ޤައުމީ އެއާލައިން، މޯލްޑިވިއަންގެ ފްލީޓް ޒަމާނީ ކުރުމަށް ކުރަމުންދާ މަސައްކަތުގެ ދަށުން، ޑޭޝް-8 މަރުކައިގެ އިތުރު ބޯޓެއް ދޫކޮށްލައިފިއެވެ.
ގިނަ ދުވަސްތަކެއްވަންދެން ރާއްޖޭގައި ބޭނުންކޮށްފައިވާ ޑޭޝް-8 މަރުކައިގެ ރޭޑިއޯ ކޯލް ސައިން "ސިއެރާ" ރާއްޖެއިން ކެނެޑާއަށް ފުރާފައި ވަނީ އިއްޔެއެވެ.
މޯލްޑިވިއަންއިން ހާމަކުރި ގޮތުގައި، 14 އަހަރަށްވުރެ ގިނަ ދުވަހު ރާއްޖޭގެ ޚިދުމަތުގައި ބޭނުންކުރުމަށްފަހު، މި މަތިންދާ ބޯޓު މިހާރު ވަނީ ފްލީޓުން ނަގާފައެވެ. މޯލްޑިވިއަންގެ ޚިދުމަތުގައި ބޭނުންކުރި މުއްދަތުގައި މި މަތިންދާބޯޓު ވަނީ 29,000 އަށްވުރެ ގިނަ ފްލައިޓް ގަޑި ފުރިހަމަކޮށް، 37,000 އަށްވުރެ ގިނަ ފަހަރު ފުރައި އަދި ޖައްސާފައެވެ. މި ދަތުރުތަކުގައި ރާއްޖޭގެ އެކި ރަށްތަކަށް އެތައް ހާސް ފަސިންޖަރުންނެއް ވަނީ އުފުލައިދީފައެވެ.
މޯލްޑިވިއަންއިން ވިދާޅުވީ، މި މަތިންދާބޯޓު ކެނެޑާއަށް ފޮނުވާލާފައިވަނީ އާންމުކޮށް ހުޅުވާލައިގެން ކުރިއަށްގެންދިޔަ ރިކުއެސްޓް ފޯ ޕްރޮޕޯސަލް މަރުހަލާއަކަށް ފަހުގައި ކަމަށެވެ. މީގެ 26 އަހަރު ކުރިން އުފެއްދި މި މަތިންދާބޯޓު އަނބުރާ ގޮސްފައިވަނީ މި މަތިންދާ ބޯޓު އުފެއްދި ކުންފުނި ކަމަށްވާ ކެނެޑާގެ ޑި ހެވެލަންޑްއަށެވެ. މި މުއާމަލާތުގެ ވިޔަފާރީގެ ތަފްސީލުތައް މޯލްޑިވިއަންއިން ހާމަނުކުރި ނަމަވެސް، އެ މަތިންދާބޯޓު ދާއިމީކޮށް ފްލީޓުން ވަކިވެފައިވާކަން އެއާލައިނުން ވަނީ ކަށަވަރުކޮށްދީފައެވެ.
މޯލްޑިވިއަންއިން ވިދާޅުވީ، މި މަތިންދާބޯޓު ފްލީޓުން ވަކިވުމަކީ އެއާލައިންގެ ފްލީޓް އައުކުރުމުގެ ސިޔާސަތުގެ ދަށުން ހާސިލުކުރެވުނު އިތުރު ކުރިއެރުމެއް ކަމަށެވެ. މި މަސައްކަތުގެ ދަށުން، ދުވަސްވީ ޑޭޝް 8 ޓާބޯޕްރޮޕް މަރުކައިގެ މަތިންދާބޯޓުތަކުގެ ބަދަލުގައި އައު ޖީލުގެ އޭޓީއާރު މަތިންދާބޯޓުތައް ދަނީ ފްލީޓަށް އިތުރުކުރަމުންނެވެ. އެ އެއާލައިނުން ވިދާޅުވީ، އައު މަތިންދާބޯޓުތަކުގެ ސަބަބުން ފަސިންޖަރުންނަށް އިތުރު ފަސޭހަތައް ލިބިގެންދިއުމުގެ އިތުރުން ތެލަށް ކުރާ ހޭދަ ކުޑަވެ، ޚިދުމަތްތައް އިތުރަށް ހަރުދަނާވެ، ތިމާވެއްޓާ ރައްޓެހި ޚިދުމަތަކަށް ވެގެންދާނެ ކަމަށެވެ.
މިހާތަނަށް އޭޓީއާރު މަރުކާގެ ބޯޓު ގެނެސް ޚިދުމަތާ ގުޅިފައިވާއިރު، މިއަހަރު ފަހުކޮޅު އަދި އަންނަ އަހަރު ކުރީކޮޅު އިތުރު 2 ބޯޓެއް ގެނައުމަށް މޯލްޑިވިއަނުން ދަނީ މަސައްކަތްކުރަމުންނެވެ.