ރ. މަޑުއްވަރީގައި ތިން ދުވަސް ވަންދެން ކަރަންޓުގެ ހިދުމަތް މެދުކެނޑިފައި އޮތުމަށް ފަހު އިއްޔެ އަލުން ވެސް ހިދުމަތް ފޯރުކޮށްދޭން ފަައިފި އެވެ.
ފެނަކަ ކޯޕަރޭޝަނުން ބުނީ، މާޗު 27 ވަނަ ދުވަހުގެ ހަވީރު 4:30 ގައި އެ ރަށުން ކަރަންޓު ކަނޑައިގެން ދިޔުމަށް ފަހު އިއްޔެ އަލުން ކަރަންޓުގެ ހިދުމަތް ދޭން ފަށައިފައިވާ ކަމަށެވެ.
އެ ރަށުން ކަރަންޓުގެ ހިދުމަތް ކެނޑެން މެދުވެރިވީ، އެރަށުގައި ބޭނުން ކުރާ ޖެނެރޭޓަރުގެ ރަބަރު ހޯޅިއެއް ފަޅައިގެން ގޮސް ފެން ލީކު ވުމުގެ ސަބަބުންނެވެ. ފެނަކައިން ބުނީ، ކަރަންޓު ކެނޑުމަށްފަހު ވެސް، މާޗު 28 ވަނަ ދުވަހު އެރަށުގެ ދެ ލައިނަކަށް ކުޑަ ޖެނެރޭޓަރެއްގެ އެހީގައި ދެ ގަޑި ބަހައިގެން ކަރަންޓު ދީފައިވާނެ ކަމަށެވެ.
އަދި އިތުރު ޖެނެރޭޓަރެއްގެ އެހީގައި އިއްޔެ މެންދުރު ފަހު 3:00 އިން ފެށިގެން ރަށަށް ކަރަންޓުގެ ހިދުމަތް ފޯރުކޮށްދެން ފަށާފައިވާ ކަމަށެވެ. މައްސަލަ ޖެހުނު ޖެނެރޭޓަރު މަރާމާތު ކުރުމުގެ މަސައްކަތް ކުރާ ކަމަށް ވެސް ބުންޏެވެ.