’އަދަދު‘ ނޫހުގެ ދެ ނޫސްވެރިން ވަގުތުން މިނިވަންކޮށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މައްޗަށް ކުރެވޭ ޖިންސީ ގޯނާއާއި މަގާމުގެ ނުފޫޒު ބޭނުންކުރެއްވި ކަމުގެ ތުހުމަތުތަކުގެ މިނިވަން ތަހުގީގެއް ހިންގުމަށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ގޮވާލައިފިއެވެ.
އެ ޖަމިއްޔާއިން ބުނީ މިއީ ރާއްޖޭގެ ޑިމޮކްރެޓިކް ތާރީހުގައި ނޫސްވެރިކަމުގެ މަސައްކަތާ ގުޅިގެން ނޫސްވެރިން ޖަލަށްލީ ފުރަތަމަ ފަހަރު ކަމަށެވެ.
އެމްޖޭއޭ އިން ނެރުނު ބަޔާނުގައިވާ ގޮތުން، ކްރިމިނަލް ކޯޓުން ވަނީ ’އަދަދު‘ ނޫހުގެ ނޫސްވެރިޔާ މުހައްމަދު ޝަހުޒާން 15 ދުވަހަށް އަދި ލީވާން އަލީ ނާސިރު 10 ދުވަހަށް ޖަލަށްލުމަށް ހުކުމް ކޮށްފައެވެ. މި ހުކުމްތައް އައީ ރައީސް މުއިއްޒާ ދެކޮޅަށް ކުރެވޭ ސީރިއަސް ތުހުމަތުތަކާ ގުޅޭގޮތުން ހަބަރު ފެތުރުމުގެ ސަބަބުން ކަމަށް އެ ޖަމިއްޔާއިން ފާހަގަކުރެއެވެ.
މި މައްސަލަ ފެށިގެން އައީ މިދިޔަ މާޗް މަހުގެ 28 ވަނަ ދުވަހު ’އަދަދު‘ ނޫހުން ނެރުނު ’އައިޝާ‘ ޑޮކިއުމެންޓަރީއާ ގުޅިގެންނެވެ.
އެމްޖޭއޭ އިން ބުނި ގޮތުގައި ޝަހުޒާން ޖަލަށްލީ ރައީސް ބޭއްވި ޕްރެސް ކޮންފަރެންސެއްގައި އެމަނިކުފާނާ ސުވާލު ކުރުމުންނެވެ. އަދި ލީވާން ޖަލަށްލާފައިވަނީ މި މައްސަލައިގައި ކޯޓުން ނެރުނު ”ގޭގް އޯޑަރ“ ނުވަތަ ހަބަރު ފެތުރުން މަނާކުރާ އަމުރާ ގުޅޭގޮތުން ރިޕޯޓް ކުރުމުންނެވެ. މީގެ އިތުރުން ކޯޓުގެ ހުރުމަތް ކެނޑި ކަމަށް ބަލައި ލީވާން ވަނީ 1,738 ޑޮލަރުން ޖޫރިމަނާވެސް ކޮށްފައެވެ.
ނޫސްވެރިންނަށް ހުކުމް ކުރި އިރު، އެ މީހުންނަށް ލިބިދޭންޖެހޭ އަސާސީ ހައްގުތަކަށް އުނިކަން އައިސްފައިވާ ކަމަށް އެމްޖޭއޭ އިން ތުހުމަތު ކުރެއެވެ.
އެގޮތުން ވަކީލަކު އައްޔަންކުރަން ދިނީ އެންމެ ދެ ގަޑިއިރު ކަމަށާއި، ހުކުމް ކުރީ ވަކީލަކާ ނުލައި ކަމަށްވާތީ ޝަރީއަތުގެ އިންސާފުވެރިކަމާ މެދު ސުވާލު އުފެދޭ ކަމަށް ބަޔާނުގައިވެއެވެ. ”މިއީ ރައީސް މުއިއްޒުގެ ވެރިކަމުގައި ރާއްޖޭގެ ޑިމޮކްރެޓިކް ހައްގުތައް ފަހަތަށް ސާފުކޮށް ސިގްނަލް ކުރާ ކަމެއް،“ އެމްޖޭއޭގެ ބަޔާނުގައި ބުނެފައިވެއެވެ.
ކްރިމިނަލް ކޯޓުން ނެރުނު އަމުރަކީ ގާނޫނުއަސާސީއާ ހިލާފު އަމުރެއް ކަމަށް  އެމްޖޭއޭއިން ގަބޫލު ކުރެއެވެ. އެ ޖަމިއްޔާއިން ވަނީ ޖަލަށްލާފައިވާ ދެ ނޫސްވެރިން ވަގުތުން ދޫކޮށްލުމަށާއި، ނޫސްވެރިކަމުގެ މިނިވަންކަމަށް ހުރަސްއެޅުމަށް ސަރުކާރާއި ފަނޑިޔާރުގެއިން ކުރާ މަސައްކަތްތައް ހުއްޓާލުމަށް ގޮވާލާފައެވެ. އަދި ރައީސްގެ މައްޗަށް ކުރެވޭ ތުހުމަތުތަކުގެ މިނިވަން ތަހުގީގެއް ލަސްނުކޮށް ކުރިއަށް ގެންދިއުމަށްވެސް ވަނީ އިލްތިމާސްކޮށްފައެވެ.