ކުރީގެ ހޯމް މިނިސްޓަރު އުމަރު ނަސީރުގެ ނަމުގައި މިހާރު ދައުރުވަމުންދާ ޓްވީޓަކީ ފޭކް އެކައުންޓަކުންކޮށްފައިވާ ހަގީގަތެއް ނެތް ވާހަކަތަކެއް އެކުލެވޭ ޓްވީޓެއްކަމަށް އެމަނިކުފާނު ވިދާޅުވެއްޖެއެވެ.
އުމަރު ވިދާޅުވީ ގުޅިފައިވާ ސިޔާސީ ޕާޓީތަކުން މިރޭ ބޭއްވި ޖަލްސާގައި ރައީސް މައުމޫން ބައިވެރިވެވަޑައިގަތުމުން އެކަމާއި ގުޅޭގޮތުން އުމަރު ކުރައްވާފައިވާ ޓްވީޓެއްކަމަށް ބުނެ ދައުރުވަމުންދަނީ ފޭކް ޓްވީޓެއްކަމަށެވެ.
ދައުރުވަމުންދާ ޓްވީޓްގައި ބުނެފައިވަނީ ރައީސް މައުމޫން މިރޭ އެމްޑީޕީއާއިއެކު ބައިއަތު ހިފި ހިސާބުން އުމަރު ދެން ދުވަހަކުވެސް މައުމޫނަށް ތާއީދު ނުކުރަން ނިންމާފައިވާކަމަށެވެ.
ރައީސް މައުމޫނާއިއެކު މަސައްކަތް ކުރެއްވި އަދި ރައީސް މައުމޫނަށް އަދިވެސް ތާއީދުކުރައްވާކަމަށް ވިދާޅުވާ އުމަރު މިރޭ ވިދާޅުވީ އެ ޓްވިޓަކީ ފޭކް ޓްވީޓެއްކަމަށާ އެކަން ރައްޔިތުންގެ މައުލޫމާތަކަށްޓަކައި ދަންނަވާކަމަށެވެ.