ޗައިނާއަށް ކުރިމަތިވެފައިވާ އެތެރޭގެ އަދި ބައިނަލްއަގުވާމީ އިގްތިސާދީ ގޮންޖެހުންތަކާ ގުޅިގެން، އެ ގައުމުގެ އަހަރީ އިގްތިސާދީ ކުރިއެރުން ހުންނާނެ ކަމަށް ލަފާކުރާ މިންވަރު %4.5 އާއި %5އާ ދެމެދަށް ދަށްކޮށްފި އެވެ. މިއީ 1991 ވަނަ އަހަރަށް ފަހު އެ ގައުމުން ކަނޑައެޅި އެންމެ ދަށް އަމާޒެވެ.
މި އާ އަމާޒު އިއުލާނުކުރީ ބެއިޖިންގައި ބޭއްވި އަހަރީ ޓޫ ސެޝަންސް ސިޔާސީ ބައްދަލުވުންތަކުގަ އެވެ. ޗައިނާގެ ބޮޑުވަޒީރު ލީ ކިއަންގް ހުށަހެޅުއްވި ރިޕޯޓުގައި، އެ ގައުމުން ކުރިއަށް އޮތް ތަނުގައި އަމަލުކުރާނެ 15 ވަނަ ފަސް އަހަރުގެ ޕްލޭނާ ގުޅޭ ކުރިީގެ ތަފްސީލުތައް ވެސް ވަނީ ހިމަނުއްވާފަ އެވެ.
ބެއިޖިންއިން ހާމަކުރި ގޮތުގައި، މި އަމާޒު ދަށްކުރީ އިގްތިސާދަށް ކުރިމަތިވެފައިވާ ތަފާތު އެކި ފިއްތުންތަކުން އަރައިގަތުމަށް ކުރާ މަސައްކަތުގެ ބައެއްގެ ގޮތުގަ އެވެ. އޭގެ ތެރޭގައި، އެތެރޭގެ ބާޒާރުގައި މުދާ ގަނެއުޅޭ މިންވަރު ދަށްވުމާއި ބޯހިޔާވަހިކަމުގެ ދާއިރާއަށް ކުރިމަތިވެފައިވާ ނުތަނަވަސްކަމާއި އާބާދީގައި ދުވަސްވީ މީހުން ގިނަވުމުގެ އިތުރުން ބައިނަލްއަގުވާމީ ވިޔަފާރީގެ ތެރޭގައި އުފެދިފައިވާ ހިޔާލުތަފާތުވުންތައް ހިމެނެ އެވެ.
އިގްތިސާދީ މާހިރުން ވިދާޅުވާ ގޮތުގައި، އަމާޒު ދަށްކުރުމުން ސިޔާސަތުތައް އެކުލަވާލާ ފަރާތްތަކަށް ކަންކަން ނިންމުމުގައި އިތުރު ލުއިފަސޭހަތަކެއް ލިބިގެންދާނެ އެވެ. އީސްޓް އޭޝިއަން އިންސްޓިޓިއުޓްގެ ޖޭސަން ބެޑްފޯޑް ވިދާޅުވީ، މީގެ ކުރިން ކޮވިޑުގެ ދުވަސްވަރު ވެސް ޗައިނާ އިން މިފަދަ ލުއި އަމާޒުތަކެއް ގެންގުޅުނު ނަމަވެސް، މިއީ އާންމުކޮށް އެ ގައުމުން އަމަލުކުރާ އުސޫލެއް ނޫން ކަމަށެވެ.
ބޮޑުވަޒީރު ލީ ގާނޫނު ހަދާ މަޖިލީހުގެ މެންބަރުންނަށް ވިދާޅުވީ، ސަރުކާރުން އާ އީޖާދުތަކަށާއި ހައި-ޓެކް ސިނާއަތްތަކަށާއި ސައިންޓިފިކް ދިރާސާތަކަށް އިންވެސްޓް ކުރާނެ ކަމަށެވެ. ހަމަ އެއާ އެކު، އާންމު ގޭބިސީތަކުން ކުރާ ހޭދަކުރުންތައް އިތުރުކުރުމަށާއި ތިމާވެއްޓާ ރައްޓެހި ހަކަތަ ތަރައްގީކުރުމަށް ބާރުއަޅާނެ ކަމަށް ވެސް އޭނާ ވިދާޅުވި އެވެ.
ކުރިއަށް އޮތް ފަސް އަހަރުގެ ތެރޭގައި ސިނާއީ ގާބިލުކަމާއި އުމްރާނީ ތަރައްގީ ފުޅާކުރުމަށް 100އަށް ވުރެ ގިނަ ބޮޑެތި މަޝްރޫއުތައް ހިންގުމަށް ވަނީ ރޭވިފަ އެވެ.
ތަޖުރިބާކާރުން ދެކޭ ގޮތުގައި، މި އަމާޒުން ދޭހަވަނީ ދުނިޔޭގެ ދެވަނައަށް އެންމެ ބޮޑު އިގްތިސާދާ މެދު މިހާރު ގެންގުޅެނީ ވަރަށް ބޮޑަށް ސަމާލުވެގެން އެކުލަވާލާފައިވާ ސިޔާސަތެއް ކަމެވެ. ސިޔާސަތުތައް ދިރާސާކުރާ ޒޫ ޒެންގް ވިދާޅުވީ، މި އަމާޒުން ދޭހަވަނީ އެތެރޭގެ ގޮންޖެހުންތަކާއި ބައިނަލްއަގުވާމީ ވިޔަފާރީގެ ދަތިތަކާ ކުރިމަތިލާއިރު ބެއިޖިންއިން ހަގީގަތާ ކުރިމަތިލާން ތައްޔާރުވެފައިވާ މިންވަރު ކަމަށެވެ.