އެޕަލް އިންޓެލިޖެންސްގެ އިންގިލާބީ ބަދަލުތަކާއެކު ޔޫޒަރުންގެ އަމިއްލަ ބޭނުންތަކަށް ޚާއްސަ އެޕަލް އޭއައި ނިޒާމް އިއުލާންކޮށްފިއެވެ. އެޕަލްގެ އަހަރީ ޑަބްލިއުޑަބްލިއުޑީސީ 2026 ކޮންފަރެންސްގައި އެޕަލްގެ ސޮފްޓްވެއާ އިންޖިނިއަރިންގެ އިސްވެރިޔާ ކްރެގް ފެޑެރިގީ ވަނީ އެޕަލްގެ އުފެއްދުންތަކުގައި އާޓިފިޝަލް އިންޓެލިޖެންސް (އޭއައި) ބޭނުންކުރާނެ މުޅިން އައު އާކިޓެކްޗާ އެއް ކަމަށްވާ އެޕަލް އިންޓެލިޖެންސް ރަސްމީކޮށް އިއުލާންކޮށްފައެވެ. ފެޑެރިގީ ވިދާޅުވި ގޮތުގައި، ހަގީގީ އެހީތެރިކަމެއް ފޯރުކޮށްދޭ އޭއައި ނިޒާމެއް ބިނާކުރަންޖެހޭނީ ޔޫޒަރުންގެ އަމިއްލަ ބޭނުންތަކަށާއި ސިއްރުތައް ހިފެހެއްޓުމުގެ މައްޗަށެވެ. މި އައު ނިޒާމު ފަރުމާކުރުމަށްޓަކައި އެޕަލްއިން ވަނީ ސޮފްޓްވެއަރގެ ދާއިރާއިން ގޫގުލްއާއެކު ވަރަށް ފުން ގުޅުމެއް ގާއިމުކޮށް، ގޫގުލްގެ ޖެމިނައި މޮޑެލްތަކާއި އެޕަލްގެ އަމިއްލަ މޮޑެލްތައް ގުޅުވާލައިގެން ޑިވައިސްތަކުގައާއި ސާވަރުތަކުގައި އެއްފަހަރާ މަސައްކަތްކުރާނެ މަލްޓިމޯޑަލް ސޮފްޓްވެއަރއެއް އުފައްދާފައެވެ. މީގެ ސަބަބުން ޔޫޒަރުންގެ އަމިއްލަ ޑޭޓާ ބޭނުންކޮށްގެން، ފޯނުގެ ސްކްރީން މަތީގައި ހިނގާ ކަންކަން ދެނެގަނެ، އެ ވަގުތަކަށް އެންމެ އެކަށީގެންވާ އެހީތެރިކަން ފޯރުކޮށްދޭނެއެވެ. އެޕަލް އިންޓެލިޖެންސްގެ މި ބާރުގަދަ އަޕްޑޭޓާއެކު ސަފާރީ ބްރައުޒަރަށް ވަނީ މުޅިން އައު ފީޗާތަކެއް އިތުރުކޮށްފައެވެ. އެގޮތުން ބްރައުޒްކުރާއިރު ޔޫޒަރުންގެ ޕްރައިވެސީ ރައްކާތެރިކުރުމަށްޓަކައި، ސަފާރީން އެއްވެސް ބްރައުޒިން ޑޭޓާއެއް އެޕަލްއަކަށް ނުވަތަ އެހެން އެއްވެސް ފަރާތަކަށް ހިއްސާއެއް ނުކުރާނެއެވެ. ސަފާރީއަށް އަލަށް އިތުރުކުރެވުނު "ނޮޓިފައި މީ" ފީޗާގެ އެހީގައި، ވަކި ވެބްސައިޓެއްގެ އަޕްޑޭޓަކަށް އިންތިޒާރުކުރަން ޓެބްތައް ހުޅުވާފައި ބެހެއްޓުމުގެ ބަދަލުގައި، އެ ޓެބެއް ބަންދުކޮށްލުމަށްފަހުވެސް އޭގައި ހިނގާ ބަދަލުތައް މޮނިޓަރކޮށް، ބަދަލެއް އައުމުން ސަފާރީން ޔޫޒަރަށް ވަގުތުން އެލާޓެއް ފޮނުވައިދޭނެއެވެ. އަދި ބްރައުޒްކުރަމުންދާ ވަރަކަށް އެ މައުލޫމާތާ ގުޅޭ އައު ޓެބްތައް ސަފާރީން އަމިއްލައަށް "ޓެބް ގްރޫޕް" ތަކަށް ތަރުތީބުކޮށް ދޭނެއެވެ. މީގެ އިތުރުން "ޑިސްކްރައިބް އެން އެކްސްޓެންޝަން" ފީޗާ މެދުވެރިކޮށް، ވެބްޕޭޖެއްގެ ވަކި ބަޔަކަށް ފަސޭހައިން ވަނުމަށްޓަކައި ޓޫލްބާގައި އަމިއްލައަށް ބަޓަނެއް އިތުރުކުރުމުގެ ފުރުސަތު ޔޫޒަރުންނަށް ލިބިގެންދާނެއެވެ. ސަފާރީގެ އިތުރުން އެޕަލްގެ އެހެން މުހިންމު އެޕްތަކަށްވެސް އެޕަލް އިންޓެލިޖެންސްގެ އެހީގައި ވަނީ ބޮޑެތި ކުރިއެރުންތަކެއް ގެނެސްދީފައެވެ. އެގޮތުން ޕާސްވޯޑްސް އެޕްގައި ހުންނަ ޕާސްވޯޑެއް ހެކްވެއްޖެނަމަ ނުވަތަ އެކްސްޕޯޒް ވެއްޖެނަމަ އެކަން އަމިއްލައަށް ބުނެދީ, އޮޓޮމެޓިކުން ޕާސްވޯޑް ބަދަލުކޮށް އަޕްޑޭޓްކޮށްދޭނެއެވެ. މެސެޖަސް އެޕްގައި ޔޫޒަރުން ދައްކާ ވާހަކައިގެ ކޮންޓެންޓް ދެނެގަނެ، އަމިއްލައަށް ރިމައިންޑާ ހެދުމާއި ގުޅޭ ފޮޓޯތައް ހޯދައިދޭން ސަޖެސްޓް ކުރާނެއެވެ. ކަލަންޑަރު އެޕްގައި އާންމުކޮށް ވާހަކަދައްކާ ބަހުރުވައިން ލިޔެލުމުން އަމިއްލައަށް ޝެޑިއުލަށް އިވެންޓްތައް އިތުރުކޮށްދޭނެއެވެ. އަދި ފޯން އެޕްގައި "ކޯލް ކޮންޓެކްސްޓް" ފީޗާގެ އެހީގައި، އެއަރލައިނަކަށް ގުޅައިގެން ފްލައިޓް ބަދަލުކުރަން އުޅޭ ވަގުތެއްގައި، މެއިލް އެޕްގެ ތެރެއިން ކޮންފަމޭޝަން ކޯޑު ހޯދައި ފޯނުގެ ސްކްރީނަށް އަމިއްލައަށް ގެނެސްދޭނެއެވެ. ގޭތެރޭގެ ސަލާމަތީ ކަންކަން ބަލަހައްޓާ ހޯމް އެޕަށްވެސް ވަނީ އެޕަލް އިންޓެލިޖެންސްގެ އެހީގައި މުހިންމު ބަދަލުތަކެއް ގެނެސްފައެވެ. މީގެ އިތުރުން ހޯމް އެޕްގެ ނޮޓިފިކޭޝަންތައް މިހާރު ވަނީ އެޕަލް އިންޓެލިޖެންސްގެ އެހީގައި އެއް ހަރަކާތެއްގެ ގޮތުގައި ގްރޫޕްކޮށްލެވޭ ގޮތަށް ބަދަލުކޮށްފައެވެ. އަދި ގޭގައި ހަރުކޮށްފައި ހުންނަ ކެމެރާތަކުން ފެންނަ މަންޒަރުތައް އެނަލައިޒްކޮށް، އެ ސަރަހައްދުގައި ހިނގާފައިވާ ކަންކަން ލިޔުމުން ބުނެދިނުމުގެ ގާބިލުކަން މިހާރު ހޯމް އެޕަށް ލިބިގެންވެއެވެ. މީގެ އިތުރުން، އެޕަލް އިންޓެލިޖެންސް މެދުވެރިކޮށް އެކި ކެމެރާތަކުން ނަގާފައިވާ ރެކޯޑިންތަކުގެ ތެރެއިން ޔޫޒަރުން ބަލަން ބޭނުންވާ ޚާއްސަ ކަމެއް (މިސާލަކަށް އެއްޗެއް ޑެލިވަރީ ކުރި ވަގުތު) ވަރަށް ފަސޭހައިން ހޯދައި، އެންމެ މަތީގައި ދައްކާލާނެއެވެ. މީގެ އިތުރުން، ގިނަ ފިޔަވަޅުތަކެއް އެކުލެވޭ އުނދަގޫ ޓާސްކްތައް ފަސޭހަކޮށްދޭ "ޝޯޓްކަޓްސް" ފީޗާ ބޭނުންކުރުންވެސް އެޕަލް އިންޓެލިޖެންސްއާއެކު މިހާރު ވަނީ މާ ފަސޭހަވެގެން ގޮސްފައެވެ. ސިއްރު ހިފެހެއްޓުމާ ބެހޭ ގޮތުން ވާހަކަދައްކަވަމުން ކްރެގް ފެޑެރިގީ ވިދާޅުވީ، އެޕަލްގެ ސާވަރުތަކަށް ފޮނުވޭ އެއްވެސް މައުލޫމާތެއް އެޕަލް އިން ރައްކާކޮށްގެން ނުގެންގުޅޭނެ ކަމަށެވެ. ޔޫޒަރުން ކުރާ ރިކުއެސްޓްތައް ފުރިހަމަކުރުމަށްފަހު އެ ޑޭޓާތައް ވަގުތުން ފުހެވިގެންދާނެއެވެ. އަދި އެޕަލް އިން މިކަން ކުރަނީ ރައްކާތެރިކަމާއެކުތޯ ކަށަވަރުކުރުމުގެ ފުރުސަތު މިނިވަން ތިންވަނަ ފަރާތްތަކަށް އެޕަލް އިން ވަނީ ހުޅުވާލާފައެވެ. އެޕަލް އިންޓެލިޖެންސްގެ އޭއައި ފީޗާތައް އެންމެ ފުރަތަމަ ލިބިގެންދާނީ އިނގިރޭސި ބަހުން ކަމަށާއި، ނަމަވެސް ކުރިއަށް އޮތް ތަނުގައި އެހެން ބަސްބަހަށްވެސް ވަރަށް އަވަހަށް ސަޕޯޓްކުރަން ފަށާނެކަމަށް އެޕަލްއިން ވަނީ ބުނެފައެވެ. މިއާއެކު، އިމޭޖް ޕްލޭގްރައުންޑް ފަދަ ޓޫލްތަކުގެ އެހީގައި މުއާމަލާތްކުރުމާއި ފޮޓޯ އެޑިޓްކުރުމުގެ ތަޖުރިބާ މުޅިން އައު ހިސާބަކަށް ހިނގައްޖެއެވެ.