ރާއްޖޭގައި ހިންގާ ޕޮންޒީ ސްކީމެއްގެ މައުލޫމާތު ލިބިފައިވާ ކަމަށް ބުނެ އެފަދަ ސްކީމްތަކުގައި ބައިވެރި ނުވުމަށް މަރުކަޒީ ބޭންކުން މިރޭ އިލްތިމާސްކޮށްފި އެވެ.އެމްއެމްއޭ އިން ނެރުނު ބަޔާނެއްގައި ބުނީ، އެ ފްރޯޑް ހިންގަނީ ފޭސްބުކާއި ޓެލްގްރާމް ފަދަ ސޯޝަލް މީޑިއާގެ ވަސީލަތްތައް ބޭނުން ކޮށްގެން ކަމަށެވެ. ކުޑަ ދުވަސްކޮޅެއްގެ ތެރޭގައި ބޮޑު ފައިދާއެއް އަނބުރާ ދޭނެ ކަމަށް ބުނި ނަމަވެސް އިންވެސްޓް ކުރުމުގެ ބަދަލުގައި އަމިއްލަ ބޭނުންތަކަށް އެ ސްކީމްގައި ފައިސާ ބޭނުންކުރާ ކަމަށް އެމްއެމްއޭއިން ބުންޏެވެ.އެ ސްކީމުގައި ކުރީކޮޅު ފައިސާ ނަގާ މީހުންނަށް އަނބުރާ ފައިސާ ދެނީ އޭގެ ފަހުން ބައިވެރިވާ މީހުން ދޭ ފައިސާއިންނެވެ. އެހެންވެ، އެފަދަ ސްކީމްތަކަކީ ދެމެހެއްޓޭނެ ސްކީމްތަކެއް ނޫން ކަމަށާއި އެ ސްކީމް ރޫޅޭއިރު، ބައިވެރިވި ގިނަ މީހުންނަށް ފައިސާ ވެސް އަނބުރާ ނުލިބޭނެ ކަމަށް އެމްއެމްއޭ އިން ބުނެ އެވެ."ސްކީމްއަށް ދޭ ފައިސާ އަކީ ސްކީމް ހިންގާ ފަރާތުން އަނބުރާ ނުދީފި ނަމަ، ފައިސާ ޖަމާވާ ބޭންކަށް ވެސް އަނބުރާ ދެވޭނެ އެއްޗެއް ނޫންކަން ފާހަގަކުރަމެވެ،" އެމްއެމްއޭ އިން ބުންޏެވެ."ވީމާ މި ފަދަ ސްކީމްތަކާ މެދު ސަމާލުވުމަށާއި އޭގައި ބައިވެރި ނުވުމަށް އިލްތިމާސްކުރަމެވެ."އެ އިދާރާ އިން ސިފަ ކޮށްފައިވާ ސްކީމަށް އާއްމުކޮށް ކިޔައި އުޅެނީ “ޕޮންޒީ ސްކީމް” އެވެ. މިއީ ދުނިޔޭގެ ހުރިހާ ގައުމެއްގައި ވެސް މަނާ އެއްޗެކެވެ.ޕޮންޒީ ސްކީމް އަކީ މަކަރާއި ހީލަތުން ފައިސާ ހޯދުމަށް ދުނިޔޭގައި ފުޅާ ދާއިރާއެއްގައި ބޭނުންކުރާ ސްކީމެކެވެ. އާ އިންވެސްޓަރުން ލިބޭހާ ދުވަހަކު އެއީ ސައްހަ ވިޔަފާރިއެއް ކަމަށް ދައްކައިގެން މި ސްކީމް ހިންގަ އެވެ.