ލޯކަލް ގަވަމެންޓް މިނިސްޓްރީން މަޖީދީމަގުގެ ދެ ފަޅީގައިވާ ކާނުތައް މުޅިން ސާފުކޮށް ނިންމާލައިފި އެވެ.
ވީ ކިހިނެއް؟ - މާލޭ މަގުތަކުގެ ކާނުތައް ބެދޭވަރަށް ކުނި ޖަމާވެ، ފެން ހިންދުމުގެ މަސައްކަތް ކުރަން އުނދަގޫވާތީ ކާނުތައް ސާފުކުރުމުގެ ބޮޑު ހަރަކާތެއް ލޯކަލް ގަވަމެންޓް މިނިސްޓްރީން ފެށީ 8 މާޗުގަ އެވެ.
އެ ހަރަކާތް ފެށީ މަޖީދީމަގު، ލަގްޒަރީ ފިހާރަ ކުރިމަތިންނެވެ.
ތަފްސީލު - މިނިސްޓްރީން މިއަދު 'އެކްސް'ގައި ކުރި ޕޯސްޓެއްގައި ބުނީ އެ މަސައްކަތުގެ ތެރެއިން މަޖީދީމަގުގެ ދެ ފަޅީގައިވާ ކާނުތައް އެއްކޮށް ސާފުކޮށް ނިމިފައިވާ ކަމަށެވެ.
ލޯކަލް ގަވަރުމަންޓް މިނިސްޓްރީން މީގެ ކުރިން ބުނެފައިވާ ގޮތުގައި ވާރޭ ވެހޭ ކޮންމެ ފަހަރަކު މާލޭގެ މަގުތަކުގައި ފެންބޮޑުވެ، އާންމުންނަށް އެ ކަމުގެ އުނދަގޫ ޖެހޭ ކަމަށެވެ.
ސިފައިންނާއި، ފުލުހުން އަދި މިނިސްޓްރީން ނުކުމެ މާލޭގެ މަގުތަކުން ފެން ހިންދުމުގެ މަސައްކަތް ދޭތެރެދޭތެރެއިން ކުރަން ޖެހޭއިރު، ކާނުތައް ބެދިފައި ހުންނާތީ އެ މަސައްކަތަށް ދަތިތަކެއް ކުރިމަތިވެ އެވެ.