ވީމީޑިޔާގެ ވީޓީވީ ސުކޫލް އައިކަން 2013 ގެ ލަވަ މުބާރާތް 153 ދަރިވަރުންގެ ހުށަހެޅުމާއިއެކު މިރޭ ނިންމާލައިފިއެވެ.
އިއްޔެ ހަވީރު ފެށި މިމުބާރާތުގައި ނުވަ ސްކޫލަކުން ވަނީ ބައިވެރިވެފައެވެ. އަދި އަމިއްލަ ގޮތުން ދެދަރިވަރުން ވާދަކޮށްފައިވެއެވެ.
މިއަހަރުގެ ސްކޫލް އައިކަންގައި ވާދަކުރި ސުކޫލްތަކަކީ، އަހުމަދިއްޔާ ސުކޫލް، މާފަންނު މަދަރުސާ، ގަލޮޅު މަދަރުސާ، އިސްކަންދަރު ސުކޫލް، ޖަމާލުއްދީން ސުކޫލް، ވިލާ އިންޓާނެޝަނަލް ހައި ސުކޫލް، ބިލަބޮން ހައި އިންޓަނޭޝަނަލް ސްކޫލްގެ އިތުރުން ޝައިޚް ޢަބްދުއްރަޙްމާން ޕްރީ ސްކޫލް އެވެ.
މިމުބާރާތުގެ ނަތީޖާ އިއުލާން ކުރުމަށް ހަމަޖެހިފައިވަނީ އަންނަ އޭޕްރީލް މަހުގެ 3 ވަނަ ދުވަހުއެވެ.
ވީޓީވީން ސްކޫލް އައިކަން ލަވަ މުބާރާތް މެދުނުކެނޑި ކުރިއަށް ގެންދާތާ ތިން އަހަރު ވެފައިވާއިރު، މިމުބާރާތަކީ ސްކޫލް ކުދިންގެ މެދުގައި ފަންނީ ހުނަރުވެރިކަން އާލާކޮށް ލަވަކިޔުމުގެ ރޮނގުން ކުރިއަށްދާން ބޭނުންވާ ކުދިންނަށް އެފުރުސަތު ތަނަވަސް ކޮށްދިނުމުގެ މަގުސަދުގައި ވީޓީވީން ބާއްވަމުން އަންނަ ލަވަ މުބާރާތެކެވެ.
މިއަހަރު މުބާރާތުގެ ފަނޑިޔާރުންނަކީ މާއިން ރަޝީދާއި، އަލިމަނިކު (ދާރީ) އާއި އުމަރު ޒާހިރު އާއި އާދަމް ނަސީރުގެ އިތުރުން މުހައްމަދު އަބްދުލް ޣަނީ (ތޭރަވާ) އެވެ.