ޖަޕާނުގެ ކުމަމޯޓޯ ސިޓީއަށް އައި ބާރުގަދަ ބިންހެލުމަކާ ގުޅިގެން އެ ސިޓީގައި ހުންނަ ބޮޑު ޝޮޕިން މޯލެއްގެ ބައެއް ވެއްޓި، ގިނަ ބަޔަކު ތާށިވެއްޖެ އެވެ.
ކުމަމޯޓޯގެ ފަޔަ ސާވިސްއިން ބުނީ ރިކްޓަ މިންގަނޑުން 7.1 ގެ ބާރުމިނުގައި އައި  ބިންހެލުމުގެ ސަބަބުން "އިއޯން މޯލް"ގެ ދެވަނަ ފަންގިފިލާ ވަނީ އެއްކޮށް ވެއްޓިފަ އެވެ.
MU STORE
Enterprise Development Industrial Pvt Ltd
SIMDI Company Pvt Ltd
MU STORE
SIMDI Company Pvt Ltd
މި ހާދިސާގައި ޝޮޕިން މޯލްގެ ތެރޭގައި ތާށިވެފައިވާ މީހުން ސަލާމަތްކުރުމުގެ މަސައްކަތް ކަމާބެހޭ ފަރާތްތަކުން މިހާރު ދަނީ ކުރަމުންނެވެ. ސަލާމަތްކޮށްގެން ބައެއް މީހުން ހޮސްޕިޓަލަށް ގެންގޮސްފައިވާ ކަމަށް މަންޒަރު ދުށް ބައެއް މީހުން ބުނެފައިވެ އެވެ. 
ޖަޕާނުގެ ގައުމީ ބްރޯޑްކާސްޓަރު އެންއެޗްކޭއިން ރިޕޯޓްކޮށްފައިވާ ގޮތުގައި، އެ މޯލްގައި މަސައްކަތްކުރާ 20 އާއި 30 އާ ދެމެދުގެ އަދަދަކަށް މުވައްޒަފުންނާ މިހާތަނަށް ގުޅޭ ގޮތް ނުވެ އެވެ.
މަންޒަރު ދުށް ބައެއް މީހުން ބުނި ގޮތުގައި މޯލްގެ ބައެއް ވެއްޓުމުގެ ކުރިން އެތަނުން ގޮވުމެއްގެ އަޑު އިވި، ދުން އަރަމުންދިޔަ މަންޒަރު ވަނީ ފެނިފަ އެވެ.
ޝޮޕިން މޯލްގެ އިތުރުން، ކުމަމޯޓޯގެ ކަރުދާސް އުފައްދާ ފެކްޓްރީއެއްގެ ބޮޑު ދުންހޮޅިއެއް ވެއްޓި، އެތަނުގެ ބައެއް މުވައްޒަފުން ވެސް ގެއްލިފައިވާ ކަމަށް ފުލުހުން ވަނީ ބުނެފަ އެވެ.
މި ބިންހެލުމުގެ ސަބަބުން ކުމަމޯޓޯގެ ތާރީހީ ކިއްލާއެއްގެ ފާރުތައް ވެއްޓި، މަގުތަކާއި ބްރިޖުތަކަށް ބޮޑެތި ގެއްލުންތަކެއް ވަނީ  ލިބިފަ އެވެ. އަދި ބޮޑު ސަރަހައްދަކުން ކަރަންޓުގެ ހިދުމަތް ވަނީ މެދުކެނޑިފަ އެވެ.
ޖަޕާނުގެ ބޮޑުވަޒީރު ސަނޭ ޓަކައިޗީ ވިދާޅުވި ގޮތުގައި، މީހުން ސަލާމަތްކުރުމުގެ މަސައްކަތުގައި ސިފައިންގެ 3،600 އަށްވުރެ ގިނަ މީހުން މިހާރު ދަނީ ހަރަކާތްތެރިވަމުންނެވެ. ސަރުކާރުގެ އެންމެ އިސް އަމާޒަކީ މީހުންގެ ފުރާނަ ސަލާމަތްކުރުން ކަމަށާއި، ރޭގަނޑު ވެސް މެދުނުކެނޑި މަސައްކަތްތައް ކުރިއަށްދާނެ ކަމަށް ބޮޑުވަޒީރު ވިދާޅުވި އެވެ.
މި ބިންހެލުމާ ގުޅިގެން ޓޯކިޔޯގެ ހަނެދާ އެއާޕޯޓުގެ ގިނަ ފްލައިޓްތަކެއް ވަނީ ކެންސަލްކޮށް ނުވަތަ ލަސްކޮށްފަ އެވެ. ނަމަވެސް، ބިންހެލުން އައި ސަރަހައްދާ 100 ކިލޯމީޓަރު ދުރުގައި ހުރި ސެންޑާއީ ނިއުކްލިއާ ޕަވަ ޕްލާންޓަށް އެއްވެސް ގެއްލުމެއް ލިބިފައި ނުވާކަމަށް ބައިނަލްއަގުވާމީ އެޓޮމިކް ހަކަތައާ ބެހޭ އިދާރާއިން ވަނީ ކަށަވަރުކޮށްދީފަ އެވެ.
ޖަޕާނުގެ މީޓިއޮރޮލޮޖިކަލް އެޖެންސީން އިންޒާރު ދީފައިވާ ގޮތުގައި، ކުރިއަށް އޮތް ދުވަސްތަކުގައި އިތުރު ބާރުގަދަ ލޮޅުންތަކެއް އައުމުގެ ފުރުސަތު އެބައޮތެވެ. މިހާތަނަށް 60 އަށްވުރެ ގިނަ ކުދި ލޮޅުންތައް ރެކޯޑްކުރެވިފައި ވާއިރު، ކުމަމޯޓޯގެ 150،000 އަށްވުރެ ގިނަ ރައްޔިތުންނަށް ވަނީ ރައްކާތެރި ހިސާބުތަކަށް ބަދަލުވުމަށް އަންގާފައެވެ. ޖަޕާނަކީ ދުނިޔޭގައި އެންމެ ގިނައިން ބިންހެލުން އަންނަ އެއް ގައުމެވެ. އެގޮތުން އަހަރަކު ގާތްގަނޑަކަށް 1،500 ބިންހެލުން އެ ގައުމަށް އާދެ އެވެ.