އިލެކްޝަންސް ކޮމިޝަންގެ ލީގަލް ޑިޕާޓްމަންޓުގެ ޑިރެކްޓަރު ހަނީފާ ހާލިދު މިއަދުން ފެށިގެން 10 ދުވަހަށް ސަސްޕެންޑްކުރީ ދިއްގަރު ދާއިރާގެ ބައި އިލެކްޝަނާ ގުޅޭ މައްސަލައަކާ ގުޅިގެން ކަމަށް "ހަވީރަ"ށް އެނގިއްޖެ އެވެ. މީގެ ކުރިން 2013 ގެ ރިޔާސީ އިންތިހާބުގެ ތެރޭގައި ވެސް އޭނާއާ ގުޅޭ ގޮތުން ހުށަހެޅި ޝަކުވާތަަކަކާ ގުޅިގެން ސަސްޕެންޑްކުރި އެެވެ. އިލެކްޝަންސް ކޮމިޝަނުގެ އޮފިޝަލަކު މިއަދު ވިދާޅުވީ ހަނީފާ ސަސްޕެންޑްކުރީ އޭނާއާ ގުޅޭ ގޮތުން ހުށަހެޅި ޝަކުވާތަކެއް ބަލަމުން އަންނާތީ ކަމަށެވެ. އެކަމަކު ތަފްސީލެއް ނުދެއްވަ އެވެ. "ހަވީރަ"ށް އެނގިފައިވާ ގޮތުގައި ހަނީފާ ސަސްޕެންޑްކުރީ ދިއްގަރު ދާއިރާގެ އިންތިހާބާ ގުޅޭ ގޮތުން ހުށަހެޅި ޝަކުވާތަކެއް ނުބެލުމާއި މަަސައްކަތަށް އޭނާ ފަރުވާކުޑަކުރި ކަމަށް ބުނެ ހުށަހެޅި މައްސަލައަކާ ގުޅިގެންނެވެ. ދިއްގަރު ދާއިރާގެ ބައި އިލެކްޝަންގައި ކޮމްޕްލެއިންސް ބިއުރޯ ހިންގެވުމާ ހަވާލުވެ ހުންނެވީ ހަނީފާ އެވެ. ރިޔާސީ އިންތިހާބުގެ ތެރޭގައި ޕީޕީއެމާއި ޖުމްހޫރީ ޕާޓީން ވެސް ހަނީފާގެ ޝަކުވާ އިލެކްޝަންސް ކޮމިޝަނަށް ހުށަހެޅި އެވެ. ހަނީފާއާ ގުޅޭ ގޮތުން އެ ދެ ޕާޓީން ޝަކުވާ ހުށަހެޅީ އޭނާ އަކީ ރައްޔިތުންގެ މަޖިލީހުގެ އުނގޫފާރު ދާއިރާ އަށް އެމްޑީޕީން ވާދަކުރެއްވި ޑރ. އަހްމަދު އަޝްރަފްގެ އަނބިކަނބަލުންނަށް ވުމުގެ އިތުރުން އޭނާ ސިޔާސީ ޓްވީޓްތައް ކުރައްވަމުން ގެންދަވާ ކަމަށް ބުނެ އެވެ. ދެ ޕާޓީން ހުށަހެޅީ ކުރީގެ ރައީސް މައުމޫން އަބްދުލްގައްޔޫމަށް ފާޑުވިދާޅުވެ ހަނީފާ ކުރެއްވި ޓުވީޓްތަކެއްގެ މައްސަލަ އެވެ. ހަނީފާއާ ގުޅޭ ގޮތުން ފުލުހުން ހުށަހެޅި މައްސަލައެއް އެޓާނީ ޖެނެރަލްގެ އޮފީހުން ވެސް ބެލި އެވެ. ހަނީފާގެ ސުލޫކީ މައްސަލައެއް އޭޖީ އޮފީހަށް ފުލުހުން ފޮނުވީ 2013 ވަނަ އަހަރު ރިލެކްސް އިން ހޮޓަލުގެ ތިޖޫރީ ފަޅާލައި 122،000 ޑޮލަރު ނެގި މައްސަލާގައި ހައްޔަރުކޮށްފައިވާ މީހާގެ ގާނޫނީ ވަކީލެއްގެ ހައިސިއްޔަތުން ފުލުހުންގެ އިދާރާ އަށް ހާޒިރުވެ، ފުލުހުންނާ ބޭއަދަބީކޮށް މުއާމަލާތް ކުރުމާ ގުޅިގެންނެވެ. ރިލެކްސް އިންގެ ތިޖޫރީ ފަޅާލައި ޑޮލަރު ނެގީ ފުލުހުން ކަމަށް ތުހުމަތުކޮށް އަތޮޅު ވެހީގައި ހަނީފާ "މަނީ މަނީ" ގޮވައި ހެދި ކަމަށް ވެ އެވެ.