ދުނިޔޭގެ އިގްތިސާދަށް ނުހަނު މުހިންމު ހޮރްމޫޒް ކަނޑުއޮޅިން ދަތުރުފަތުރުކުރުން އަލުން އާއްމު ހާލަތަކަށް ގެނައުމަށްޓަކައި، ބައިނަލްއަގުވާމީ ކަނޑުގެ ސަލާމަތީ ފައުޖެއްގައި ބައިވެރިވާނެ ކަމަށް ޔޫއޭއީން ބުނެފި އެވެ.
ޔޫއޭއީގެ އިސް އޮފިޝަލުން ވިދާޅުވި ގޮތުގައި، މި މަސައްކަތުގައި ބައިވެރިވެ އެ ގައުމުގެ ކަނޑުގެ ސިފައިން ހަރަކާތްތެރިވާނެކަން އެމެރިކާއަށާއި އެކުވެރި ގައުމުތަކަށް މިހާރު ވަނީ އަންގާފަ އެވެ.
މިކަމާ ގުޅޭ ގޮތުން މައުލޫމާތު ދިން އޮފިޝަލުން ބުނި ގޮތުގައި، މި ހަރަކާތުގެ މައިގަނޑު މަގްސަދަކީ ވީހާ ވެސް ފުޅާ ދާއިރާއެއްގައި ބައިނަލްއަގުވާމީ ބާރެއް އެކުލަވާލުމެވެ. މިއީ އީރާނާ ދެކޮޅަށް ހަނގުރާމައަކަށް ދިއުމެއް ނޫން ކަމަށް ވެސް އެ ފަރާތުން ފާހަގަކުރި އެވެ.
ޔޫއޭއީގެ ސީނިއާ މިނިސްޓަރު ސުލްތާން އަލްޖާބިރު ވަނީ އީރާނުގެ އަމަލުތަކަށް ވަރަށް ބޮޑަށް ފާޑުވިދާޅުވެފަ އެވެ.
އޭނާ ވިދާޅުވި ގޮތުގައި، އީރާނުން ވަނީ ހޮރްމޫޒް ކަނޑުއޮޅި "ރަހީނު" ކޮށްފަ އެވެ. އަދި އޭގެ ނޭދެވޭ އަސަރު ދުނިޔޭގެ ކޮންމެ ގައުމަކަށް ވެސް ކުރަމުންދާ ކަމަށާއި، ތެލާއި ކާބޯތަކެއްޗާއި ބޭހުގެ އަގުބޮޑުވުމުގެ ސަބަބުން ކޮންމެ ގައުމަކުން ވެސް އޭގެ ބަދަލު ދައްކަންޖެހިފައިވާ ކަމަށް އޭނާ ސިފަކުރެއްވި އެވެ.
ދުނިޔޭގެ ތެލާއި ގޭހުގެ ފަސްބައިކުޅަ އެއްބައި އުފުލާ މި ކަނޑުއޮޅީގައި އީރާނުން ދެމުންދާ ހަމަލާތަކާއި އަޅާފައިވާ ހުރަސްތަކުގެ ސަބަބުން، ދަތުރުފަތުރު ވަނީ ވަރަށް ބޮޑަށް މަދުވެފަ އެވެ. މީގެ ސަބަބުން ދުނިޔޭގެ ހަކަތައިގެ ރައްކާތެރިކަމާ މެދު ބޮޑެތި ކަންބޮޑުވުންތަކެއް ވަނީ އުފެދިފަ އެވެ.
މި ހަރަކާތަށް ތާއީދު ހޯދުމަށް ޔޫއޭއީން ބަހްރޭނާ ގުޅިގެން އދ.ގެ ގަރާރެއް އެކުލަވާލުމުގެ މަސައްކަތް ކުރަމުންދާއިރު، ރަޝިޔާ އާއި ޗައިނާގެ ދެކޮޅުވެރިކަން މިކަމަށް ކުރިމަތިވުމަކީ އެކަށީގެންވާ ކަމެކެވެ. އަދި ބައިނަލްއަގުވާމީ މުޖުތަމައުގެ ފުރިހަމަ ތާއީދު މިކަމަށް ލިބޭނެކަމާ މެދު އަދި ވަނީ ޔަގީންކަމެއް ނެތް ހާލަތެއްގަ އެވެ.