'ބިންވެރިޔާ' ސްކީމުގެ ދަށުން އެހެން ފަރާތަކާ ގުޅިގެން ފޯމު ހުށަހަޅައިގެން ގޯތި ލިބުނު މީހުންގެ ތެރެއިން އެ ފޯމުގައި ގުޅިފައިވާ ހުރިހާ އެންމެން އެ ގޯތި އެއްކޮށް ދޫކޮށްލަން އެއްބަސްވާ ނަމަ، ގޯތި ލިބުނު ކޮންމެ މީހަކަށް ވަކި ގޯއްޗެއް ލިބޭ އުސޫލު އާންމުކޮށްފި އެވެ.
ވީ ކިހިނެއް؟ - 2022 ވަނަ އަހަރު ހުޅުވާލި 'ބިންވެރިޔާ' ސްކީމުގެ ދަށުން ގޯތި ލިބުނު މީހުންގެ ތެރެއިން ގުޅިގެން ފޯމު ހުށަހަޅައިގެން ގޯތި ލިބިފައިވާ ނަމަ، ގުޅިފައިވާ ހުރިހާ އެންމެން އެ ގޯތި އެއްކޮށް ދޫކޮށްލަން އެއްބަސްވާ ނަމަ، އޭގެ ތެރެއިން ގޯތި ލިބުނު ކޮންމެ މީހަކަށް ވަކި ގޯއްޗެއް ލިބޭ ގޮތަށް ވަކި ކެޓަގަރީއަކަށް ބޯހިޔާވަހިކަމަށް ކުރިމަތިލުމަށް ހުޅުވާލާނެކަން ރައީސް މުހައްމަދު މުއިއްޒު އިއުލާނުކުރެއްވީ މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުންނެވެ.
ތަފްސީލް - ހައުސިން މިނިސްޓްރީން މިއަދު ވަނީ އެފަދަ މީހުންނަށް އަލުން ގޯއްޗަށް ކުރިމަތިލުމުގެ ފުރުސަތު ފަހިކޮށްދިނުމަށް 'ބިންވެރިޔާ ހާއްސަ ސްކީމާ ގުޅޭ އުސޫލު' ގެޒެޓުކޮށްފަ އެވެ.
މި އުސޫލު އެކުލަވާލާފައިވަނީ، އެ މިނިސްޓްރީން ބުނި ގޮތުގައި، ބިންވެރިޔާ ސްކީމުގެ ދަށުން މާލެ ސަރަހައްދުން ބަންޑާރަ ގޯތި ދޫކުރުމުގެ އުސޫލުގެ ދަށުން ޖޮއިންޓް އެޕްލިކޭޝަން ހުށަހަޅައިގެން ގޯތި ލިބިފައިވާ މީހުންގެ ތެރެއިން އެ ގޯތި ދޫކޮށްލުމަށް އެއްބަސްވެ ވަކިން ގޯއްޗަށް އެދި ހުށަހެޅުމާ ގުޅޭކަންތައް ބަޔާންކުރުމަށެވެ. އެގޮތުން:
މި އުސޫލުގެ ދަށުން ގޯތި ދޫކުރާނީ ރަސްމާލެއިން
ގޯތީގެ ބޮޑުމިނަކީ 1،250 އަކަފޫޓު
މި އުސޫލުގެ ދަށުން ގޯއްޗަށް ޝަރުތުހަމަވާނީ ބިންވެރިޔާ ސްކީމުގެ ދަށުން މާލެ ސަރަހައްދުން ގޯތި ލިބުމުގެ ޝަތުރުތައް ހަމަވެ، ޖޮއިންޓް އެޕްލިކޭޝަނުގައި ގޯތި ލިބޭނެ ކަމަށް ކަނޑައަޅާފައިވާ މީހުންނަށެވެ. އަދި އެ ގޯތި ލިބުނު އެންމެން އެ ގޯތި ދޫކޮށްލުމަށް އެއްބަސްވުމަކީ ވެސް ޝަރުތެއް ކަމަށް އުސޫލުގައިވެ އެވެ.
މީގެ އިތުރުން، ސަރުކާރުން ކުރިއަށް ގެންގޮސްފައިވާ އަސާސީ ބޯހިޔާވަހިކަމުގެ ސްކީމެއްގެ ދަށުން ފްލެޓު ލިބިފައިވާ މީހުންގެ ތެރެއިން ބިންވެރިޔާ ސްކީމުގެ ދަށުން ގޯއްޗަށް ކުރިމަތިލުމަށް ޝަރުތު ހަމަނުވި މީހުންނަށް ވެސް އާ އުސޫލުގެ ދަށުން ގޯއްޗަށް ކުރިމަތިލެވޭނެ އެވެ. އަދި ބިންވެރިޔާ ސްކީމުން ގޯތި ބިފައިވާ މީހުންގެ ތެރެއިން އެ ގޯތި ހަވާލުކޮށްފައިވާ އަދި ސަރުކާރުން ހިންގާފައިވާ އަސާސީ ބޯހިޔާވަހިކަމުގެ ސްކީމަކުން އެ މީހަކަށް ލިބިފައިވާ ފުލެޓު ދޫކޮށްލާނެ ކަމަށް އެއްބަސްވާ މީހުންނަށް ވެސް އާ އުސޫލުގެ ދަށުން ގޯއްޗަށް ކުރިމަތިލެވޭނެ ކަމަށް އުސޫލުގައިވެ އެވެ.
މި އުސޫލުގެ ދަށުން ގޯތީގެ އެލޮކޭޝަން ހެދުމުގައި އަމަލުކުރާނެ އުސޫލު ކަނޑައަޅާނީ، ޝަރުތު ހަމަވާ މީހުންގެ އަދަދަށާއި ދޫކުރާ  ގޯތީގެ އަދަދަށް ބަލާ ހައުސިން  މިނިސްޓްރީން ކަމަށް އުސޫލުގައިވެ އެވެ.
މި އުސޫލުގެ ދަށުން ގޯއްޗަށް އެދެން ހުޅުވާލުމުން އެޕްލިކޭޝަން ހުށަހެޅޭނެ އެވެ. އެޕްލިކޭޝަން ހުށަހަޅަން ޖެހެނީ އެކަމަށް ހާއްސަކޮށް ހައުސިން މިނިސްޓްރީން ކަނޑައަޅާ ޕޯޓަލްއަކުންނެވެ.
ފާހަގަ ކުރެވޭ - އަނބިމީހާ ނުވަތަ ފިރިމީހާގެ ނަމުގައި ބޯހިޔާވަހިކަން އޮތް ނަމަވެސް، ބޯހިޔާވަހިކަމަށް ކުރިމަތިލެވޭ ގޮތަށް ހުޅުވާލަން ނިންމާފައިވާ ކަމަށް ވެސް ރައީސް ވަނީ ރިޔާސީ ބަޔާނުގައި ވިދާޅުވެފަ އެވެ. އެއީ ގޯތިގެދޮރުގެ ތަނަވަސްކަން ހުރިހާ ރައްޔިތުންނަށް ފަހިކޮށްދިނުމަށް ނިންމެވި ނިންމެވުމެއް ކަމަށް ވެސް ރައީސް ވިދާޅުވި އެވެ.