ހަތަރު ވަރަކަށް ގަޑިއިރަށް ނ. ކެންދިކުޅުދޫން ކަރަންޓު ކަނޑާލައިފިއެވެ.
"ވީނިއުސް"އާ ވާހަކަދެއްކި ކެންދިކުޅުދޫ ކައުންސިލްގެ އޮފިޝަލަކުވަނީ އެ ރަށުން ކަރަންޓު ކަނޑާލިކަން ކަށަވަރުކޮށްދީފައެވެ. އޮފިޝަލް ވިދާޅުވި ގޮތުގައި މެންދުރުފަހު 1:15 ހާއިރު ކަރަންޓު ކަނޑާލި ގޮތަށް ރަށަށް ކަރަންޓު ދީފައިވަނީ ހަވީރު 5:30 ހާއިރު ކަމަށެވެ. އެއީ ހަތަރު ހަޑިއިރާ 15 މިނިޓެވެ.
މައުލޫމާތު ލިބިފައިވާ ގޮތުގައި، ކަރަންޓު ކަނޑާލާފައިވަނީ ކެނދިކުޅުދޫ ބާ އިންޖީނުގެ ނިއްވާލައި އެ ރަށުގައި އަލަށް އިމާރާތްކުރި އިންޖީނުގޭން ކަރަންޓު ދިނުމުގެ މަސައްކަތަށެވެ.
ކެނދިކުޅުދުއަށް ކަރަންޓުގެ ޚިދުމަތްދެނީ ފެނަކަ ކޯޕަރޭޝަނުންނެވެ.
އެ ކޯޕަރޭޝަނުން ބުނެފައިވާ ގޮތުގައި، މިއަދަކީ ކެނދިކުޅުދޫގެ ހަޔާތުގައި އަނެއްކާވެސް، ތާރީޚީ ދުވަހެކެވެ. ސަބަބެއް ކަމަށް ބުނެފައިވަނީ ﷲގެ ވާގިފުޅާއެކު، ކެނދިކުޅުދޫގެ ބާ އިންޖީނުގެ މިއަދު ނިއްވާލައި، އަރަމުންދިޔަ ކަޅުދުން ފިލައި ދިއުމެވެ.
ފެނަކައިން ބުނީ، އާ އިންޖީނުގެއަކީ އޮފީސް އިމާރާތަކާއެކު ހަދާފައިވާ ތަނެއް ކަމަށެވެ. އަދި މިހާރު ހައިވޯޓޭޖުގެ ކަރަންޓު ވިއުގައެއް އަލަށް ގާއިމުކުރެވުމުގެ އިތުރުން ރަށުގެ ހަތަރު ސަރަހައްދެއްގައި ޓްރާންސްފޯމަރުތައް ބަހައްޓައި ޚިދުމަތްދެމުން އަންނަ ކަމަށެވެ.
މި އިންޖީނުގެ އެޅުމަށް ހަވާލުކުރީ ޓޫއެލް ކޮންސްޓްރަކްޝަން ޕްރައިވެޓު ލިމިޓެޑާއެވެ. މި މަސައްކަތާއި ގުޅޭ އެއްބަސްވުމުގައި ފެނަކައިގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު އަހުމަދު ސައީދު މުހައްމަދެވެ. ޓޫއެލް ކޮންސްޓްރަކްޝަންގެ ފަރާތުން ސޮއިކުރެއްވީ އެކުންފުނީގެ އޮޕަރޭޝަންސް ޑިރެކްޓަރު ހުސައިން އިބްރާހީމެވެ.
މި މަސައްކަތް ޓޫއެލް ކޮންސްޓްރަކްޝަނާއި ހަވާލުކުރީ 7.5 މިލިއަން ރުފިޔާއަށެވެ. 2019 ވަނަ އަހަރު މި މަސައްކަތް ހަވާލުކުރީ 2020 ވަނަ އަހަރުގެ އޮކްޓޫބަރު މަހުގެ އެއްވަނަ ދުވަހަށް ނިންމަންޖެހޭނެ ކަމަށް ބުނެއެވެ.