ށ. ނަރުދާ އިންޖީނުގޭގައި އަލިފާނުގެ ހާދިސާއެއް ހިނގައި މުޅި ރަށުން ކަރަންޓު ކެނޑިއްޖެއެވެ.
ނަރުދޫ އިންޖީނުގޭގެ އޮފިޝަލަކު ވިދާޅުވީ އެ ހާދިސާ ހިނގާފައި ވަނީ 12:05 އެހާ އިރުގައި ކަމަށާއި ރޯވެފައި ވަނީ 80 ކިލޯ ވޯޓާއި 50 ކިލޯ ވޯޓްގެެ ދެ އިންޖީނުގައި ކަމަށެވެ.
އޭނާ ވިދާޅުވީ ހާދިސާ ހިނގިތާ 20 ވަރަކަށް މިނެޓް ފަހުން ރަށުގެ ރައްޔިތުންގެ ވަރަށް ބޮޑު އެހީތެރިކަމަކާއި އެކު ރޯވެފައި ހުރި ދެ އިންޖީނުގައި ހިފާފައިވާ އަލިިފާން ގަނޑު ނިއްވާލެވިފައިވާ ކަމަށެވެ.
އިންޖީނުގޭގައި އަލިފާން ނިއްވާ ސިސްޓަމެއް ނެތުމުން, ރައްޔިތުން ނުކުމެ ކައިރި ގޭގެއިން ފެނާއި އަލިފާން ނިއްވާ ސާމާނު ހިފައިގެން އައިސް އަލިފާން ގަނޑު ނިއްވާލާފައިވާ ކަމަށް އޮފިޝަލު ވިދާޅުވިއެވެ.
އޭނާ ވިދާޅުވީ އިންޖީނު ގޭގައި އިނީ ތިން އިންޖީނު ކަމަށާއި ރޯވި ދެ އިންޖީނު ބޭނުން ކުރެވޭވަރު ވަނީ ބޮޑު އޯވަހޯލްއެއް ކުރުމަށް ފަހުގައި ކަމަށެވެ. އަދި ދެން ހުރި 50 ކިލޯ ވޯޓްގެ އިންޖީނުން މުޅި ރަށަށް ކަރަންޓް ދިނުމަކީ ދަތި ކަމެއް ކަމަށް ވެސް އޭނާ ވިދާޅުވިއެވެ.
ނަރުދޫގެ އާބާދީގައި 604 މީހުން ދިރުއުޅެމުންދާއިރު އިންޖީނުގެއިން އަންނަނީ 111 ގެއަކަށް ކަރަންޓް ދެމުންނެވެ.
އޮފިޝަލު ވިދާޅުވީ އެ ރަށު އިންޖީނުގެ ހިންގަމުން އަންނަނީ ފެނަކަ ކޯޕަރޭޝަނުން ކަމަށާއި މިއަދު އިރު އޮއްސުމުގެ ކުރިން ކައިރި އެހެން ރަށަކުން ޖެނެރޭޓަރެއް ގެނެސް މުޅިރަށަށް ކަރަންޓް ދެވޭނެ ކަމުގެ ޔަގީން ކަން ފެނަކައިން ދީފައިވާ ކަމަށެވެ.