މާލޭގައި ހަނި ގޯޅިތަކުގައި ކުދިކޮދި ތަންކޮޅުތަކުގައި ދިރިއުޅެން ޖެހިފައިވާ މީހުން އެ ހާލަތުން ނެރުމަށް ސަރުކާރުން މަސައްކަތް ކުރާނެ ކަމަށް ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު މިއަދު ވިދާޅުވެއްޖެ އެވެ.
ވީ ކިހިނެއް ؟ - މިއަދު ރައީސް އޮފީހުުގައި ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު މުއްތޮލިބު ވިދާޅުވީ މާލޭގެ ގެތަކަށް ރައީސް މުހައްމަދު މުއިއްޒު ކުރައްވާ ޒިޔާރަތްތަކުގައި އެންމެ ބޮޑަށް ފާހަގަވާ އެއް ކަމަކީ މާލެއަށް ނިސްބަތްވާ އާއިލާތަކުގެ ތެރެއިން އެކި ސަބަބުތަކާހުރެ ގޯތި ނުހެދި، އެ ގޯތި ބައިބައިކޮށް ކުދި ތަންކޮޅުތަކުގައި ދިރިއުޅޭ ދަތި ހާލު ކަމަށެވެ.
ތަފްސީލް - މި އާއިލާތަކަކީ، މިނިސްޓަރު ވިދާޅުވި ގޮތުގައި، މާލޭގައި އޮތް ބިމުގެ ދަތިކަމާ ހުރެ އިތުރު ހައްލެއް ނުލިބި، އެ ދަތިތަކުގައި އުޅެންޖެހިފައިވާ އާއިލާތަކެއް ކަމަށް މުއްތޮލިބު ވިދާޅުވި އެވެ.
"އަދި މިހާރު ސަރުކާރުން އުސޫލުތައް ކަނޑައަޅައިގެން ހިންގާ ޕްރޮގްރާމުތަކުގެ ތެރެއިން ބޯހިޔާވަހިކަމުގެ ފުރުސަތު ނުލިބި ހުރި އާއިލާތަކެއް. އެކަކަށް ވަދެވޭ ވަރުގެ ކުދި ހަނި ގޯޅިތައް ވެސް އެބަހުރި. އެކަމަށް އަރިއަކަށް ހުރެގެން ވަންނަން ޖެހޭ ހަނި ގޯޅިތައް ވެސް އަޅުގަނޑުމެންނަށް ފެނިފައި އެބަހުރި. އެއްވެސް ކަހަލަ ވެންޓިލޭޝަނެއް ނެތް، އިންސާނުންނަށް އެކަށީގެންވާ ގޮތަށް ދިރިނޫޅެވޭނެ ތަންތަން ވެސް އެބަހުރި،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ސަރުކާރުގެ މިހާރުގެ ވިސްނުމަކީ މިފަދަ ތަންތަން ދެނެގަނެ، އެ ތަންތަނުގައި އުޅޭ މީހުންގެ ހާލަތު މިހާރަށް ވުރެ ރަނގަޅު ކުރެވޭނެ ގޮތަކަށް ކަންތައްތައް ރޭވުން ކަމަށެވެ.
"ވަކި އުސޫލެއްގެ ދަށުން އެޕްލައި ކުރުމުގެ ބަދަލުގައި އެތަންތަން ފާހަގަކޮށް، އެގޮތަށް ނިކަމެތިކޮށް ހުރި އާއިލާތައް ޑޮކިޔުމެންޓު ކޮށްގެން އެ އާއިލާތައް ތިބި ހާލަތުން ނެރުން،" މުއްތޮލިބު ވިދާޅުވި އެވެ.
މިނިސްޓަރު ވިދާޅުވީ އެ މީހުން ތިބި ހާލަތަށް ވުރެ ރަނގަޅު ތަނަކަށް ބަދަލުވެވޭނެ ގޮތެއް ސަރުކާރުން ހަމަޖައްސައިދޭން ޖެހޭ ކަމަށެވެ.
"އެއީ ސަރުކާރުން މިހާތަނަށް އެތައް ޕްރޮގްރާމެއް ހިންގާފައި ހުރި އިރު އެ އާއިލާތަކަށް ނެތް ހަގީގަތުގައި އެ ހުރި ދަތިކަމުގެ، ނިކަމެތިކަމުގެ ތެރެއިން ނިކުމެވޭނެ އެއްވެސް މަގެއް ފަހިކުރެވިފައި. އެހެންވީމާ ސަރުކާރުން ސެލެކްޓިވްކޮށް، އެ މީހުންނަށް އިންޓަވެންޝަންތަކެއް ހަދައިގެން ނޫނިއްޔާ ހައްލު ނުކުރެވޭނެ ފަދަ މައްސަލަތަކެއް ކަމަށް ފާހަގަ ކުރެވެނީ،" އޭނާ ވިދާޅުވި އެވެ.
މުއްތޮލިބު ވިދާޅުވީ އެކަމަށްޓަކާ ޕޮލިސީއަށް ގެންނަން ޖެހޭ ބަދަލުތައް ގެނެސްގެން މަސައްކަތްތަކެއް ކުރަމުން އަންނަ ކަމަށެވެ.