ލ. ގަމުން އަހުމަދު ހަމްދޫން
00: 2 - ޔުޓިލިޓީޒް ކުންފުނީގެ ޗެއާމަން އަހުމަދު ނަޝީދު މާލޭގައި ހުންނަވައިގެން ފޯނުން ހަވީރަށް ވިދާޅުވީ އިސްދޫ މީހުންނާ ޖެނެރޭޓަރު މިހާރު ހަވާލުކޮށްފައިވާ ކަމަށް ގަމުން މައުލޫމާތު ލިބިވަޑައިގެންފައިވާ ކަމަށެވެ.
ނަޝީދު ވިދާޅުވިގޮތުގައި އިންޖީނު ހަވާލުނުކުރެވި ލަސްވީ "އިންޖީނެއް ހަވާލުކުރުމަކީ އެންމެ ރަނގަޅު ހައްލު ނޫން ކަމަށް ބައެއް މީހުންނަށް ފެނުމުން" ކަމަށެވެ. އެކަމާ މެދު ޚިޔާލުތަފާތުވީ ކޮން ބައެއް ކަމެއް ނަޝީދު ވިދާޅެއް ނުވެ އެވެ.
"ކުންފުނީގެ ބޯޑުގެ މެޖޯރިޓީ އަށް ފެނުނީ އެންމެ ރަނގަޅު ހައްލަކީ އިންޖީނެއް ދިނުން ކަމަށް. ނަމަވެސް އިންޖީނެއް ހަވާލުކުރުމަކީ އެންމެ ރަނގަޅު ހައްލު ނޫން ކަމަށް ބައެއް މީހުންނަށް ފެނުމުން މި ލަސްވީ. މިހާރު އިންޖީނު ހަވާލުކޮށްފައިވާ ކަމަށް ގަމުން އަޅުގަނޑަށް މައުލޫމާތު ލިބިފައިވަނީ،" ނަޝީދު ވިދާޅުވި އެވެ. "އަޅުގަނޑުމެން މި ހަވާލުކުރީ 160 ކޭވީގެ ޖެނެރޭޓަރެއް. އިސްދޫގައި ކަރަންޓުގެ އެހެން މައްސަލަތަކެއް ވެސް ހުރެދާނެ. ނަމަވެސް ރައްޔިތުން ބޭނުންވީ ޖެނެރޭޓަރެއް. އެހެންވީމާ ޖެނެރޭޓަރެއް ހަވާލުކުރަން ނިންމީ."
18: 1 - ލ. އިސްދޫން ދޭތެރެދޭތެރެއިން ކަރަންޓް ކަނޑައިގެން ދާތީ އެ ރަށު ބަޔަކު ގަމުގައި ހުންނަ ސައުތު ސެންޓްރަލް ޔުޓިލިޓީޒް ކައިރިއަށް މީގެ ކުޑައިރުކޮޅެއް ކުރިން އެއްވެއްޖެ އެވެ. އެ މީހުންނާއެކު އިސްދޫ ކައުންސިލް މެމްބަރުން ވެސް ގަމަށް ވަޑައިގެންނެވި އެވެ.
މަސް ދޯންޏެއްގައި ދޮޅު ގަޑިއިރުގެ ދަތުރެއް ކުރުމަށް ފަހު މި ރަށަށް އައި އިސްދޫ މީހުން ބުނި ގޮތުގައި މިއަދު މެންދުރެއްހާއިރުން ފެށިގެން އެ ރަށުން ދަނީ ކަރަންޓް ކެނޑެމުންނެވެ. އަދި މިހާރު ވެސް އޮތީ މުޅި ރަށުން ކަރަންޓް ކަނޑައިގެން ގޮސްފައި ކަމަށް އެ މީހުން ބުނެ އެވެ.
"މިއަދު 11 ފަހަރު ކަރަންޓް ކަނޑައިގެން ހިނގައްޖެ. ދޮޅުމަހެއްހާ ދުވަސް ވެއްޖެ މި ގޮތަށް ރަށުން ކަރަންޓް ކަނޑައިގެންދާތާ،" ޔުޓިލިޓީޒް އޮފީސް ކައިރީގައި ހުރި އަބްދުއް ރަޝީދު ބުންޏެވެ.
އިސްދޫ މީހުން ޔުޓިލިޓީޒް ކުންފުނި ކައިރިއަށް އެއްވުމާ ގުޅިގެން އިސްދޫ ކައުންސިލަރުންނާއި ޒިންމާދާރުވެރިޔާ އަދި އެ ކުންފުނީގެ ވެރިން މިހާރު ވަނީ ޔުޓިލިޓީސް ކުންފުނީގެ އޮފީހުގައި ބައްދަލުވުމެއް ފައްޓަވައިފަ އެވެ.
"އަޅުގަނޑުމެން މި އިންތިޒާރު ކުރަނީ އެ ބައްދަލުވުން ނިމޭނެ އިރަކަށް،" އަބްދުއް ރަޝީދު ބުންޏެވެ.
އޭނާ ބުނިގޮތުގައި ކަރަންޓްގެ މައްސަލަ ނުކުންނަން ފެށީ ދެ ޖަނެރޭޓަރުގެ ތެރެއިން އެއް ޖަނެރޭޓަރު ހަލާކުވުމުންނެވެ. އަދި މިހާރު ބޭނުން ކުރަމުން ގެންދަނީ 160 ކޭވީގެ ޖަނެރޭޓަރެއް ކަމަށް އެ މީހުން ބުނެ އެވެ.
"އަޅުގަނޑުމެން މި ރަށަށް އައީ ޖަނެރޭޓަރެއް ދޭނަމޭ ބުނެގެން. ޗެއާމަން ވިދާޅުވީ ޖަނެރޭޓަރެއް ދޭނަމޭ. އެހެންވެ އެ ޖަނެރޭޓަރު ބަލާ އަޅުގަނޑުމެން އައީ،" ކުރިން ވާހަކަ ދެއްކި އަބްދުއް ރަޝީދު ބުންޏެވެ. "ފަހުން މިކޮޅަށް އައީމަ ބުނީ ބައްދަލުވުމެއް ބާއްވާފައޭ ގޮތެއް ނިންމާނީ."