ބ.އޭދަފުށީ ޑޭޒީވިލާ، މުހައްމަދު އަލީ އަވަހާރަވުމާ ގުޅިގެން، ރައީސް ޑރ. މުހައްމަދު މުއިއްޒު އެ ބޭފުޅާގެ އާއިލާއަށް ތައުޒިޔާ ވިދާޅުވެއްޖެއެވެ.
އެމަނިކުފާނު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މުހައްމަދު އަލީ އަކީ އޭދަފުށީގެ ތަރައްގީއަށާއި، ވިޔަފާރިއާއި ދަތުރުފަތުރާއި މަސްވެރިކަން ކުރިއެރުވުމަށް މަސައްކަތްކޮށް ދެއްވި ބޭފުޅެއް ކަމަށެވެ.
އޭގެ އިތުރުން އިޖްތިމާއީ ކަންކަމަށާއި، ހާއްސަކޮށް މިސްކިތް ބިނާކުރެއްވުމާއި އިސްލާމްދީނަށް ހިދުމަތް ކުރެއްވުމަށް މުޅި ރާއްޖެއަށް ނަމޫނާ ދެއްކެވި ބޭފުޅެއް ކަމަށް ރައީސް ވަނީ ވިދާޅުވެފައެވެ.
”ބ.އޭދަފުށްޓަށް ގިނަގުނަ ހިދުމަތްތަކެއް ކޮށްދެއްވާފައިވާ ގަދަރުވެރި ބޭފުޅެއް ކަމުގައިވާ، އެ ރަށު ޑޭޒީވިލާ، މުހައްމަދު އަލީ އަވަހާރަވުމުގެ ހިތާމައިގާ އެ އާއިލާއަށް ތައުޒިޔާ ދަންނަވަން،“ ރައީސް ވިދާޅުވެފައިވެއެވެ.
ރައީސް ވިދާޅުވެފައިވަނީ މުހައްމަދު އަލީއަކީ އޭދަފުށީގެ ތަރައްގީއަށާއި އެ ރަށުގައި ވިޔަފާރިއާއި ދަތުރުފަތުރާއި މަސްވެރިކަން ކުރިއެރުވުމަށާއި އިޖްތިމާއީ ކަންކަމަށާއި މިސްކިތް ބިނާކުރެއްވުމާއި އިސްލާމް ދީނަށް ހިދުމަތް ކުރެއްވުމަށް މުޅި ރާއްޖެއަށް ނަމޫނާ މަސައްކަތްތަކެއް ކޮށްދެއްވި ފަރާތެއް ކަމުގައެވެ.
އަދި މާތްﷲގެ ރުއްސެވުމާއި ފުއްސެވުމުގައި، ސުވަރުގޭގެ ދާއިމީ ނިއުމަތުގައި، މަރްހޫމް މުހައްމަދު އަލީ ލެހެއްޓެވުން އެދި ރައީސް ދުޢާ ކުރެއްވެވިއެވެ.