އައްޑޫގައި ކަރަންޓް ބިލް ނުދައްކައިގެން ހިދުމަތް މެދުކަނޑާލުމުން، އަލުން ގުޅައިދޭ އަގު މިއަދުން ފެށިގެން ދެ ގުނަ ބޮޑުކޮށްފި އެވެ. ކުރިން މި ހިދުމަތަށް ނަގަމުން އައީ 25ރ. އެވެ.
އައްޑޫގައި ކަރަންޓްގެ ހިދުމަތް ދޭ ފެނަކަ ކޯޕަރޭޝަނުން ނެރުނު ނޯޓިހެއްގައި ބުނެފައި ވަނީ ރިކަނެކްޝަން ފީ ބޮޑުކުރީ، ކުންފުނީގެ ހުރިހާ ކަސްޓަމަރުންނަށް އެއް އުސޫލަކުން ހިދުމަތް ދޭން ކަމަށެވެ. އެގޮތުން ސިންގަލް ފޭސް ކަރަންޓްގެ ރިކަނެކްޝަނަށް ކުރިން 25ރ. ނެގި ނަމަވެސް މި މަހުން ފެށިގެން، ނަގާނީ 50ރ. ކަމަށް އެ ކުންފުނިން ބުނެ އެވެ. އެހެން ނަމަވެސް ބިލް ދައްކަން އޮންނަ މުއްދަތުގެ ތެރޭގައި ބިލް ނުދެއްކުމުން ޗާޖްކުރާ ދެ ޕަސެންޓް ޖޫރިމަނާ އާއި ރިކަނެކްޝަން ފީ ހިމަނާނީ ޖެހިގެން އަންނަ މަހުގެ ބިލްގައި ކަމަށް ފެނަކަ އިން ބުންޏެވެ.
ފެނަކައިން އައްޑޫގެ ކަރަންޓްގެ ހިދުމަތަށް މިފަދަ ބަދަލެއް ގެނައިއިރު، އައްޑޫގެ ކަރަންޓްގެ ހިދުމަތް މޯލްޑިވްސް ވޯޓަ އެންޑް ސްވަރެޖް ކޮމްޕެނީ (އެމްޑަބްލިއުއެސްސީ) އާ ހަވާލު ކުރަން ސަރުކާރުން ވަނީ ނިންމައިފަ އެވެ.