ލަންކާއަށް އެހީވާން ކުރިއަށް ގެންދާ ޓެލެތޯންގެ މުއްދަތު އިތުރުކޮށްފި

ތޫފާން 'ދީތުވާ'ގެ ސަބަބުން ސްރީ ލަންކާގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގެ ގޮތުން ރާއްޖޭގެ ގިނަ މީޑިއާތަކެއްގެ ބައިވެރިވުމާއެކު "ސިލޯނާއެކު ދިވެހީން"ގެ ނަމުގައި ބާއްވާ ޓެލެތޯން ހުއްޓާނުލައި، މާދަމާގެ 14:00އާ ހަމައަށް ކުރިއަށް ގެންދަން ނިންމައިފިއެވެ. މިއަދު ހެނދުނު 09:00 ފެށި، މި ޓެލެތޯން ކުރިއަށް ގެންދަން ނިންމާފައި އޮތީ، މިރޭ 1:00އާ ހަމައަށެވެ. އެކަމަކު، މި ހަރަކާތް އިންތިޒާމު ކުރާ ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު އަބްދުﷲ ޔާމީން ރަޝީދު މިރޭ ވަނީ، ޓެލެތޯންގެ މުއްދަތު އިތުރުކުރިކަން ހާމަކުރައްވާފައެވެ. އެގޮތުން، މިހާތަނަށް އައިއިރު، އާންމުންގެ ފަރާތުން ބޮޑު ތަރުހީބެއް ލިބެމުން އަންނަ ކަމަށާއި މާދަމާގެ 14:00އާ ހަމައަށް ޓެލްތޯން ކުރިއަށް ގެންދަން ނިންމާފައިވާ ކަމަށް ޔާމީން ވިދާޅުވިއެވެ. އެގޮތަށް ނިންމުމުގައި ބައިވަރު ސަބަބުތަކެއް އެބަހުރި ކަމަށް އޭނާ ވިދާޅުވިއެވެ. އެއް ކަމަކަށް އޭނާ ފާހަގަކުރެއްވީ، ގައުމީ ބޭންކް، ބީއެމްއެލްގެ އެޕަށް ދިމާވި މައްސަލައަކާ ގުޅިގެން ގިނަ ބަޔަކަށް ޓްރާންސްފާ ކުރުމުގައި ދަތިތަކެއް ދިމާވި ކަމެވެ. "އެހެންވީމަ އެ ބޭފުޅުންނަށް އިތުރު ފުރުސަތު ވެސް ހަމަ ދޭން އެބަ ޖެހޭ. އަދި، ވަރަށް ގިނަ އިދާރާތަކުން ވެސް އެބަ ބޭނުންވޭ މިކަމުގަ ޝާމިލުވާން" އޭނާ ވިދާޅުވިއެވެ. އޭގެއިތުރަށް، ޓެލެތޯންގެ މުއްދަތު އިތުރުކުރީ ގިނަ ބަޔަކު އެކަމަށް އެދޭތީކަން ޔާމީން ފާހަގަކުރެއްވިއެވެ. މި ޓެލެތޯންއަށް މިހާތަނަށް 3.24 މިލިއަނަށް ވުރެ ގިނަ ރުފިޔާއާއި 38،531އަށްވުރެ ގިނަ ޑޮލަރު ވަނީ ހަދިޔާކޮށްފައެވެ. އޭގެތެރޭގައި، އެކި އިދާރާތަކާއި ޖަމިއްޔާތަކުން ހަދިޔާކުރި ފައިސާތައް ހިމެނެއެވެ. އެގޮތުން، ބައެއް ކުންފުނިތަކުން އަންނަނީ ބޮޑެތި އަދަދުތަކުން ފައިސާ ހަދިޔާކުރަމުންނެވެ. ޓެލެތޯނުގައި ސަން ސިޔާމް މީޑިއާއިން ވެސް ބައިވެރިވާއިރު، ޓެލެތޯނުގެ އެންމެހާ އަދާހަމަތައް ސަން އޮންލައިނާއި އެސްއެސްޓީވީ މެދުވެރިކޮށް ގެނެސްދޭނެއެވެ. މި ޓެލެތޯނުގައި ބައިވެރިވުމުގެ ފުރުސަތު މިހާރު ވެސް އޮތީ ހުޅުވާލައިފައެވެ. އެގޮތުން ޖަމިއްޔާ ޖަމާއަތްތަކަށާއި، ސަރުކާރު އޮފީސްތަކުގެ އިތުރުން އަމިއްލަ ކުންފުނިތަކަށް ވެސް އެ ފުރުސަތު އެބައޮތެވެ. 'ސިލޯނާއެކު ދިވެހީން' ޓެލެތޯންއަށް އެހީވެވޭނީ: ރުފިޔާ އެކައުންޓު ނަން: ސިލޯންއާ އެކު ދިވެހިން ރުފިޔާ އެކައުންޓު ނަމްބަރު :7730000796107 ޑޮލަރު އެކައުންޓު ނަން: ސިލޯންއާ އެކު ދިވެހިން ޑޮލަރު އެކައުންޓު ނަމްބަރު: 7730000796106 ޓީވީ ސްކްރީނަށް އަރާ ކިއުއާރް ކޯޑު ޕީއެސްއެމްގައި ބަހައްޓާފައިވާ ފަންޑް ފޮށި މާލެ، ހުޅުމާލެ އަދި ވިލިމާލޭގައި ބަހައްޓާފައިވާ ފަންޑް ފޮށިތައް
އަރުޝީފަށް ނެގީ
އެންމެފަހުން އަޕްޑޭޓްކުރީ