އަންނަ ހޮނިހިރު ދުވަހު ބާއްވަން ހަމަޖައްސާފައިވާ ރިޔާސީ އިންތިޚާބުގެ ދެ ވަނަ ބުރުގެ ވޯޓު ފަސްކުރަން ސުޕްރީމް ކޯޓުން މިއަދު އަމުރު ނެރުމަކީ ޑިމޮކްރެސީގައި ކުރި ޓެސްޓެއް ކަމަށް ކޯޓަށް މައްސަލަ ހުށަހެޅި ޖުމްހޫރީ ޕާޓީގެ ކެންޑިޑޭޓް އަދި އިންތިޚާބުގައި ހަނި ގޮތަކުން ނާކާމިޔާބުވެވަޑައިގެންނެވި ގާސިމް އިބްރާހީމަށް ތާއީދުކުރައްވާ އުމަރު ނަސީރު މިރޭ ވިދާޅުވެއްޖެ އެވެ.ވީޓީވީގައި ވާހަކަ ދައްކަވަމުން އޭނާ ވިދާޅުވީ 2008ގެ ރިޔާސީ އިންތިޚާބުގައި ވެސް މަކަރު ހަދައި އޮޅުވާލި ކަމަށާއި އެކަމަކު އެފަހަރު އެއްވެސް ބަޔަކު އެކަމަށް ޗެލެންޖު ނުކުރުމުން އެކަން ނިމުނީ ކަމަށެވެ. އެކަމަކު މިފަހަރު ވެސް އެފަދަ ތުހުމަތުތަކެއް ޖުމްހޫރީ ޕާޓީން ކުރުމުން ސުޕްރީމް ކޯޓުން އެކަން ވަރަށް ފުންކޮށް ދިރާސާކުރި ކަމަށް އުމަރު ވިދާޅުވި އެވެ."މިއީ އަދި ކޮންމެހެން އަޅުގަނޑުމެންނަށް މައްސަލަ ކާމިޔާބުވީކީ ވެސް ނޫން. އަދި ވަކި ކޮންކްލޫޝަނަކަށް ސުޕްރީމް ކޯޓުން ވަޑައިގެންނެވީކީ ވެސް ނޫން. މި އަމުރު މި ނެރުއްވީ ވަރަށް ގިނަ ބެއްލެވުންތައް ބެއްލެވުމަށް ފަހު. އެހެންވީމާ މި އަމުރު މިއީ ޑިމޮކްރެސީ އަށް ކުރެވުނު ވަރަށް މުހިންމު ޓެސްޓެއް،" އޭނާ ވިދާޅުވި އެވެ.އުމަރު ވިދާޅުވި ގޮތުގައި ސުޕްރީމް ކޯޓުގެ އަމުރުން އެނގުނީ އެއީ މިނިވަން ތަނެއް ކަމެވެ. އަދި އެ ކޯޓުގެ ފަނޑިޔާރުން އަމުރު ނެރުއްވަނީ "ހައްގަށް" ކަން މިއަދު އެނގިއްޖެ ކަމަށް އޭނާ ވިދާޅުވި އެވެ.ސުޕްރީމް ކޯޓުގެ ހަތް ފަނޑިޔާރުންގެ ތެރެއިން ހަތަރު ފަނޑިޔާރަކު
ސޮއިކުރައްވައި ނެރުއްވި އަމުރުގައި ވަނީ އެ ކޯޓުން ބަލަމުން ދާ މައްސަލަ
ވަކި ގޮތަކަށް ނިމެންދެން، ގާނޫނު އަސާސީގެ 144 ވަނަ މާއްދާގެ ށ. ގެ
ދަށުން، އިންތިޚާބު ފަސްކުރަން އިލެކްޝަންސް ކޮމިޝަނަށާއި ދައުލަތުގެ ކަމާ
ބެހޭ ފަރާތްތަކަށް އަމުރުކުރާ ކަމަށެވެ.އުމަރު ވިދާޅުވީ "ދިވެހިރާއްޖޭގެ ޑިމޮކްރެސީ ޓެސްޓް ކުރުމުގައި ޖުޑީޝަރީގެ މިނިވަންކަން މިއަދު ގާއިމްވެގެން ދިޔައީތީ" އުފާ ކުރައްވާ ކަމަށެވެ.އޭނާ ވިދާޅުވީ ކުރިއަށް އޮތް ތަނުގައި ރާއްޖޭގައި ވޯޓު އޮޅުވާލައިގެން ކަންކަން ނުކުރެވޭނެކަން އެކަން ކުރާ މީހުންނަށް މިހާރު އެނގޭނެ ކަމަށެވެ. އަދި ޝަރުއީ ނިޒާމުން ރައްޔިތުންގެ ހައްގުތައް ހިފަހައްޓާނެކަން ވެސް މިއަދު އެނގިއްޖެ ކަމަށް އުމަރު ވިދާޅުވި އެވެ.އޭނާ ވިދާޅުވީ ވޯޓުލާ މީހުންގެ ލިސްޓަށް ތަފާތު ބަދަލުތައް ގެނެސްގެން ވޯޓު އޮޅުވާލުމަކީ މި ޒަމާނުގައި ވޯޓު އޮޅުވާލާ ގޮތް ކަމަށެވެ. އަދި އޭގެ މިސާލެއްގެ ގޮތުގައި އުމަރު ނެންގެވީ ޒިމްބާބުވޭ އެވެ."އަޅުގަނޑު ދަންނަވާނީ ދިވެހިރާއްޖޭގައި މިކަން [ވޯޓު އޮޅުވާލުން] އަޅުގަނޑުމެން ދެނެގަނެ، އަޅުގަނޑުމެން އިސްވެ ނުކުމެ ހޯދައި ދެނެގަނެވުނުކަން މިއީ އަޅުގަނޑުމެންގެ ޑިމޮކްރެސީ އަށް ލިބުނު ވަރަށް ބޮޑު ކުރިއެރުމެކޭ. އަދި މި ހޯދައި ނުގަނެވުނު ނަމަ ކޮންމެ ފަހަރަކު ވެސް މިކަން ކުރުމުގެ ފުރުސަތު މިކަން ކުރާ ބަޔަކަށް އޮތީހީ،" އޭނާ ވިދާޅުވި އެވެ.ގާސިމް ވިދާޅުވީ "އުސޫލުތަކުގެ ތެރެއިން އަޅުގަނޑަށް ސުން ވޯޓު" ލިބިވަޑައިގެންނެވި ނަމަވެސް ހުންނަވާނީ ވަރަށް އުފަލުން ކަމަށެވެ. ގާސިމް ވިދާޅުވީ ލިބިވަޑައިގެންނެވި ވޯޓު މަދުވެގެން ދެރަނުވާ ކަމަށެވެ. އެހެން ނަމަވެސް ދެރަވީ ގާނޫނު އަސާސީތަކާއި ގާނޫނުތަކާއި ގަވާއިދުތަކުގެ ބޭރުން ކަންތައްތަކެއް ކުރުމުން ކަމަށް އޭނާ ވިދާޅުވި އެވެ.