ށ. ފޯކައިދޫގައި އިސްލާމީ މަރުކަޒެއް އަޅައި، 11 ރަށެއްގައި މިސްކިތް އަޅަން އިސްލާމީކް މިނިސްޓްރީން މިއަދު ހަވާލުކޮށްފިއެވެ. އިސްލާމީ މަރުކަޒުގެ ހޯލުގައި މިއަދު އޮތް ރަސްމިއްޔާތެއްގައި މަސައްކަތްތައް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެޗްޓިން ކޮމްޕެނީ (އެމްޓީސީސީ) އާއި ފެނަކަ ކޯޕަރޭޝަން ލިމިޓެޑާއެވެ. އިސްލާމިކް މިނިސްޓްރީގެ ފަރާތުން އެއްބަސްވުންތަކުގައި ސޮއި ކުރެއްވީ މިނިސްޓަރު ޑރ. މުޙައްމަދު ޝަހީމް ޢަލީ ސައީދެވެ. އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު ޑީސީޕީ (ރޓޑ) އަޙުމަދު ސައުދީ ކަމަށްވާއިރު، ފެނަކަގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު މޭޖަރު (ރޓޑ) މުހައްމަދު ނަޖާހެވެ. ފޯކައިދޫގައި އިސްލާމީ މަރުކަޒު އެޅުމުގެ މަސައްކަތް ހަވާލުކުރީ ފެނަކައާއެވެ. އެއީ ދެ އަހަރާއި ފަސް މަހުގެ ތެރޭގައި މަސައްކަތް ނިންމާ ގޮތަށެވެ. އިސްލާމިކް މިނިސްޓްރީން ބުނީ އަށް މިސްކިތް އިމާރާތް ކުރުމަށް ފެނަކައާ ހަވާލުކުރިއިރު ބާކީ ތިން މިސްކިތް އިމާރާތް ކުރުމަށް ހަވާލުކުރީ އެމްޓީސީސީއާ ކަމަށެވެ. އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު: 11 މިސްކިތް އިމާރާތްކުރުމުގެ މަޝްރޫއު އެމްޓީސީސީއާއި ފެނަކައާ ވަނީ ހަވާލުކޮށްފައި --- ފޮޓޯ/އިސްލާމިކް މިނިސްޓްރީ އެގޮތުން ފެނަކައިން ހަވާލުވި މިސްކިތްތައް: ތ. ހިރިލަންދޫގައި 500 މީހުންގެ ޖާގައިގެ މިސްކިތް އެއް އަހަރު ދުވަހުތެރޭގައި ނިންމާ ގޮތަށް ސ. ފޭދޫ ހިއްކި ސަރަޙައްދުގައި 500 މީހުންގެ ޖާގައިގެ މިސްކިތެއް އެއް އަހަރު ތެރޭގައި ނިންމާ ގޮތަށް ނ. ހެނބަދޫގައި 500 މީހުންގެ ޖާގައިގެ މިސްކިތެއް އެއް އަހަރު ތެރޭގައި ނިންމާ ގޮތަށް ތ. ވޭމަންޑޫގައި 500 މީހުންގެ ޖާގައިގެ މިސްކިތެއް 550 ދުވަހުން ނިންމާ ގޮތަށް ރ. އިނގުރައިދޫގައި 500 މީހުންގެ ޖާގައިގެ މިސްކިތެއް އެއް އަހަރު ތެރޭގައި ނިންމާ ގޮތަށްގޮތަށް ހދ. ނެއްލައިދޫގައި 500 މީހުންގެ ޖާގައިގެ މިސްކިތެއް އެއް އަހަރު ތޭރޭގައި ނިންމާ ގޮތަށް ށ. ނޫމަރާގައި 300 މީހުންގެ ޖާގައިގެ މިސްކިތެއް 550 ދުވަހުން ނިންމާ ގޮތަށް ބ. ކުޑަރިކިލުގައި 500 މީހުންގެ ޖާގައިގެ މިސްކިތެއް އެއް އަހަރު ތެރޭގައި ނިންމާ ގޮތަށް އެމްޓީސީސީއާ ހަވާލުކޮށްފައިވަނީ، ހއ. ބާރަށާއި ބ. މާޅޮހާއި އއ. ފެރިދޫގައި 500 މީހުންގެ ޖާގައިގެ މިސްކިތްތައް އެޅުމަށެވެ. އެ މަސައްކަތްތައް ވެސް ހަވާލުކުރީ އެއް އަހަރުގެ ތެރޭގައި ނިންމާ ގޮތަށެވެ. މީގެ އިތުރުން ލ. މާބައިދުއާއި ޅ. އޮޅުވެލިފުށީގައި ޤުރުއާނާބެހޭ މަރުކަޒުގެ ދެ ގޮފި އިމާރާތްކުރުމުގެ މަސައްކަތް ވެސް ފެނަކައާ ވަނީ ހަވާލުކޮށްފައެވެ. އެ މަސައްކަތް ހަވާލުކުރީ ދެ ރަށުގައި ވެސް އަހަރެއް ތެރޭ މަޝްރޫއު ނިންމާ ގޮތަށެވެ. މާލޭގައި ހުންނަ އިސްލާމީ މަރުކަޒުގެ އިތުރަށް މަރުކަޒެއް އަޅައި، ޤުރުއާނާބެހޭ މަރުކަޒުގެ ގޮފިތައް އިތުރުކުރުމަކީ ރައީސް ޑރ. މުޙައްމަދު މުއިއްޒުގެ ވައުދުފުޅުތަކުގެ ތެރޭގައި ހިމެނޭ ކަންތައްތަކެވެ.