހަވީރު 30: 4 އަށް އަބްދުﷲ ގާޒީ ހާޒިރުކޮށްދިނުމަށް އަންގައި އެމްއެންޑީއެފަށް ޗިޓް ފޮނުވާފައިވާ ކަމަށެވެ. އޭނާ ހައި ކޯޓަށް ހާޒިރުކުރަން ދެވަނަ ފަހަރަށް މި އެންގީ ޖުޑީޝަލް ސާވިސް ކޮމިޝަން (ޖޭއެސްސީ) އިން ހުށަހަޅާފައިވާ މައްސަލަ ކުރިއަށް ގެންދިއުމަށެވެ. އަބްދުﷲ ގާޒީގެ މައްޗަށް ސުލޫކީ މައްސަލައެއް ސާބިތުވާ ކަމަށް ޖޭއެސްސީން ނިންމުމާ ގުޅިގެން، އެ ނިންމުމުގެ މައްސަލަ އޭނާގެ ފަރާތުން ސިވިލް ކޯޓަށް ހުށަހެޅުމުން، ގާޒީއާ މެދު ފިޔަވަޅު އެޅުން މަޑުޖައްސާލުމަށް ކުރި އަމުރު ޖޭއެސްސީން ވަނީ އިސްތިއުނާފްކޮށްފަ އެވެ. މި މައްސަލައިގެ ޝަރީއަތް މިދިޔަ ބުރާސްފަތިދުވަހު ކުރިއަށް ގެންދިއުމަށްޓަކައި އަބްދުﷲ ގާޒީ ހާޒިރުކުރުމަށް ހައި ކޯޓުން ކުރި އަމުރަށް ވެސް އެމްއެންޑީއެފުން ވަނީ ނުކިޔަމަންތެރިވެފަ އެވެ. އެ ދުވަހުގެ އަޑު އެހުމުގެ ރިޔާސަތުގައި އިންނެވި ފަނޑިޔާރު ޑރ. އަޒްމިރާލްދާ ޒާހިރު ވިދާޅުވެފައި ވަނީ އަބްދުﷲ ގާޒީގެ ބަދަލުގައި އޭނާގެ ފަރާތުން މީހަކު ހަމަޖައްސާފައި ވެސް ނުވާ ކަމަށެވެ. އެހެންވެ އެ އަޑުއެހުން ކުރިއަށް ނުގެންދެވޭނެ ކަމަށް ފަނޑިޔާރު ވިދާޅުވި އެވެ. ރައީސް އޮފީހުގެ ޕްރެސް ސެކްރެޓަރީ މުހަންމަދު ޒުހައިރު ރޭ ވިދާޅުވީ، އަބްދުﷲ ގާޒީއަށް ދިފާއުވުމުގެ ހުރިހާ ފުރުސަތެއް ވެސް ލިބޭނެ ކަމަށެވެ. "އަޅުގަނޑު މި ދަންނަވަނީ އޭނަ ދިފާއުވުމަށް ހުރިހާ ފުރުސަތެއް ވެސް ލިބޭނެއޭ. ދިފާއުވުމަށް ހުރިހާ ފުރުސަތެއް ލިބުމުގެ އިތުރަށް އޭނާގެ މައްޗަށް ކުރެވޭ، ދައުލަތުގެ މުދަލާއި ރައްޔިތުންނަށް ލިބިފައިވާ ގެއްލުމުގެ މައްޗަށް ގާނޫނުގެ ފުރިހަމަ ބާރާއި ގާނޫނުގެ ދިގު އަތް އޭނާގެ މައްޗަށް ވެސް ފޯރާނެއޭ. އެ މަނިކުފާނު [ކޯޓަށް] ހާޒިރުކުރަން ނިންމަވާއިރު ގައުމީ ސަލާމަތަށާއި ރައްޔިތުންގެ މުދަލަށާއި ކަންތައްތަކަށް ގެއްލުން ނުވާނެ ގޮތުގެ ބީދައިން އެކަންކަން ސަރުކާރުން ކުރައްވާނެއޭ. އޭނާއާ މެދު ކުރެވޭ ތުހުމަތުތަކުން ބަރީއަވުމުގެ ފުރިހަމަ ފުރުސަތު ލިބިގެންދާނެއޭ،" ޕްރެސް ސެކްރެޓަރީ ވިދާޅުވި އެވެ.