ލަންކާއަށް އެހީވާން އާރްޑީސީގެ މުވައްޒަފުންގެ އެއް ދުވަހުގެ މުސާރަ ހަދިޔާކޮށްފި

"ސިލޯނާއެކު ދިވެހީން"ގެ ނަމުގައި ކުރިއަށް ގެންދާ ޚާއްސަ ޓެލެތޯނުގައި، ރޯޑް ޑިވެލޮޕްމަންޓް ކޯޕަރޭޝަންގެ މުވައްޒަފުންގެ އެއް ދުވަހުގެ މުސާރަ ހިމެނޭ ގޮތަށް، ޖުމަލަ އެއްލައްކަ ރުފިޔާ މިރޭ ހަދިޔާކޮށްފިއެވެ. ޕީއެސްއެމްގެ ފަރާތުން މި ފައިސާއާ ހަވާލުވެވަޑައިގަތީ، ޕްރޮޖެކްޓް ލޭންޑް އެންޑް ބިޒްނަސް ޑިވެލޮޕްމަންޓްގެ ޑިރެކްޓަރު އައިޝަތު އާސިފާއެވެ. އާރްޑީސީން ފައިސާ ހަވާލުކޮށްދެއްވީ ބޯޑް ޑިރެކްޓަރު އިބްރާހީމް ސަބާހް ހަސަންއެވެ. އޭނާ ވިދާޅުވީ، އެ ކުންފުނީގެ މުވައްޒަފުން ވެސް ތިބީ، ލަންކާއަށް އެހީވުމަށް ތައްޔާރަށް ކަމަށެވެ. އެގޮތުން، މިއަދު ލިބުނު ކުޑަ ވަގުތުކޮޅުގެ ތެރޭގައި، އެ ކުންފުނީގެ ކޮންމެ މުވައްޒަފަކު ވެސް ނިންމީ، އެއް ދުވަހުގެ މުސާރަ ހަދިޔާ ކުރުމަށް ކަމަށް ސަބާހް ވިދާޅުވިއެވެ. "އަޅުގަނޑުމެންނަށް ލިބުނު ވަގުތުކޮޅުގެ ތެރޭގައި އަޅުގަނޑުމެންނަށް ނެގުނު އެންމެ ރަނގަޅު އަދަދެއްގެ ފައިސާ އެ މުވައްޒަފުންގެ އަތުން ނެގީ. އެ ފައިސާ މުވައްޒަފުންގެ ފަރާތުން މި ވަނީ ހަދިޔާކޮށްފައި،" އޭނާ ވިދާޅުވިއެވެ. ފާހަގަކުރެވޭ ގޮތުގައި، މި ޓެލެތޯން މާދަމާގެ 14:00އާ ހަމައަށް ކުރިއަށް ގެންދަން ވަނީ ނިންމާފައވެެ. މިހާތަނަށް އައިއިރު، ތިން މިލިއަނަށް ވުރެ ގިނަ ރުފިޔާ ވަނީ، އެ ޓެލެތޯނަށް ލިބިފައެވެ. ޓެލެތޯނުގައި ސަން ސިޔާމް މީޑިއާއިން ވެސް ބައިވެރިވާއިރު، ޓެލެތޯނުގެ އެންމެހާ އަދާހަމަތައް ސަން އޮންލައިނާއި އެސްއެސްޓީވީ މެދުވެރިކޮށް ގެނެސްދޭނެއެވެ. 'ސިލޯނާއެކު ދިވެހީން' ޓެލެތޯންއަށް އެހީވެވޭނީ: ރުފިޔާ އެކައުންޓު ނަން: ސިލޯންއާ އެކު ދިވެހިން ރުފިޔާ އެކައުންޓު ނަމްބަރު :7730000796107 ޑޮލަރު އެކައުންޓު ނަން: ސިލޯންއާ އެކު ދިވެހިން ޑޮލަރު އެކައުންޓު ނަމްބަރު: 7730000796106 ޓީވީ ސްކްރީނަށް އަރާ ކިއުއާރް ކޯޑު ޕީއެސްއެމްގައި ބަހައްޓާފައިވާ ފަންޑް ފޮށި މާލެ، ހުޅުމާލެ އަދި ވިލިމާލޭގައި ބަހައްޓާފައިވާ ފަންޑް ފޮށިތައް
އަރުޝީފަށް ނެގީ
އެންމެފަހުން އަޕްޑޭޓްކުރީ