ސްރީ ލަންކާއަށް މިހާރު ކުރަމުންދާ ވިއްސާރައިގައި ހާލުގައި ޖެހިފައިވާ މީހުންނަށް އެހީ ފޯރުކޮށްދިނުމުގެ މަސައްކަތުގައި އުޅުނު ހެލިކޮޕްޓަރެއް ވެއްޓި, ޕައިލެޓް މަރުވެއްޖެއެވެ. އެއާފޯސްގެ ބެލް 212 ހެލިކޮޕްޓަރު ވެއްޓުނީ މިއަދު ހަވީރު ވެނާޕޫވާގައި ރެސްކިއު މަސައްކަތުގައި އުޅެނިކޮށެވެ. އޭރު ހެލިކޮޕްޓަރު ދުއްވަން އިން އިލެޓް ވިންގް ކޮމާންޑަރު ނިރްމަލް ސިޔަމްބަލަޕިޓްޔާ މަރުވީ ހޮސްޕިޓަލްގައި ފަރުވާ ދެމުން ދަނިކޮށެވެ. އޮފިޝަލުން ބުނި ގޮތުގައި ޕައިލެޓް ވަނީ މައްސަލައެއް އުޅޭ ކަމަށް ބުނެ، އިމާޖެންސީގައި އުޅަނދު ޖައްސަން މަސައްކަތްކޮށްފައެވެ. އަދި ޖައްސަން އުޅުނީ މީހުން ތިބި ބްރިޖަކާ ދުރަށް ކަމަށް އޮފިޝަލުން ބުނެއެވެ. ލަންކާގެ މަގެއްގައި ފެންބޮޑުވެފައި. ފޮޓޯ/ގެޓީ ހެލިކަޕްޓަރު ވެއްޓުނުއިރު އޭގައި ފަސް މީހުން ތިބި ކަމަށާއި، އުޅަނދު ވެއްޓުމާއެކު ރެސްކިއު ޓީމުތަކުން ހަރަކާތްތެރިވެ އެ މީހުން ހޮސްޕިޓަލަށް ގެންދިޔަ ކަމަށް އޮފިޝަލުން ބުންޏެވެ. ލަންކާ އެއާފޯސްއިން ވަނީ، ބޯޓު ވެއްޓުނު ސަބަބު ދެނެގަތުމުގެ ތަހުގީގެއް ކުރަމުން އަންނަ ކަމަށް ބުނެފައެވެ. ތޫފާން 'ދިތުވާ'ގެ ސަބަބުން ބޯކޮށް ވާރޭ ވެހި، ބިންގަނޑު ކަނޑައިގެން ދިއުމުގެ ސަބަބުން ހިނގި އެކި ހާދިސާތަކުގައި މަރުވި މީހުންގެ އަދަދު މިހާރު ވަނީ 334 އަށް އަރައިފައެވެ. އަދި ގެއްލުނު މީހުންގެ އަދަދު ވަނީ 370އަށް ވުރެ އިތުރުވެފައެވެ. ތޫފާންގެ ސަބަބުން ލަންކާގެ 230،000 އަށް ވުރެ ގިނަ އާއިލާއަށް ގެއްލުން ލިބިފައިވާ ކަމަށް އެ ގައުމުގެ ނޭޝަނަލް ރިލީފް ސާވިސް ސެންޓަރުން ވަނީ ހާމަކޮށްފައެވެ.