ޖުމެއިރާ ރިސޯޓުގައި ބޭއްވި ޖޭވީއެމް ބޮލި ކަޕުގެ ރަނަރަޕް ކަން ހޯދި އަދާރަން ޕްރެސްޓީޖް ވާދޫ ރިސޯޓުގެ ފުޓްސަލް ޓީމަށް ލިބުނު ފައިސާ ތެލަސީމިއާ ފަންޑަށް ހަދިޔާކޮށްފިއެވެ.
މޯލްޑިވްސް ބްލަޑް ސާވިސް އާއި ހެލްތް މިނިސްޓްރީ އާއި ވާދޫ ރިސޯޓު ގުޅިގެން އެ ރިސޯޓުގައި ކުރިޔަށްގެންދާ ލޭ ހަދިޔާކުރުމުގެ ޕްރޮގްރާމް ފެށުމުގެ ކުރިން ވާދޫ ޓިމަށް ފައިސާގެ ގޮތުގައި ލިބުނު 7500 ( ހަތްހާސް ފައްސަތޭކަ ރުފިޔާ) ވަނީ ހަވާލުކޮށްފައެވެ. މި ލޭ ހަދިޔާކުރުމުގެ ޕްރޮގްރާމުގައި އެ ރިސޯޓުގެ 40 އަކަށް މުވައްޒަފުން ވަނީ ބައިވެރިވެފައެވެ.
ވާދޫ ފުޓްސަލް ޓީމުގެ ވައިސް ކެޕްޓަން އިބްރާހިމް ހުސެއިން ބުނީ ފައިސާ ހަދިޔާކުރުމަށް ނިންމީ އިޖްތިމާއީ ޒިންމާއެއްގެ ގޮތުގައި ދެކިގެން ކަމަށެވެ. އަދި ކައިރި އެހެން ރިސޯޓުތަކާއި ވާދަކޮށް ލިބުނު ކާމިޔާބީއަކީ ބޮޑު ކާމިޔާބީއެއް ކަމަށާއި ލިބުނު ކުޑަ ވަގުތުކޮޅެއްގެ ތެރޭގައި ވޮލީ ކޯޓެއްގައި ފަރިތަކުރުމަށްފަހު ވަރުގަދަ ރިސޯޓުތަށް ފަހަތަށް ޖައްސާލުމަށްފަހު މި ހޯދި ކާމިޔާބިއަކީ އެންމެ ގުޅިގެން ކުރި މަސައްކަތުގެ ނަތިީޖާ ކަމަށށެވެ. އަދި ރިސޯޓުގެ އެޗްއާރުން މުބާރާތުގައި ވާދަކުރުމަށް ނިންމާ އެ ރިސޯޓުގެ ޓީމަށް ދިން އެހީތެރިކަމަށް ޝުކުރުއަދާކުރާ ކަމަށްވެސް އިބްރާހިމް ބުންޏެވެ.
ވީ ސްޕޯޓްސްއާއި ވާހަކަފުޅު ދައްކަވަމުން ވާދޫ ރިސޯޓުގެ އެޗްއާރު މެނޭޖަރ އަހުމަދު މައުޝޫގު ވިދާޅުވީ މިފަދަ ހަރަކާތްތަކުން ވެސް ދޭހަވެގެންދަނީ އެ ރިސޯޓުގެ މުވައްޒަފުން މިފަދަ އިޖުތިމާއި ކަންކަމަށް ބަހައްޓާ ޝާއުގުވެރިކަން ކަމަށާއި އެ ރިސޯޓާއި ގުޅިގެން މިފަދަ އިޖްތިމާއީ ހަރަކާތްތައް ބާއްވަން ބޭނުންވާ ފަރާތްތަކަށް އެ ފުރުސަތު ހުޅުވިފައިވާ ކަމަށެވެ.