ސްކޫލް ކުދިންނަށް ހާއްސަކޮށް ރާއްޖޭގައި ފުރަތަމަ ފަހަރަށް ދެވޭ އެވޯޑް "މައިލޯ ކަލާސް އެވޯޑް" ހަފުލާ އޮގަސްޓް 10 ވަނަ ދުވަހު ބާއްވަން އެޑިއުކޭޝަން މިނިސްޓްރީން ނިންމައިފި އެވެ. މިނިސްޓްރީން ބުނީ ދަރުބާރުގޭގައި ބާއްވާ މި ކުލަގަދަ އެވޯޑް ހަފުލާ ޝަރަފްވެރިކޮށްދެއްވާނީ ރައީސުލްޖުމްހޫރިއްޔާގެ ދެކަނބަލުން ކަމަށެވެ. މިއީ ސްކޫލްތަކުގެ ދަރިވަރުންގެ ތެރެއިން އެކި ކުޅިވަރުން ރަން ވަނަ ހޯދާ ދަރިވަރުންނަށް އެ ކުދިންގެ ކާމިޔާބީ ގައުމީ ފެންވަރެއްގައި ފާހަގަކުރުމުގެ ގޮތުން މިނިސްޓްރީން ތައާރަފްކުރި އެވޯޑެކެވެ. މި އެވޯޑް ސްޕޮންސާކޮށްފައިވަނީ ނެސްލޭ މައިލޯ އިންނެވެ. މި ފަހަރު 10 ކުޅިވަރަކުން އެވޯޑް ދޭނެ އެވެ. އެ ކުޅިވަރުތަކަކީ އެތުލެޓިކްސް، ބެޑްމިންޓަން، ފުޓްބޯޅަ، ޓެނިސް، ވޮލީބޯޅަ، ޓޭބަލް ޓެނިސް، ކްރިކެޓް، ފެތުން، ނެޓްބޯޅަ އަދި ބާސްކެޓްބޯޅަ އެވެ. މި އެވޯޑަށް ކުރިމަތިލުމުގެ ފުރުސަތު މޭ 24 އިން ޖުލައި 17 އަށް މިނިސްޓްރީން ހުޅުވާލައިރު އެ މުއްދަތުގެ ތެރޭގައި 27 ސްކޫލަކުން 158 ދަރިވަރުން ވަނީ ކުރިމަތިލައިފަ އެވެ. އެއީ 90 އަންހެން ދަރިވަރުންނާއި 68 ފިރިހެނުން ދަރިވަރުންނެވެ. މިނިސްޓްރީން ބުނީ މި އެވޯޑަށް ނަން ހުށަހެޅި ކުދިންގެ ތެރެއިން ވަނަ ވަނަ އަށް އަންނަ ކުދިން ލިސްޓް ކުރުމުގެ މަސައްކަތް މިނިސްޓްރީގެ އިވެލުއޭޝަން ކޮމިޓީން އަންނަނީ ކުރަމުން ކަމަށާއި އެވޯޑަށް ހޮވޭ ކުދިން ކަނޑައެޅުމުގައި ބަލާނީ ޕޮއިންޓް އުސޫލަށް ކަމަށެވެ. އެގޮތުން ސްކޫލް ފެންވަރުގައި އާއި ގައުމީ ފެންވަރުގައި އަދި ބައިނަލްއަގްވާމީ ފެންވަރުގައި ކާމިޔާބީ ހޯދާފައިވާ ދަރިވަރުންނަށް އިސްކަންދޭނެ ކަމަށް ބުނެ އެވެ.