ރ. އިންނަމާދޫ ޓެކްނިކަލް ވޮކޭޝަނަލް އެޑިޔުކޭޝަން އެންޑް ޓްރެއިނިންގ (ޓިވެޓް) ސެންޓަރާއި ރ. ހުޅުދުއްފާރުގައި ދަރިވަރުންގެ އެކަމަޑޭޝަން ފެސިލިޓީ އަޅަން އިއްޔެ ކޮންޓްރެކްޓަރުންނާއެކު ސޮއިކޮށްފި އެވެ.އިންނަމާދޫގައި ގާއިމްކުރާ ޓިވެޓް ސެންޓަރު ތަރައްޤީކުރުމަށް ހަވާލުކޮށްފައިވަނީ ސެންޓަރލައިން ކުންފުންޏާއެވެ. ހުޅުދުއްފާރުގައި އެކޮމަޑޭޝަން ފެސިލިޓީ ތަރައްޤީކުރުމުގެ މަސައްކަތް ހަވާލުކޮށްފައިވަނީ އެމްޓީސީސީ އާއެވެ. މި ރަސްމިއްޔާތުގައި ހަޔާއެޑިއުކޭޝަން މިނިސްޓަރު ޑރ.އަލީ ހައިދަރު އަހުމަދު ވިދާޅުވީ، މި މަޝްރޫއުތަކުގެ މައިގަނޑު ބޭނުމަކީ ރަށުގައި ތިބެގެން ފެންވަރު ރަނގަޅު ތައުލީމު ހޯދުމުގެ ފުރުސަތު ރައްޔިތުންނާ ވީހާވެސް ގާތުން ފޯރުކޮށްދިނުން ކަމަށެވެ. އަދި މި މަޝްރޫއުތަކުގެ ސަބަބުން މަސައްކަތްތެރިކަމުގެ ބާޒާރަށް ބޭނުންވާ ފަންނީ އަދި ހުނަރުވެރި ދިވެހި ޒުވާނުން އުފެއްދުމަށް ބޮޑު ބާރަކަށް ވެގެންދާނެ ކަމަށްވެސް ވިދާޅުވި އެވެ.އަދި ސަރުކާރުގެ އަމާޒަކީ ދިވެހި ކޮންމެ ކުއްޖަކަށްވެސް، އެކުއްޖަކު ހުރި ރަށަކުން ނުވަތަ ކައިރި ރަށަކުން މަތީ ތައުލީމުގެ ފުރުސަތު ހޯދައިދިނުން ކަަމަށްވެސް ވިދާޅުވި އެވެ.ރ. އަތޮޅުގައި މިހާރުވެސް ތަޢުލީމީ ދާއިރާގެ ބޮޑެތި މަޝްރޫޢުތަކެއް ދަނީ ހިނގަމުންނެވެ. އެގޮތުން އަލިފުށީގައި ޓިވެޓް ސެންޓަރެއް ތަރައްޤީކޮށްފައިވާއިރު، ދުވާފަރުގައި ދަރިވަރުން ތިބޭނެ ދަނާލެއް އެޅުމުގެ މަސައްކަތް މިހާރުވެސް ކުރިއަށްދާކަން ފާހަގަކޮށްލެވެ އެވެ.