ހުޅުމާލޭގައި ގަވާއިދާ ހިލާފަށް ވެހިކަލް ދޮވެ ސާފުކުރުމުގެ މަސައްކަތުގައި ހަރަކާތްތެރިވާ ބިދޭސީންނަށް އަމާޒުކޮށް އިއްޔެ ކުރިއަށްގެންދިޔަ އޮޕަރޭޝަނުގައި 8 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މިއަދު ބުނީ އިއްޔެ މި ރެއިޑް ކުރިއަށް ގެންގޮސްފައިވަނީ، ހުޅުމާލެ ފޭސް އެކެއް އަދި ދޭއްގެ އެކި ސަރަހައްދުތަކުގައި ގަވާއިދާ ހިލާފަށް އުޅަނދުތައް ދޮވެ ސާފުކުރުމުގައި ހަރަކާތްތެރިވާ ބިދޭސީންނަށް އަމާޒުކޮށް ކަމަށެވެ. މި ރެއިޑުގައި 8 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންދިޔައިރު، އެމީހުންގެ އަތުގައި ސައްހަ ވިސާވެސް ނެތްކަމަށް އިމިގްރޭޝަނުން ބުންޏެވެ.
އިމިގްރޭޝަނުން ކުރިންދުވަހު ވަނީ ފޭސް ދޭއްގައި ހުންނަ ހިޔާ ޓަވަރުތަކުގެ ވިޔަފާރިތަކަށް އަމާޒުކޮށްގެން ހިންގި އޮޕަރޭޝަނުގައި ގަވާއިދާހިލާފަށް އުޅުނު 4 ބިދޭސީއަކުވެސް އެ އިދާރާގެ ބެލުމުގެ ދަށަށް ގެންގޮސްފައެވެ. އެގޮތުން ހިޔާ ޓަވަރުތަކުގައި ވިޔަފާރީގެ ހިދުމަތްތައް ދެމުންގެންދާ 26 ތަނެއް އިއްޔެ ބަލާފާސްކޮށްފައިވާކަމަށް އިމިގްރޭޝަނުން ބުންޏެވެ.
އިމިގްރޭޝަނުން މިދިޔަ ހޮނިހިރުދުވަހުވެސް ވަނީ ހުޅުމާލޭ ފޭސް 2ގެ ހިޔާ ފުލެޓުތަކުގައި ހިންގަމުންދާ ވިޔަފާރިތަކަށް ހާއްސަކޮށް އިއްޔެ ވަނީ ރެއިޑު އޮޕަރޭޝަނެއް ހިންގާފައެވެ. އެ އޮޕަރޭޝަނުގައި 08 ފިހާރަ، 04 ކެފޭ/ރެސްޓޯރަންޓު/ބޭކަރީ އަދި 01 ސެލޫން ބަލައި ފާސްކޮށް ގަވާއިދާ ހިލާފަށް އުޅެމުންދިޔަ 3 ބިދޭސީއަކު ވަނީ އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.