އިތުރު ކްރޫޒްލައިނާއެއް 2،000 އެއްހާ ފަތުރުވެރީންނާ އެކު މިއަދު ރާއްޖެ އަތުވެއްޖެއެވެ. އިމިގްރޭޝަނުން ބުނާ ގޮތުގައި ސްރީލަންކާގެ ކޮލަންބޯއިން ފުރައިގެން މިއަދު ރާއްޖެއަށް އައިސްފައިވަނީ "އެމްވީ ކޮސްޓާ ޑެލިޒިއޯސާ" ކިޔާ ކްރޫޒްލައިނާއެކެވެ. އެ ކްރޫޒްލައިނާގައި 1،855 ފަސިންޖަރުންނާއި، 881 ކްރޫ މެންބަރުން ތިބި ކަމަށް އިމިގްރޭޝަނުން ވަނީ މައުލޫމާތު ދީފައެވެ. އިމިގްރޭޝަނުން ވަނީ އެ ކްރޫޒްލައިނާގައި ތިބި ފަސިންޖަރުންނާއި ކްރޫ މެންބަރުންނަށް ބޭނުންވާ އިމިގްރޭޝަން ކްލިއަރެންސް، ސީޕޯޓް ޑިވިޝަންގެ އޮފިސަރުން ފުރިހަމަކޮށްފައިވާ ކަމަށެވެ. https://x.com/ImmigrationMV/status/2029089875291717683 ރާއްޖެއަށް ކްރޫޒްލައިނާތައް ގެންނަ ކުންފުނިތައް ތަމުސީލުކުރާ މޯލްޑިވްސް އެސޯސިއޭޝަން އޮފް ޔޮޓް އެޖެންޓްސް (މާޔާ)ގެ ރައީސް މުހައްމަދު ނަޝީދު ވިދާޅުވީ، "އެމްވީ ކޮސްޓާ ޑެލިޒިއޯސާ" ނަމަކަށް ކިޔާ މި ކްރޫޒްލައިނާ ފުރަން ހަމަޖެހިފައިވަނީ މިއަދުގެ އިރިއޮއްސި 18:00 ގައި ކަމަށެވެ. މިދިޔަ ފެބުރުވަރީ މަހުގެ 14 ވަނަ ދުވަހު ވެސް، ރާއްޖެއަށް އެންމެ ފުރަތަމަ އައި ކުރޫޒްލައިނާ އޮޕަރޭޓަރުގެ އިތުރު ބޯޓެއް ރާއްޖެއަށް ޒިޔާރަތްކޮށްފައިވެއެވެ. 'ކުއީން އޭން' ނަމަކަށް ކިޔާ އެ ކްރޫޒްލައިނާގައި ޖުމުލަ 2،669 ފަތުރުވެރީންނާއި 1،235 ކުރޫއިން ވަނީ ރާއްޖެއަށް ޒިޔާރަތްކޮށްފައެވެ. https://sun.mv/217912 ރާއްޖެއަށް ކޮންމެ އަހަރަކު ވެސް ކްރޫޒްލައިނާތަކުގައި ގިނަ އަދަދެއްގެ ފަތުރުވެރިން ޒިޔާރަތްކުރެއެވެ. މިދިޔަ އަހަރު ވެސް މިލިއަނަކަށްވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައިވެއެވެ. އެންމެ ގިނައިން ރާއްޖެއަށް ފަތުރުވެރިން އަންނަ ގައުމުތަކުގެ ތެރޭގައި ރަޝިއާ، ޗައިނާ އަދި އިނގިރޭސިވިލާތް ފަދަ ގައުމުތައް ހިމެނެއެވެ.