ކަރަންޓް ސަބްސިޑީ ކަނޑާލުމުން، ރަށްރަށުގައި ވިޔަފާރިކުރާ ހުރިހާ ތަނެއްގެ ކަރަންޓު ބިލަށް ކުރިން ދައްކަމުން ދިޔަ ވަރަށް ވުރެ އިތުރަށް ޖުމްލަ 11 މިލިއަން ރުފިޔާ މިހާރު މަހަކު އަރާނެ ކަމަށާއި ނަމަވެސް އެ ކަމަށް ފެނަކަ ކޯޕަރޭޝަނަށް ކޮށްދެވޭނެ ކަމެއް ނެތް ކަމަށް އެ ކޯޕަރޭޝަނުން މިއަދު ބުނެފި އެވެ. ސަބްސިޑީ ކަނޑާލުމާއެކު ކަރަންޓް ބިލް ބޮޑުވެގެން، ހދ. ކުޅުދުއްފުއްޓާއި އައްޑޫގެ ވިޔަފާރިވެރިން ދަނީ މުޒާހަރާ ކުރަމުންނެވެ. އެ މުޒާހަރާތަކާ ގުޅިގެން، ފެނަކައިން ބޭއްވި ނޫސްވެރިންގެ ބައްދަލުވުމެއްގައި އެ ކޯޕަރޭޝަންގެ މެނޭޖަރު އަހްމަދު ނަޖާހް ވިދާޅުވީ ފެނަކައިން ކަރަންޓް ހިދުމަތް ދޭ 46،590 މީޓަރު ރަށްރަށުގައި ހުރިއިރު، އޭގެ ތެރެއިން ވިޔަފާރިކުރާ ތަންތަނުގައި ބޭނުންކުރަނީ 5،765 މީޓަރު ކަމަށެވެ. އެ ތަންތަނަށް މިދިޔަ މަހުގެ ނިޔަލަށް އައީ ކަރަންޓް ސަބްސިޑީ ދެމުންނެވެ. ކަރަންޓް ބިލް ބޮޑުވެގެން އައްޑޫގެ ބައެއް ވިޔަފާވެރިން މިއަދު މަރަދޫފޭދޫ ފެނަކަ އޮފީސް ކައިރީގައި މުޒާހަރާ ކުރަނީ. ފޮޓޯ/ ކިއުންތެެރިއެއް ކަރަންޓް ބިލަށް ސަބްސިޑީ ދެނީ، ބިލްގައި ހިމެނޭ ފިއުލް ސާޗާޖަށް ޖެހޭ ވަރެވެ. އެހެންވެ ސަބްސިޑީ ކަނޑާލުމުން ވިޔަފާރިކުރާ ތަންތަނުން ދެން ފިއުލް ސާޗާޖް ދައްކަން ޖެހޭނީ އެ ތަނަކުންނެވެ. ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނިމާލު ވިދާޅުވި ގޮތުގައި ފިއުލް ސާޗާޖް ކަނޑައަޅަނީ އެ ސަރަހައްދަކުން ޑީސަލް ގަންނަން ލިބޭ އަގާއި ތެޔޮ ފޯރުކޮށް ދިނުމަށް ކުރަންޖެހޭ ހަރަދަށް ބެލުމަށް ފަހުގަ އެވެ. ބާޒާރުގައި ޑީސަލްގެ އަގު ކުރިއަށް ވުރެ މިހާރު ހެޔޮވެފައި ހުރި ނަމަވެސް، ނިމާލު ވިދާޅުވީ، ކަރަންޓުގެ އަގު ދަށް ކުރުމަކީ އަދި ދަތި ކަމެއް ކަމަށެވެ. އެއީ ކުރަންޖެހޭ ހަރަދު އަދިވެސް ބޮޑުވުމާއި އިތުރު އިންވެސްޓްތައް ކުރަން ހުރުމުން ކަމަށް އޭނާ ވިދާޅުވި އެވެ. އަދި ފިއުލް ސާޗާޖް ނަގަން ފެށީ ވެސް ނިމާލު ވިދާޅުވި ގޮތުގައި، ޑީސަލް ލިޓަރެއްގެ އަގު އަށް ރުފިޔާ އަށް ވުރެ މައްޗަށް ދިއުމުންނެވެ. ކުޅުދުއްފުށީގެ ވިޔަފާރި ކުރާ ތަންތަނުގެ ކަރަންޓް ބިލް ކުރިއަށް ވުރެ އެތައް ގުނައެއް މި މަހު ބޮޑުވެގެން ދިއުމުން، އެ ރަށުގައި މުޒާހަރާ ކުރަމުން ދާއިރު، ނަޖާހް ވިދާޅުވީ، ސަބްސިޑީ ކަނޑާލުމުން އެ ރަށުގެ ވިޔަފާރިކުރާ ތަންތަނުގެ ކަރަންޓް ބިލްގެ ފަރަގު އެހެން ރަށްރަށަށް ވުރެ ބޮޑުވުމުގެ މައިގަނޑު ސަބަބަކީ 2009ގައި އެނާޖީ އެތޯރިޓީން ފާސްކޮށްފައިވާ ރޭޓަށް ވުރެ ހެޔޮކޮށް ބިލް ހެދުން ކަމަށެވެ. އަދި މަހަކު 400 ޔުނިޓަށް ވުރެ އިތުރުވާ ތަންތަނަށް ސަބްސިޑީ ދެމުން ދިއުމެވެ. ކުޅުދުއްފުއްޓަށް އެނާޖީ އޮތޯރިޓީން ފާސްކުރީ ކަރަންޓް ޔުނިޓަކަށް 7.50 ރ. ކަމަށް ވިޔަސް، އޭރު އެ އަތޮޅަށް ކަރަންޓް ހިދުމަތް ދެމުން ދިޔަ އެ ސަރަހައްދުގެ ޔުޓިލިޓީ ކޯޕަރޭޝަނުން ކަނޑައެޅީ ކުޅުދުއްފުށީ ވިޔަފާރިކުރާ ތަންތަނުން ޔުނިޓަކަށް 2.75 ރ.ގެ ރޭޓުން ބިލް ހެދުމަށް ކަމަށް ނަޖާހް ވިދާޅުވި އެވެ. ކަރަންޓް ބިލްގެ އަނެއް ބައި ދައްކަމުން އައީ ސަބްސިޑީގެ ގޮތުގައި ސަރުކާރުންނެވެ. އެއީ އެ ރަށުގެ އާންމުންނަށް ސަބްސިޑީގެ ގޮތުގައި ލިބެމުން ދިޔަ ވަރަށް ވުރެ ބޮޑު އެއްޗެކެވެ. "އެހެންވެ އެރަށުގެ ކަރަންޓް ބިލްގެ ފަރަގު އެހެން ރަށްރަށަށް ވުރެ ބޮޑުވެގެން ދިޔައީ. ހަގީގަތުގައި ލިބެން ނުޖެހޭ އެތައް ބަޔަކަށް ވެސް ކަރަންޓް ސަބްސިޑީ [ކުޅުދުއްފުށީގައި] ދިޔައީ ލިބެމުން،" ނަޖާހް ވިދާޅުވި އެވެ. ކުޅުދުއްފުށީގައި ހުރި ކޯލްޑް ސްޓޯޖްތަކާއި ކަރަންޓް ބިލަށް މަހަކު 3،000 ޔުނިޓް އަރާ ތަންތަން ވެސް ސަބްސިޑީ ލިބެމުން ދިޔަ ކަމަށް ވެސް ނަޖާހް ވިދާޅުވި އެވެ. އެގޮތަށް ދެމުންދިޔަ ކަރަންޓް ސަބްސިޑީ ހުއްޓާލުމުން، ކުޅުދުއްފުށީގައި 1،000 ޔުނިޓަށް ވުރެ މަތިން ކަރަންޓް ބިލަށް އަރާ ފިހާރަތަކުގެ ކަރަންޓް ބިލަށް މިހާރު 5،000ރ އަށް ވުރެ ބޮޑު ފަރަގެއް އާދެ އެވެ. އަދި އެހެން ރަށްރަށުގެ ވެސް ވިޔަފާރިކުރާ ތަންތަނުގެ ކަރަންޓް ބިލް ވަނީ ބޮޑުވެފަ އެވެ. މި ބަދަލު މި އައީ ނަޖާހް ވިދާޅުވި ގޮތުގައި، 2009ގައި ފާސްކޮށްފައި އޮތް ރޭޓަށް ކަރަންޓް ބިލް ހަދަން ފެށުމުންނެވެ. ކަރަންޓް ސަބްސިޑީއަކީ ނިމާލު ވިދާޅުވި ގޮތުގައި، ސަރުކާރުން ހަމަޖައްސާ އެއްޗެކެވެ. އެހެންވެ، ސަބްސީޑީ އުނިކުރުމުން އެކަން ތަންފީޒު ކުރުން ނޫން ގޮތެއް އެ ކުންފުންޏަށް ނޯންނާނެ ކަމަށް އޭނާ ވިދާޅުވި އެވެ.